Maysa nga aldaw iti biag ni Juan Bangaoil, mangisursuro (Tuloyna)

Ngem agurayka, tila pappapanan ti saritaanta.  Daytoy panagbalinmo a mangisursuro ti panunotenta.  Ad-adda a makaited inspirasion daytoy kadagiti tattao.  Ammom aya, no addanto ketdi gundaway a makitadaka ti Maalaala Mo Kaya?  Naks, nagngaton ti arapaapmo!

Musta ngatan ni Imelda?

Uy, malagipmo latta ti sigud a gelprenmo.  Ala, ania ngarud no dikayo nagkagasat, kasta la ti biag.  Adda ngarud  arapaapna, ket karbenganna a tungpalen ken ragpaten dayta.

Di met la ngata parigrigaten ti nagbalin nga asawana?

No siak ti pagdamagam, haan met ngata, ngamin,  nasingpet met ni Rodel a pagayammo a naasawana. Isuna laeng a,  ta dina la ketdin inikkan pateg ti panag-classmateyo.  Nakitana laeng ni napudaw nga Imelda,  nga uray la dumerderosas ti pingpingna ket nupay medio bukeng, inaremna metten.

Daytoy met Imelda a kailiam ken classmatemo iti Edukasion, napadasanna laeng ti naglugan iti XRM, ayna, ginanasna metten ti simmursurot kenkuana.  Ket iti panagkuykuyogda iti baybay, nalipatannaka ket nagpayagos iti bara ni Rodel.

Huhum, bay-am man dayta, ti napateg ket naragsak ni Imelda.  Kayatna ngarud ti tagababa, di isun. Di bale, damagmo met a maysan a mangisursuro iti central school iti nakaikamanganna.

Uray ket adda mammet dagiti padam a mangisursuro iti Dinwede. Kas koma ni Ma’am Krisanta.  Kasla Alma Moreno, kunam man.

Apay ngay a mangisursuro ti innalam John, (uy, John pay gayam ti awagna kenka), ket mabalinmo ti criminology ta nabisked ta pammagim.  Mabalinmo pay ti tourism ta naguapoka met.

Naks, mayat met ti pasablogna kenka!  Mayat met tt tangar ta lapayagmo.

No makitkitak ngamin dagiti ubbing iti sitiomi, kayatko nga ilung-aw ida iti kinarigat ti panagbiag. Idi agbasbasaak, tunggal tawen nga agsukat ti maymaysa a maestrami. Adda pay idi, grade 1 to 4, maymaysa ketdin ti teachermi.  Kasla kanayon a mabalin a siglotan ti subsobna.  Nasayaaten no tallo ti mangisursuro ta dua laeng ti grade nga isurona.  Ta ania ngarud, dida met kayat agisuro didiay ayanmi.  Kaykayatda met agisuro iti Poblacion wenno iti ayan ti madanon ti lugan.

Nasaysayaat a ngarud idiay sentro.  Maysa a teacher iti tunggal classroom.  No dadduma, adda pay subject teachermi.

Isu ngata a nasirsiribka ngem siak. Ket apay nga education ti innalam?

Ni Mama man, gapu ta titser, isu kano met kaniakon.  Ania ket a busorkon!  Imbagak ngarud a Tourism ti kayatko wenno Banking and Finance, ngem kunana ketdin nga awan kano ti bangko iti upland.  Apay, Cervantes aya ti pagtrabahuak,  idiay baba, a.  Nagganas ket koman ti agtrabaho iti de aircon nga opisina.  Kasla nakangatngato ken nakataktaknengka man. Pumudawka pay.

Imbag man ta nayatka met laeng?

Wen, ngem por dios, diak la kayat ti mapan iti nalengleng a lugar a pagisuruan.  Imbagak ken ni Mama, idiayak Poblacion ket intono maka-innak, mangalaak iti masters degree sa mangalaakto iti eksaminasion para prinsipal, ket agbalinakto a district supervisor wenno nangatngato.

Ha! ha! nakakatkatawa, ta idi nag-aplaykayo, naaddaan iti tallo a bakante iti distritoyo ta  adda nag-retire a mangisursuro. Duakayon ken ni Krisanta kadagiti tallo a naayaban.

Naggiddankayo pay ken ni Krisanta a simrek iti opisina ti district supervisor, ket nakitam la unay ti panaglabagana idi imbaga ti superbisor nga idiay Dinwede ti papananyo.

Agsipud ta lalakika, ta manmano ngarud ti lalaki a mangisursuro, ken nangatngato ti puntosmo (kitaem laeng man aya, adda gayam nayon ti puntos iti panagayat iti literatura), sika kano ti teacher-in-charge.

Madi kayat koma idi ni Krisanta, ngem no palabsenna daytoy a gundaway, mabatin isuna.

Idi imbaga ti superbisoryo a no addanto baro a mangisursuro a sumrek iti sumaruno a panagbabasa, mabalindanton ti pumanaw ditoy. Iti kinuna ni ‘bisoryo, naawatamon no apay a pumanawda iti pagadalan iti barangayyo—kas met la gayam ti adda iti panunotmo—kayatda met nga iti bukodda a lugar ti pangisuruanda.

UY, addaka gayamen iti Maslong. Ti laengen Pas-adan ti daliasatem ken dua a bantay laengen ti sang-atem ket makadanonkanton.

Diakto pay la ngamin nag-rubbuat idi kalman.  Parparbangonek ketdin ti magmagna ditoy. Makasalawakto la ngata iti beklat.

Isu met ti kunkunak, ngem ania ket ngamin ti napanu-notmo ta impadpad-engmo pay laeng ti nagrubbuat. Ania ngarud ita, uray nalamiis ti parbangon ket agling-etkan.

Ayna, no maangotnakanto ni Ma’am Krisanta, agmisuotto man la ngatan. Kiddelennakanto manen.

Dandanin sa magaw-atmo ti pagrukodanna.  Bareng, ag-wen met laengen.

Ha-ha, mayat sa ketdi a bayat nga inka manglaglagip iti nakiro a napalabas ket isadagmo dayta likudmo iti nagrungarong a ramot ti akasia.  Wen, kabaelam pay met ti magna, ngem mayat met no irelaksmo bassit dagita piskel. Danggayamto metten ti panangsukogmo iti rupa ni Ma’am Krisanta iti parparmatam.

No tinapayka koma, ni Ma’am Krisanta ti kape a napaksit a bagas a mangpalukneng kenka!

(Adda tuloyna)