Sarita: Lebanon: Iti kuko ti lawag (Umuna a paset) | Tawid News Magazine - Weekly Ilocos News 📰

Lebanon: Iti kuko ti lawag (Umuna a paset)

NAULIMEK a nagampayag nga immadayo dagiti kalapati sada in-inut a nagpukaw bayat ti panangbuybuya ni Arlyn, Filipino nga agtawen iti 29, taga-Sigay, Ilocos Sur. Gapu ti kinakurapay iti biag, naallukoy ni Arlyn a bumallasiw-taaw. Ayat iti pamiliana ti nangiduron kenkuana a mapan diay Lebanon.

Nasaliwanwan ti pamilia a dinanonna. Nasuerte ta panagriknana mayat ti lugar nga ayanna. No idilig iti ili a naggapuanna, ay, maminribu a napimpintas ti lugar nga ayanna ita. Dua laeng ti kabbalayna, ni Jenny a kaslan pudpudno a manangna ken ti Papa daytoy a nabayagen a nakaidda gapu ti sakitna.

Adda naminsan a naistoria ni Jenny a nakaikeddengen nga agawid ti adingna ken mamana. Dina laeng matantia no kaano.

Adda naisalsalumina a kayaw dagiti bimmallatinaw a matana. Kasla rabong ti kawayan ti natirad nga agongna ket no agsao, nakalamlamuyot ti timekna. Nasippukel ti bagina, kasla maysa a balasang a Pilipina. Asideg, nasinged ni Jenny ken ni Arlyn; pagdumaanda laeng, awan pay ti asawa ni Jenny.          

Nanam-ay ti trabaho ni Arlyn. Bambantayanna laeng ti lakay a Papa ni Jenny,  iyawatna no aniaman ti kasapulan ti lakay. Aglaba, agdalus iti aglawlaw ken pasaray tulonganna ni Jenny iti ubra ‘diay kusina.

Tunggal agsueldo ni Arlyn, kas inkarina, adda ipaw-itna iti pinanawanna a pamilia.

NAPUNNUAN  ti ragsak ti mata ni Arlyn di mangngeganna iti umuna a gundaway ti timek ti asawana manipud iti linia ti telepono. Mail-iliwen ta nasurok metten a makatawen ti panagnanaedna iti Lebanon. Tepteppelanna ti riknana tapno saan nga agsangit.

“’Ni,a kumustaka ditan? Nasalun-atka kadi met laeng? Dagiti amom, saandaka met laeng nga uy-uyongan?” agsasagannad a saludsod ni Daniel nga asawana.

“Saankayo a madanagan, mayat ti ayanko, nasalun-atak ken nasingpet ti amok,” insungbat ni Arlyn a mangrugin nga agtedted ti luana.

“Inang, inang, ania ngay ti iregalom kaniak? Nagturposakon iti elementary ket siak ti napagasatan a nagbalin a balediktorian. Sayang, inang, ta awanka, sika koma ti nagisabsab-it iti adu a balitok a medaliak,” impannakkel ni Jennifer, ti balasitang nga anak ni Arlyn.

Lallalo a rimmaniag ti tartaraisemen a mata ni Arlyn.

“Ikararagmo, anakko ta barbareng makaawidak no umay a tawen palubos ti Apo . Kasapulantayo ‘gamin ti agurnong iti adu a kuarta tapno addanto usarenyo ken adingmo no agbasakayo ti kolehio,” saannan a nalapdan ti panagayus dagiti luana. Iti dayta a kanito, kasla kayatnan ti aggawid ta mapanna rakepen ti anakna. Ti anakna a mangitagtag-o kenkuana bayat ti kaawanna. Malagipna no kasano a nagbalin isuna a kasla mangukop a dumalaga tunggal makitana a maikuskuspil dagiti annakna.

“Agyamanak unay, Apo , ta adda napanan ti panangbalballakadko kadakuada. Adda met laengen gapuanan ti reggetko nga agkatkatulong ditoy,” nakunana iti panunotna.

Kalpasan a nakasaritana ti dungdungnguenna a buridekna ken naibagana amin a kayatna, imbabanan ti telepono. Naibsan met laengen ti nabayagen a kemkemkemenna nga iliw iti pamilan.

Adu a rabii ti naglabas a narigat ni Arlyn a maala ti turogna. Magutgutad ti barukongna tunggal agpitik ti pusona. Madandanagan. Kabisadonan ti bagina. Ammona nga adda iparparangarang ti kastoy a kapigsa a panagpitik ti pusona. Inkararagna laengen a sapay la koma ta agtalinaedto latta ti tibker ti pakinakemna no adda man sumangbay a parikut ti biagna.

“ARLYN ti naganna, Mama, maysa a Filipino,” sungbat ni Jenny iti saludsod ni Mamana kabayatan ti panagsasangoda nga agmermerienda.

Kasangsangpet la unay ti Mama ni Jenny ken ti adingna manipud diay Dubai. Panay ti perreng ni Antonio, ti lalaki a kabsat ni Jenny ken ni Arlyn a madama nga agikabkabil iti mainum iti basoda. Arig labusan dagiti matana ni Arlyn.

Adda langa ni Antonio ngem pinagbalin laeng ti bigotena nga aglanglanga a rusanger ken derrep iti babai. Dakkel a babai ken nalukmeg ti Mama ni Jenny, ngem uray no madlaw a baketen, naalibtak pay laeng nga agkuti.

NABALIWANEN ti aglawlaw ni Arlyn. No idi, nanam-ay laeng ti ubrana, tatta, kasla naminsangagasut a napadagsenan ti trabahona. Maamak nga agkuti. Kanayon nga agnernerbios. Mabuteng nga agkamali tunggal aggaraw ti imana. Kasla adda nagrusing a siit iti karabukobna ket narigat payen nga umanges. Ti kaamakna laeng, kankanayon a sumursurot ti mata ni Antonio uray sadinoman ti ayanna. Sipsiputan ti lalaki amin a garawna.

          (Maituloyto)