Footer

SARITA: KAS KAGITA TI KOBRA (Tuloyna)

Iti uneg ti beerhouse ti nangpatayanna iti sumaruno a biktimana. Kas iti sigud, kampante ni Boy Kobra a mangitangtangad iti serbesa ken sagpaminsan A panangipug-awna iti asuk ti sigariliona. Nupay agkaiwaran ti ladawanna a kas wanted, awan ti makalasin kenkuana. Asino ti mangipagarup a ti binabae a kasla mangur-uray iti bayadanna a lalaki iti maysa a suli ti beerhouse ti nagita a “kobra”?

Apagisu a maibus ni Kobra ti maikadua a bote ti serbesa idi sumungad ti dati a kasosio ni Diagpaabac iti negosiona iti droga. Isu ti makinkukua iti beerhouse. Iti estoria ti mayor, nagsina ti dalanda iti kasosiona gapu iti panangloko daytoy iti kaudian a transaksionda. Peke a kuarta ti imbayadda iti de kalidad a droga ni Diagpaabac. Ita, kayat ti mayor ti sumubbot babaen ti pannakaitumba daytoy a kasosiona.

Sinurot a dagus ni Kobra ti biktimana a simrek iti comfort room. Naminlima nga inwawekna ti icepick iti batog ti barukong ti drug lord idinto nga inapputna ti bibig daytoy. Awanen angesna idi ibbatanna. Nagdardaras a rimmuar iti pagiinuman.

Kas iti sigud, agur-urayen iti pagpikoran ti dalan dagiti kakaduana a mangiyadayo kenkuana.

Kabigatanna, nagpiestaan manen dagiti estasion ti radio ti naganna.

Boy Kobra bimmanat manen!” impadamag ti radio.

Nagpaggaak ketdi ni Boy Kobra, inarub-ob ti nabati nga arak iti basona sana inarusibsib ti babai a “sagut” ti mayor kenkuana.

Impalak-am pay ni Kobra, sumagmamano nga oras sakbay ti noche buena, ti kaladingitan a Paskua iti pamilia ni Judge Guillermo Calintegan, ti kaubingan iti tawenna a tallupulo ket lima, nasaririt ken addaan prinsipio a hues iti San Luis. Isu ti nangpirma iti search warrant a mangsukisok iti bodega ni Mayor Diagpaabac a nakasamsaman dagiti maiparparit a droga. Gapu iti dayta a napasamak, imbilin ni Mayor Diagpaabac ti pannakaipaknina.

Babaen ti panagaruat ni Kobra kas ken ni Santa Claus, awan ti duadua nga inawat ti katulongan ni Judge Calintegan ti intedna a “regalo” a naiturong iti hues. Iti laengen damag iti radio ti nakaammuan dagiti tattao ti panagbettak ti bomba idi linuktan ni Calintegan ti “regalona”.

Naapput ni Kobra dagiti matana. Adu pay a biag ti napukaw iti kalbit laeng ti ramayna kalpasan daydi. Ngem husto ti kunada nga adda pagpatinggaan ti amin a kinadakes. Napaanges iti nauneg.

Iti daydi a rabii a madama ti panagin-inumda ken ni Mayor Diagpaabac, nabuakda iti kellaat nga iseserrek dagiti kameng ti Special Action Force iti safehouse Naduktalanen dagiti illegal a negosio ti mayor. Nakita iti bodega nga immunan a binukibok dagiti pulis ti sumagmamano a maleta ti droga.

Pinasukoda ti mayor. Ngem saan a simmuko ni Diagpaabac. Pinabusinana ketdi ti uzi kadagiti pulis a nanglawlaw kadakuada. Bayat ti pinnutok, naglibas ni Kobra. Nupay nasugatan, kas iti musang, napartak a nagpukaw iti kasipngetan.

Agpilaypilay ni Kobra a dimmanon iti kumbento nga ayan ni Fr. Eugene. Napigsa ti panagkatokna. Adun ti nagsayasay a dara manipud iti napaltogan a luppona. Kellaat, naglidem ti matana.

Addan iti maysa a siled idi makapuot. Immuna a nakitana ti dakkel a krus iti sakaanan ti katrena. Pinadasna ti agkuti ngem naut-ot pay laeng ti nabendaan a luppona.

Naluktan ti ruangan. Ni Fr. Eugene.

Nakariingka gayamen, Emmanuel. Saanka pay nga agkutikuti ta dinto manen agpadara ti sugatmo,” naisem a kinuna ti padi.

Kayak ti bagik, Father,” insungbatna ket pinilitna ti bimmangon. Nagdakiwas ti matana iti siled.

Ti kadi bag? Dika madanagan, adda kaniak ken saan a nagaraw ti kargana,” kinuna ti padi.

Nakaanges iti nalukay ni Kobra.

Wen gayam sibsibet ni Arianna,” nagtimek manen ti padi. Ammona ti kaadda ti relasionda ken ni Arianna.

Ania ti kaaddana ditoy?” timmadem dagiti mata ni Kobra.

(Maigibusto)