SARITA: Katrina (Tuloyna)

MARTES. Alas nuebe ti agsapa. Addaak iti opisinami a titser ti Northern Quezon High School. Madamak a reprepasuen ti ilektiurko iti Geometry idi agbanipbip ti selponko.

Agktata.. et dti.

Naggapu ken ni Katrina ti mensahe.

Estudiantek ni Katrina itay napan a tawen. Physics ken Math ti asignaturak kenkuana. Mangal-ala ita iti kinamaestra iti FLVC, Abulug.

Ada klasek,  in-text back-ko. ‘Ton pangaldaw laengen.

Bsta urayenka. Itan! 15 min py skbay t klasem…

Nakudkodko ti ulok. Adda laeng iti kanto ti kunana a pagkitaanmi.

Ania ngata ti ibagana, ‘ya? napasakuntipak.

Napuotak laengen ti bagik nga agsangsangokami iti paksolmi a restaurant. Diak koman kayat ti makisinnarak kenkuana ta addan asawak, ni Charmaine, ken addanton bungami. Ngem amkek amangan no paysuenna ti pangtana a mangriribuk no diak patgan ti kayatna.

Makatawen idin a nobiak ni baket idi sungbatannak ni Katrina. Iti text ti nangbalbalatongak kenkuana. Masuronak ngamin ta kanayon nga agpasugnod idi ni Charmaine. Agturpos idin iti Edukasion idiay Tuguegarao. Awan la bassit a madamagna, agpasugnoden. Nakaselselosa! Sangkakunana nga isinanak. Awan  kano umno nga ar-aramidek. Dinak pay asawa, bekbekkelennakon. Anianto laengen no agdennakami?

Inlimedmi ti relasionmi ken ni Katrina. Dakkel la ketdi a kontrobersia no maammuan ti pagadalan. Sumanerser a sir ti awagna kaniak iti school. Ngem nasam-it a hon iti text!

Napintas ni Katrina. Makaawis ti nagsaway a kallidna. Nasingpet. Saan a nagaraw a kas kadagiti kaklasena.

Nagsabat met ti dalanmi ken ni baket idi mangal-alaak pay laeng iti Edukasion idiay siudad. Agturposak idin idinto ta adda pay laeng iti maikatlo a tukad. Naemma ken nagaget. Ti laeng kinamanagpasugnodna ti kagurak. Dina naikkat daytoy uray idi agassawakamin.

Adda laeng iti balay ni baket. Naka-apply met ketdin ngem awan pay ti resultana. Maki-ranking manen kadaytoy umay a panagririkep ti klase.

“Naimbag ta immayka,” timek ni Katrina. Naka-uniporme pay laeng.

Nakayamanak ta awan pay matatao iti restaurant. Saggaysakami iti pansit ken softdrink.

“Apay kadi?” diniretsak.

“Napateg unay ti rumbeng a maammuam,” serioso ti panangmingmingna kaniak.

Nagkebbaak. Ita laeng nga agserioso.

“Ibagamon ket agur-uray ti klasek,” kinunak ngem agkakamakamen ti banugbog ti barukongko.

“Nanglanganak.”

Naplengak. Naawatak ti kayatna a sawen.

Simmiplot lattan iti isipko ti napalabas a Paskua. Inawisnak ni Katrina iti balayda. Agkasangay kano ti adina. Diak koma patgan ta adda ngaruden asawak ngem nagpilit. No kano paayek, ipudnonan ken ni baket ti relasionmi. Pakonsuelok kano lattan yantangay dina riniribuk ti kallaysami ken ni baket.

Agmaymaysa a nadanonko iti balayda. Nakimisa dagiti kabbalayna. Namaysaannak ta awan gayam ti agkasangay.

Ket iti umuna a gundaway, ninanammi ti maiparit nga ayat. Nalpasen ti amin idi agbalawak.

Ita, adtoyen ti bunga ti inaramidmi.

“Ania ita ti planom?” sinaludsodko.

“Sika?” insublina ti saludsodko.

“Mariribukanak…”

“Kasano ngaruden? Malmaluendak la ketdi idiay balay no maammuanda ti amin.”

Imbagak nga agpatangkaminto iti sabali nga aldaw. Diak kayat a ditoy ti pagsaritaanmi. Umadun dagiti kostumer.

Nawatanna met. Rimmuarkami. Nagdiretsoak iti klasek a kawaw ti isipko. Nagawid metten.

Idi maammuan ni Katrina ti panangasawak, kasta unay ti sakit ti nakemna.

“Apay pay laeng nga inaremnak no adda met gayamen babai iti biagmo?” saludsodna idi.

A diak nakasungbatan.

“Basolko met ketdi, a,” kinunana met laeng. “Nagtamedak unay iti kinalaingmo. Iti panangsaluyotmo kadagiti pagbutbutngak a subject… ti Math ken Physics! Ammom kadi a gapu kenka, inayatko dagita a subject. Nagbaliw ti panirigak. Inggaedko ti nagadal ta kunak… diak kayat ti agbalin a puling laeng iti imatangmo. Masapul a nakaturposak met tapno maikarinto met kenka.”

“Agyamanak,” nakunak.

“Diak kayat a mapukawka. Madadael la ketdi ti masakbayak. Dinak baybay-an…” insaibbekna.

“Mangasawaakon. Saanen a rumbeng…”

“Kayatmo ngarud a madadael ti masakbayak?”

Diak nakauni.

“Ala… kabit,  kunam no isu! Ngem no dayta ti maitutop, aklonek… diak kayat a mapukawka iti imatangko, Ted.”

Napasennaayak. Anian! “Mayatka?”

Nagtung-ed. “Dadaelek ti pamiliam no tallikudannak.”

Nagtuloy ngarud ti relasionmi. Selpon ti komunikasionmi.

Tapno dinak mabisto ni baket, adda code nga ar-aramatenmi ken ni Katrina. Sakbay nga i-text-na ti mensahena, ti code ti yunana. A sungbatakto met iti code tapno sierto a siak ti nakaiggem iti selpon. Adda dagiti gundaway a malipatak iti balay wenno alaen ni baket no kasta nga awan ti load-na. Diak pay ketdi in-phone book ti number-na. Memoriadok!

(Adda tuloyna)