SARITA: Mannursuro (Maikadua a paset)

Nagkinnita dagiti baket ken lakay.

“Kasano ngatan, Mistro, ket awan met kuartami?” nariknak ti liday iti timek ti lakay.

Diak nakatimek. Ta ania koma ti sawek?

“Ikararagtay’ laengen nga awan dakes a mapasamak ni Regie, Tata,” kinunak idi maalak ti riknak.

“Ania kad’ ti kasasaadna itay panawam, Mistro?” ni Nana Elyang.

“Palpaliiwen pay laeng itay ti doktor, Nana.”

“Ayyapo, aya!” naikudkodna. “Nalipatan man ngatan ‘diay ubing ti sangkabalakadko kenkuana.”

Nagdardaras a nagsukat ti lakay. Apagisu a makasukat idi sumungad ti maysa kadagiti innem nga annakda. Umayna koma gayam ipadamag ti naawatda a mensahe iti selpon ti sekretario ti barangay. Intext kano gayam ni Malou, manangen ni Regie nga addan iti maikadua tukad iti sekundaria, ti napasamak iti kabsatna.

Kinaduak da Tata Fausto ken Manong Alfred a napan iti district hospital. Nadanonmi ni Regie a nakaiddan iti maysa kadagiti katre iti emergency room. Annay pay laeng nga annay. Ti ulona ti agalenna la unay.

“Ania ti kuna ti doktor?” inamadko ken ni Dario a mangat-atibay iti ubing.

“Masapul kano a ma-X-ray wenno ma-CT scan ti ulona, sir,” kinunana.

“Apay, awan, ‘ya, ti X-rayda ditoy?”

“Adda kano , sir, ngem dina kaya ti ulo. Adda kano dita Junction Luna ngem ti dakesna, saan a maala a dagus ti resulta.” Agarup tallopulo minuto a tarayen ti multicab ti Junction Luna a barangay ti kabangibangmi nga ili.

“Kasano ngaruden?”

“Diak man ammo, sir…”

“Itaraytayon, a, ni Regie ‘diay Aparrri wenno Tuguegarao,” kinunak. Madanaganak. Amangan no ania ti mapasamak ti ubing no maibayag sakbay a maeksamen a nalaing.

“Awan met kuarta nga iggemmi, Mistro,” timek ni Tata Fausto. Nakaay-ay-ay ti langana a mangkitkita lattan iti anakna. Agluluasit met ni Malou iti uluanan ti kabsatna.

“Ti napateg, Tata, ket makita ‘ta ubing,” kinunak. “Narigaten no magabay ti amin numona ket ulo ti agalenna.”

Inruarko ti selponko. Tineksak ni Sir Johmar ket imbilinko nga ibagana iti office ti kasasaad ti ubing. Imbagak metten a mangiremedio koma ti pagadalan iti kuarta ta nakapulpulos dagiti dadakkel ni Regie.

“Pangalaantay’ koma ngarud ita iti lugan?” sinaludsod ni Dario.

“Ket ti ambulansia ditoy hospital, a!”

“Awan kano, sir. Inusar dagiti empleado ti hospital iti ‘papanda ‘diay Tuguegarao.”

Nakudkodko ti ulok. Ania metten!

Nagkatek ti isipko. “Ti lugan ti munisipio!” kinunak a dagus. Adda ngamin bukod a van a lugan ti munisipio. Maus-usar daytoy kadagiti emerhensia a banag. Isu ti kasla maikadua  nga ambulansia ti ilimi.

“Kasano ngarud, Mistro, ket awan met ti ammok nga asitgan ‘diay munisipio,” ti manen ama ni Regie.

“Siak ti makaammo, Tata,” kinunak lattan nupay mismo a siak ket awan ti personal nga am-ammok iti uneg. Tapno di met unay nga agdanag ti lakay!

Ngem anian a pannakaleppay ti abagak idi awan kano ti van. Adda kano intarayna a na-stroke idiay Tuguegarao. Agalas tresen iti malem. Agdua orasen manipud naitaray ni Regie iti ospital.

Nadegdegan ti panagdandanagko. Kasla diak pay laeng mamati a kastoy ti napasamak iti maysa nga adalak!

No maminsan, pabasolek ni Regie. Iti kuartoda, mamin-anon nga inawagak ti atensionda nga agkakalugaran ken agkakabagian pay. Dida ngamin makatalna. Kasla masinsinit a kanayon dagiti dapanda. Kuna pay ketdin dagiti kaduak nga awatenmi latta idan ta itada la a makakita iti lawag. Gapu kadi ta iti bambantay ti dimmakkelanda

Segun iti istoria itay ni Ariel, kellaat kano a nagballasiw ni Regie itay kamaten ti kaangawna a babai a taga-sabali a section. Agaayamda kano itay iti sirok ti bittaog a nangiparkingak iti luganko yantangay awan pay met alauna.

Ngem nupay kasano ti panangpabasolko ken ni Regie, nalpasen ti amin. Naidawatko laengen nga awan mapasamak kenkuana. Diak met nagliway a namagbaga kadakuada a gesdanda ti agaayam iti kalsada. A napipia nga iti uneg ti kuarto ti paggiananda nga aguray iti oras ngem iti agtalinaed pay laeng iti ruar.

Nagsubliak iti ospital. Imbagak ti banag ti pagnak. Kasla maaw-awanan ni Tata Fausto iti imbagak.

Intextko a dagus iti pagadalan ti parikut. Awan pay naawatko a text back ti immuna itay a textko. Ania metten, naikudkodko.

Nagpakadaak iti ama ni Regie. Imbagak a mapanak iti pagadalan ta ammuek no ania ti makunada.

Dimmagasak nga immuna iti PNP sakbay a napanak iti eskuela. Kinumpletok ti blotterko.

Apaman a nakagtengak iti office, maysanmaysa ti nagdamag iti kasasaad ti ubing.

“Uray, a, no di met la nagsarua wenno nagtedted ti dara iti lapayag wenno agongna?” sinaludsod ni Ma’am Mylene.

“Saan met, Ma’am,” kinunak.

“Nasayaat ngarud no kasta,” kinunana. “Maysa ken dua ngamin ti tiansana nga agbiag no adda kasta a napasamakna.”

“Nagkitakayo ken ni Ma’am VC?” sinaludsod Ma’am Lorie, ti prinsipalmi.

“Saan met, Ma’am,” insungbatko.

“Imbaonmi nga umay ‘diay hospital.”

Imbagak a dimmaw-asak iti PNP. Nalabit a nagsinnallawasiwkami iti dalan.

“Ket ‘diay drayber ti traysikel?” sinaludsod ni Sir Dener, ti guidance counselormi.

“Adda iti ospital, sir. Isu a mismo ti nangitaray iti ubingtayo. Bambantayanna pay ket itay, a, damok a mapan kitaen diay ubingtayo!”

“Nasayaat ngarud no kasta. Kunak la ketdin no intarayanna.”

“Ti dakesna, sir, awan lisensiana. Isu a dakkel la ketdi a sungsungbatanna ti napasamak.”

      (Adda tuloyna)