SARITA: Nadaraan a Linnaaw (Maika-10 a paset)

INYAYAB ti konduktor ti iluluganen dagiti pasahero ta agandaren ti bus. Immuli ni Padre Cristobal.

Nagandar ti bus. Madamdama, rumrummuaren iti terminal.

Pinasikigan ni Padre Cristobal a kinita ti lalaki iti tienda. Adda kapatpatang daytoy iti pagarupenna a walkie-talkie. Ad-addan a napatalgedan ti suspetsana a militar ti lalaki.

Ngem idi agangay, kinuti ni Padre Cristobal ti abagana. Ania koma ti pagamakanna no sipsiputan ti militar? Awan ti ar-aramidenna a maibusor iti linteg.

Nupay kasta, kasapulan ti panagannadna. No agpayso a sipsiputan ti militar dagiti tignayna, masinunuona nga adda suspetsada nga agir-iray iti kannigid. Dayta ti dina kayat a mapasamak amangan no maisagmak. Addan dagiti nadamdamagna a dadaulo dagiti grupo a tumultulong kadagiti marigrigat a sabali ti nagawatan ti militar ket mapapati nga isuda ti adda iti likudan ti panagpukaw wenno pannakaipalnaaw dagitoy.

Madamdama, un-unorenen ti lugan ti akikid a dalan a kasla naibaut nga uleg iti bakras ti bantay. Iti baba, kasla nakanganga a buaya ti nauneg a derraas. Naakasen dagiti angep iti muging dagiti bantay.

Immanges ni Padre Cristobal iti nauneg ket imbakalna ti panagkitana kadagiti buya a malabsanda. Aglanglangay dagiti sabong a naidarnap iti igid ti dalan iti nalailo nga apros ti pul-oy. Agpikpikapik dagiti sanga dagiti saleng iti appupo ti nadungngo a dakulap ti init. Agar-arasaas ti baresbes iti salinong dagiti natayag a kayo-bantay. Naisipna: tunggal nabiag, adda kaibatoganna a langit!

Nalabsanda ti Bugnay. Saanen a kuminnit ti lawag ti init. Agsalogen ti bus. Timmaliaw ni Padre Cristobal iti daya, iti pattapattaenna a yan ti Begnas. Kasla nagilad a higante ti bantay iti lulonan ti Begnas. Dita ti pagtataudan ti danum a kumamang iti Karayan Ambatan a dumanon iti  patad. Sino ti mangipagarup nga iti daytoy nakaul-ulimek ken nakasulsulinek a lugar, arig paraiso a di pay natulawan ti birhen a kabakiranna, ket adda umas-asibay a riribuk a no saan a malapdan ket pakaibuyatan dagiti dara?

Asidegdan iti Legleg. Mataldiapannan ti tuktok ti kampanario. Tumanaltag ti lugan iti dalanenna a kabatuan a kalsada.

Iti nagpikuran, dua a lalaki ti malabsanda. Nagkuretret ti muging ni Padre Cristobal idi mailasinna da Ama Dalmeg ken maysa a kalugaranna.

Pinarana ti bus ket dimsaag.

“Papananyo, Ama Dalmeg?”

“Umaydaka koma kitaen, Padle.”

“Apay kadi?”

“Agpakuyogkami koma a mapan ken gobelnadol. Dikami payen makaasideg iti kalayan agdigos ken aglaba ta gualdiado. Adda almasda. Adda kano bilin a paltoganda ti agbasakbasak iti asideg ti maluglugian a penned.”

“Kagapgapuk idiay kapitolio. Awan ni gobernador. Uray da bise ken dagiti bobokal, awanda,” kinuna ni Padre Cristobal.

Nalpay ti abaga ni Ama Dalmeg. “Saan san a maigawid ti lilibuk iti lugalmi, Padle. Kayaten dagiti kalugalak a makilupakkami.”

