Sarita: Lebanon: Iti kuko ti lawag (Maudi a paset) | Tawid News Magazine - Weekly Ilocos News 📰

Lebanon: Iti kuko ti lawag (Maudi a paset)

Dumawdawat iti tulong ni Arlyn ngem di pulos sumngaw ti bosesna. Idi ikason ti lalaki ti panangdandanog ni Arlyn iti barukongna, simngaw ti pukkaw ni Arlyn.

“Tulongannak, Jenny, tulongannak…..”

“Uray ania a kapigsa ti panagpukkawmo, awan makangngeg kaniam. Nasaysayaat laengen nga agdisnudoka a mangited iti bagim kaniak, saankan a lumaban…” sungbat ti lalaki a dagus a nangipaidda ken ni Arlyn.

Talaga a desperadon ni Arlyn a nangalikumkom iti bagina. Idi makaala iti buelo ni Arlyn, inkusayna ni Antonio. Ngem saan a napleng ti lalaki ket rinugiannan a pirgisen ti bado a nangbalkot iti bagi ni Arlyn.

“Pangaasim, Antonio, saannak a ramesen, pangaasim….” ngem saan latta a sinardayan ti kuspag a lalaki.

Natungpal met laengen ti panagibales ti baket iti impaay a sakit ti maysa a Filipino kenkuana. Inusarna ti anakna iti panangipatungpalna iti nangisit a planona.

INYIR-IRUT ni Arlyn ti nagkukot. Awan pulos gaganaygayanna a bumangon. Nasugpet dagiti matana. Agmamayo. Nakamulengleng lattan iti suli ti kuartona. Kasla sadiwa pay laeng ti napasamak kenkuana, no kasano a binukbukodan ni Antonio ti bagina.

Agsasaruno ti dagok iti biagna. Kalpasan a natay ti asawana, tatta narames. Kayatnan a pabasolen ti Dios.

“Diosko, kunak man no awan ti Ama a mangisagmak iti anakna, apay ‘garud a kastoy ti napasamak kaniak? Ania kadi ti nakabasolak? Apay a siak ti agbaybayad iti basol ti sabali?” naiyebkasna.

Awan sabali a mapanunot ni Arlyn no di agibales iti demonio nga amona. Saanna laeng nga ammo no kasano, ngem adda simmiplot iti panunotna.

“Nasken a makalibasak ditoy. Daytoy laeng ti makitak a pamuspusan tapno makabalesak. Masapul a maammuan dagiti polis ti panangmalmaltratoda kaniak,” naitanamitimna.

NAGTURONG a dagus ni Arlyn iti kaasitgan a presinto ti pulis apaman a nakalibas. Bimmallaet latta iti ummong dagiti agpapatang a pulis.

Dumawdawat iti tulong ngem kasla awan ti nakangngeg. Agsangsangit a mangdakdakamat no kasano ti rigat a napadasanna ti pagtaengan ti employerna.

Idi masungbatanna amin a saludsod dagiti polis napagnunumuanda nga ipanda ni Arlyn sadiay embahada ti Pilipinas.

Nagabnot a bigla ti nagsasanga a siit ti karabukob ni Arlyn. Maragsakan ta maikkan met laengen iti hustisia.

Saan a masurotan ni Arlyn ti dalan a turongenda, agdudua no isu met laeng ti  mapan diay embahada. Idi makagtengda iti agsanga a dalan, malagipna nga isu met laeng ti dalan nga agturong diay naggapuanna. Bigla a nagliday ti  rupana.

“Haandak koman nga isubli iti impierno a naggapuak. Kayatkon ti aginana, kayatkon ti agawid, usto didiayen a rigatko,” impakaasi ni Arlyn.

Ngem kasla billit-tuleng dagiti polis, saanda nga inkaskaso ti unnoy ni Arlyn.

Kadagiti amin a dinakamat ni Arlyn a kapadasanna ‘diay uneg ti balay ti naulpit nga amona, di gayam pulos nalunag ti puso dagiti polis.  Uray bassit laeng a patak ti ayat wenno sangkatedted a tipping ti asi, maysa man kadakuada awan nasig-ang. Pammarang laeng nga ipanda diay embahada.

Awanen ti nasam-it nga isem ni Arlyn, nasukatanen iti lua. Ammonan ti sumaganad a mapasamak kaniana. No kasano a maituloy ti naputed a kalbario ti biagna.

AGSASARUNO a pungot ti nagamlus ni Arlyn apaman a naiserrek ti polis iti sidong ti employerna.

“Uray sadino ti ayanmo a langit, mabirokandaka latta. Saannak a rabrabaken no dimo kayat ti agawid nga ulo laengen,” agngerngernger nga insawang ti baket.

Dagus nga inyawat ni Antonio ti dekandado a kadena. Babaen dagiti polis, kasla baboy a pinungoda ni Arlyn sada inyuli diay kuartona tapno ni kaanoman ket saanen a makalibas. Kalpasanna, nangiruar ti baket ti nareppereppet a kuarta a pangbayadna kadagiti polis.

Nasipnget amin a makita ni Arlyn, nakarkaro pay ngem bulag nga agar-arikap.

Kasla aglupias ti danum nga aggapu diay ubbog ti matana. Kasla palasio a narpuog ti kaungganna. Naawananen iti namnama a makakita iti lawag a mangakkal iti nadagsen a krus a nabayagen a nakabaklay kenkuana.

“ Maawatam koma, Arlyn, awan ti maaramidak no ni mama ti agsao. No haandak nga adipen ni mama ingga ita, nabayagen nga inlibaska ditoy,” pinangay-ayo ni Jenny ken Arlyn bayat ti nairut a panangarakupna.

“Hu…hu…hu….hu….., tulongannak, Jenny. Kayatkon a maarakup dagiti annakko,” pakaasi ni Arlyn a makalawasen a nakakadena. “Tulongannak koma a makapanaw ditoy nakaibaludak a pagtaenganyo.”

Ad-adda a naasian ni Jenny idi intarungangaw ni Arlyn ti nabbasa iti lua a rupana. Marikna ni Jenny ti naulpit a panagrigrigat ni Arlyn. Maam-amirisna ti basol nga impaay ti pamiliana. No apay a ni Arlyn ti mangbaybayad iti sakit nga inted ti Filipino ken Mamana.

“Kasapulan a maputeden ti panagrigrigatmo, Arlyn. Aramidek ti amin tapno makalibaska ditoy,”  naiyebkas ni Jenny.

 (Maigibusto)