Mar Plogo, mediaman (Maikadua a paset)

Adda pay daydi gundaway nga adda sangaili ti gobernador a kameng ti media manipud iti Manila. Kasapulanda ti kaduada nga aginterbio tapno adda ag-transcribe kadagiti makapatangda a saan a makaammo nga agtagalog. Nairana idi a diak simrek ta agtrangkasoak. Imbes nga isu ti mapan ta isu ti kangrunaan a reporter iti estasion, tinawagannak ketdin a siak ti manguyog. Idi ibagak a masakitak, dinamagna pay no kaanoak a mapiaan ta masapul kan a sumrekak ta dina mapanawan  ni baketna. Di kan met makapan tay maysa pay a reporter a padana a sadut ta bambantayanna tay nakamassayag a lilangna a magpakamatay gapu ta dinan ammo ti pangalaanna iti pagbayadna iti dinispalkona a kuarta.

Inkuyognakami ti gobernador iti ipapanna iti Manila. Maangay ngamin iti SM Megamall ti makalawas a trade fair a pakailakuan dagiti produkto manipud nadumaduma a probinsia. Gapu ta adu met dagiti produkto ti Capangsuan a kayat nga itandudo ti gobernador, nangpili kadagiti empleado ti Provincial Tourism Office a mapan aglako. Maysa a dumptruck nga almires, kornik, ashtray a kayo, ules, buneng, getteng ken dadduma pay a partuat ti Capangsuan ti imbiaheda. No apay nga inkuyogdakami ditoy, kayat ti gobernador a maidukomento dagiti aktibidad iti makalawas a pasken. Malaksid ngamin ti panaglako, adda pay fashion show a pakaiparangan dagiti indigenous fabrics iti maudi nga aldaw ti trade fair.

Gapu ta babbai dagiti naggapu iti tourism office, nagpatulongda nga agbagkat nga agibaba ket agipuesto kadagiti tagilako. Naktanganen ti takiagmi ken ni Boggie nga agbagbagkat ngem saan met laengen a nagkir-in a tumulong ni Mar.

“Apay koma nga agbagkattayo ket mediatayo. Immaytayo ditoy tapno agkober iti pasken,” intanabutobna idi idawatmi ti itutulongna. Intugawna ketdi iti uneg ti dumptruck.

“Apay, dinan sa met pampanunoten a gobierno ti mangpaspasueldo kaniana?” inkuldingko ken ni Boggie.

“Bay-am lattan a. Kastana la ngarud ni dayta,” inyal-al ti cameraman a nangibuat iti maysa a kahon.

Pagammuan ta immulog ni Mar manipud iti dumptruck. Tinukmaanna ti kahon a baklay ni Boggie.

“Siakon ti mangbagkat” kinunana  ket innalanan ti kahon. Saanna a natantia ti dagsen ti kahon ta ipagarupna ngata a kornik ti kargana ket dandani nataltal ti ramayna iti panagdardarasna a mangibaba iti kahon a naglaon iti almires.

Isu met a sumungad ti gobernador. Isu met la gayam a kasta unay ti paragsitna itay nga agimbabagkat ta napakadaanna ti isasangpet ti gobernador.

“Dakayon sa metten ti nagbagkat Mar?” impasungad ti gobernador a bigotilio.

“Ay wen, Gob. Tinulonganmin a dagitay taga-Tourism Office. Daytoy laengen a kahon ti nabati. Impasnekmi ti nagbunag ket,” sipapardas nga insungbatna.

“Ala bagkatem ngad daytan ta intay pay agmerienda,” kinuna ti gobernador a  bulonnan ti simrek iti mall. Uray la makadiwdiwig ni Mar a nangisaruno iti bitbitna a kahon. Napaisemak a nakakita iti idiarna.

“Gunggonana ta pumapel met ngamin,” inyarasaas ni Boggie.

“Tagtagari, ‘yagawam ketdi ket adda ditan tay stomach progress,” kinunak laengen nupay umanamongak iti kinuna ni Boggie. Gunggonana.

Nagdardaras ti gobernador a rimmuar iti mall apaman a nalpas ti opening ceremony ti trade fair. Segun iti sekretariana a nagbati iti information desk adda mitingda kadagiti padana a gobernador.

“Ket pagyananmi ngarud ita, ading?” dinamag ni Mar.

“Mapankayo lattan iti Legend Villas, manong, ta isu ti asideg ditoy Megamall,” insungbat ti sekretaria.

“Asino ngay ti mangbayad, yo’?” daras insippaw ni Mar.

“Ay, wen gayam abunaranyo lattan, manong, ta kuna itay ni Gob. nga inton bigaten ti panangitedna iti pagbayadyo agraman tay alawansyo. Talaga ngamin nga agdardaras itay,” kinuna manen ti sekretaria.

Tumanabutob ni Mar idi addakamin iti dalan nga agturong iti hotel.

“Agbannog la ngarud dataon, problemaen pay la ti pagyanan. Di pay la nangted ti banget a sekretaria ta isunto ti dumawaten ken ni Gob,” imbanang-esna.

Namrayanmi lattan ti nagulimek. Ngem agingga a nakaalakamin iti kuarto, pulos a saan a nangasut ni Mar. Sangsangaributayon a kunak itay ngem talaga a batongol a napekpeklan ti loko. Kapilitan a nagbingayanmi ken ni Boggie ti inyabunarmi iti tallo ribu a bayad ti maysa nga aldaw a panagyanmi iti hotel. Isu met ngad ti immuna a nagpili iti kama a pagiddaanna idi makastrekkami iti kuarto. Dinagdagusna pay nga inalikumkom dagiti shampoo ken sabon iti banio. Remembrancena kano.

(Adda tuloyna)