Footer

SARITA: Mar Plogo, Mediaman (Umuna a paset)

Naisem ni Mar Plogo a nadatngak iti opisina iti dayta a bigat ti Lunes. Kas iti sigud nakaaruat daytoy iti polo a manglabonglabong ken cargo pants a dumanon san iti tumeng ti puklona no labsen ti agsarita. Kastoy ti nakairuamanna a bado ta kastoy kan ti uso idi isuna ti barito. Hiphop. Numona ta pamutsugen a kasla ken ni Andrew E.  In-inauna ngem siak iti lima a tawen iti edadko a duapulo ket tallo. Ni Mar ti kangrunaan a reporter ti estasion ti telebision a kukua ti gobierno probinsial ti Capangsuan. Nadanonkon ditoy idi sumrekak a kas field reporter idi kanikadua a tawen a panagturposko iti kursok a Masscom. Napaadda daytoy nga opisina tapno agpaay a media arm ti kapitolio a mangipakaammo kadagiti aktibidad ti gobierno probinsial.

“Mayat sa ti bigbigatmo, boss. Napagustuanka ngata ken ni baketmo idi rabii, he! he!” inkablaawko a bulon ti pananglukatko iti kompiuter iti rabaw ti lamisaanko.

“Nakarkaro pay ngem iti impugtom, Yoyong,” inkiddayna nga insungbat. “Nagpalaba ni Mayor Umbalin idi rabii sa nangted iti dua “ilgat”. Nagpalaba ti awag dagiti taga-media ditoy Capangsuan no kasdiay nga agisagut iti babai tay mapresscon a politiko. “Ilgat” kunami met iti sangaribu.

“Apo, nagmayaten. Dika la nagayaben ta nairamanak koma met, boss,” urayko la insul-oy a kinuna. “Kakaisuna nga adda diay Libya ni baketko.”

“Awan ngamin lod tay selponko, yo’. Maminsanto,” kinuna ni Mar. Agsagsagawisiw a timmallikud a nagturong iti bangir a kuarto nga ayan ti studio.

Napangilangilak a nabati. Daytoy ti ugali ni Mar a saan a magustuan dagiti kakaduami iti opisina. No adda pagsayaatan, ultimo nga ibagana kadagiti kakaduana. Para kenkuana, basbassit ti makaammo,  napimpintas ta dakdakkel met ti mabagina. Ngem no isu ti pangiyarasaasam iti agpainterbio a politiko a kayatna ti agpapogi, awan napaspaspas ngem ni Mar. Isu nga isu ti umuna iti pakapasamakan ti presscon.

“Maammuan la ni baketmo a simmakayka’t sabali, loko, ta kitaek no dina ikamat tay armalite ni katugangam,” intanabutobko.

Wen, nalaing iti no ania la ditan a raket ni Mar Plogo ngem no ni baketna ti agsao, dagus nga agkurno. Iti naminsan nga ipapanko iti balayda, naranaak pay a nakasango iti batia. Aglablaba idinto a ni baketna ti nangpastrek kaniak. Naladawen tapno maiwagsakna dagiti labutab ti sabon iti imana ta addaakon iti likudanna idi ibaga ni baketna ti kaaddak.

Saan pay a makaporma ken ni katuganganna a retirado a polis ta makikabkabbalayda laeng. Istoria dagiti cameraman a nadanonko ditoy nga inkasaan ni katuganganna iti M16 gapu ta nagpulong ni baketna nga adda kulasisina. Nagtartaray kano idi iti butengna ti loko a napan nagpa-blotter.

Apagisu a malpasko ti skrip ti programak a pakailanadan ti agbinulan nga accomplishment ti gobierno probinsial idi simrek manen ni Mar iti opisina. Nalabit a nalpasen ti pangbigat a programana a Patangan Mangngaggo.

“Ania dayta obram, Yoyong?” dinamagna a bulonna ti immasideg iti lamisaanko.

“Tay man iskrip ti Government in Action, boss.”

“Ay wen, lalaingem dayta intedko a programam. Dayta ti pangrugian ti breakmo. Kitaem ket adun ti makaammo kenka, Yoyong, sipud iniggamam dayta a programa,” intapikna iti abagak idinto a saan pay laeng a naikkat ti makaali nga isemna.

Diak lattan nagtagtagari ta ammok met ti pudno a makagapu no apay nga impasana kaniak ti programa. Kinuna ni Boggie a cameraman nga impasublatna kaniak daytoy ta kayatna ti ag-play safe. Adda kan ngamin mangibagbaga a nasaysayaat no ibbatanna ti programa tapno uray agsukatton ti administrasion, saanto nga ipapaigid dagiti alipores a sumukat a mangidaulo iti probinsia. Nayatak met a nangsippaw ta agsabalikami met iti panirigan ken ni Mar. No mapapintasko ti programa, ay ket gundawaykon nga aglatak. Di kad’ adunto metten ti agpainterbio kaniak a politiko. Sa ket maysa, diay met la ag-voice over idi ti obrana ta siak met ti pagsuratenna iti iskrip no kasdiay nga agpambar a mapanna kitaen ni baketna a dandani idin aganak. Di kad’ nasurok tallo a bulan a pinagpampambarna ti panagbantayna no kasdiay a sumro ti sasadutanna a sumrek. Nalukay met  dagiti mangimaton iti pagtaym-inan ta ipalubosda uray inaldaw a “field” ti isuratna iti batog ti naganna no kasdiay a mapan agtime-in iti bigat. Bulonnanton ti di sumrek nga agmalmalem.

(Adda tuloyna)