“Adda payen dagiti nagtagialmas nga um-umay iti pulokmi. Damagmi a tao ni Mayol Aguimbag. Mabutbuteng payen dagiti kalugalanmi iti al-alamidenda, Padle,” kinuna ti kadua ni Ama Dalmeg.

“Idi kalman, dandani nakilupak ni Palwew gapu ta inaplosan ketdin ti maysa nga almado ni Liway. Naimbag ta naigawidko. Ngem ti diak nagustuan, nagipangta ketdin nga adda dakes a mapasamak kadakami,” kinuna ni Ama Dalmeg.

“Kas nasaok idin, saan a kasapulan ti dinadarasudos nga addang iti daytoy a problemayo. Masapul a risutentayo ti problema babaen ti nainkappiaan a wagas.”

“Ngem kaanonto, Padle? Sakamto agkuti inton naipatakdelen ti penned?”

“Aggawid kano ni gobernador inton kanikadua nga aldaw. Agkukuyogtayo a mapan dumatag kenkuana. Dawatek a yuraytayo kadin ti gobernador.

“Ala, no kasta ti kunam, Padle. Ngem no awanto ti banagna ti gagalatayo, saanko a maikali ti sumaluno a mapasamak,” nakuna ni Ama Dalmeg.

“Nalinteg a tao ti gobernador. Mangnamnamaak a denggenna ti ararawyo,” kinuna ni Padre Cristobal.

Inyawis ti padi ti panagkukuyogda kada Ama Dalmeg a mapan iti kapilia tapno agpasarda pay sadanto aggawid.

“Saanen, Padle. Malabiankami unayen. Amangan no masalawmi iti dalan dagiti nabalbaltek a soldado wenno bumusbusol iti tulay,” kinuna ni Ama Dalmeg.

“Ikarim a dikayo mangparnuay iti riribuk agingga iti saantayo a makapatang da gobernador,” pinisel ni Padre Cristobal ti takiag ti panglakayen ti Begnas.

“Wen, Padle. Kalik dayta,” insungbat ni Ama Dalmeg.

Kasla nabuttuonan ti saka ni Padre Cristobal bayat ti panangpanunorna iti kalsada a kumamang iti kapilia. Panagriknana, kasla naipabaklay ti lubong iti abagana.

Nagkarayamen ti sipnget iti nakipet a siledna. Impusotna ti bagina iti palangka sa nagkidem. Binay-anna a lapunosen ti ulimek ti kinataona agingga iti nagin-inut a nagares-es ti irteng ti riknana.

Kellaat a nagmulagat idi simrek ti gilap iti siledna.

Naggapu ti gilap iti ikub ti kakaykaywan iti daya!

Simmapideng ni Padre Cristobal iti abay ti tawa. Pinatademna ti panagkitana.

Madamdama, adda manen nagkilap manipud iti kabakiran ii daya. Masinunuonan a flashlight ti pagtaudan ti kilap. Mangnganup? Saan! Maysa a senias ti panagkilapkilap ti flashlight!

Immakar ni Padre Cristobal iti akin-abagatan a tawa. Inin-inayadna nga inlukip ti tawa. Sinabat ti mangliwengliweng a sipnget. Impasirna ti panagkitana iti masanguanan, iti namnamaenna a nakaiturongan ti lawag ti flashlight.

Adda nagkilap a lawag iti pideg ti maysa a kayo. Pudno ti suspetsana. Adda kasensenias ti tao nga adda iti daya.

Inurayna ti panagkilap manen ti adda iti masanguanan. Ngem awanen ti naurayna. Nakangeg ketdi iti nakapsut a rippiis ti napayatan a ruting sa ti mangliwengliweng nga ulimek.

Inrikep ni Padre Cristobal. Nagkarenken ti mugingna.  Ania ti kayat a sawen dagiti senias? Uray ditoy konbento, adda mangsipsiput kenkuana?

(Adda tuloyna)