SARITA: Nadaraan a Linnaaw (Maika-11 a paset)

Nagkarayamen ti sipnget iti nakipet a siledna. Impusotna ti bagina iti palangka sa nagkidem. Binay-anna a lapunosen ti ulimek ti kinataona agingga iti nagin-inut a nagares-es ti irteng ti riknana.

Kellaat a nagmulagat idi simrek ti gilap iti siledna.

Naggapu ti gilap iti ikub ti kakaykaywan iti daya!

Simmapideng ni Padre Cristobal iti abay ti tawa. Pinatademna ti panagkitana.

Madamdama, adda manen nagkilap manipud iti kabakiran ii daya. Masinunuonan a flashlight ti pagtaudan ti kilap. Mangnganup? Saan! Maysa a senias ti panagkilapkilap ti flashlight!

Immakar ni Padre Cristobal iti akin-abagatan a tawa. Inin-inayadna nga inlukip ti tawa. Sinabat ti mangliwengliweng a sipnget. Impasirna ti panagkitana iti masanguanan, iti namnamaenna a nakaiturongan ti lawag ti flashlight.

Adda nagkilap a lawag iti pideg ti maysa a kayo. Pudno ti suspetsana. Adda kasensenias ti tao nga adda iti daya.

Inurayna ti panagkilap manen ti adda iti masanguanan. Ngem awanen ti naurayna. Nakangeg ketdi iti nakapsut a rippiis ti napayatan a ruting sa ti mangliwengliweng nga ulimek.

Inrikep ni Padre Cristobal. Nagkarenken ti mugingna. Ania ti kayat a sawen dagiti senias? Uray ditoy konbento, adda mangsipsiput kenkuana?

NASAPA a bimmangon ni Padre Cristobal. Timmamdag iti tawa. Nanglangeb iti daya, pakpakauna ti sumangbay a bayakabak.

Nasayaat met no mangrugin ti matutudo tapno agngudon ti kalgaw, immapay iti panunotna. Nakaro ti pudotna iti daytoy a kalgaw. No palausen ti manarita, laneten ti pudot dagiti bulong.

Daytoy kadin ti pagilasinan ti panagbalbaliw ti klima iti lubong? Inab-abuso ti tao ti nakaparsuaan ket agibales metten daytoy.

Kas iti nabasana iti maysa a pagiwarnak a rumungrungsot dagiti bagyo iti tiempo ti matutudo ken iti nakarkaro nga igaaw iti tiempo ti kalgaw.

Nagkidem ni Padre Cristobal sa immanges iti nauneg tapno paksiatenna dagiti pampanunotenna. Innalana ti rosario iti rabaw ti bassit a lamisaan sa nagkararag.

Bimmaba kalpasan ti panangidalimanekna iti siledna. Pinaisaganana ken ni Mang Tomas ti kabaliona. Panggepna ti mapan iti Bugnay tapno ammuenna no nakumpleton da Manang Lucing ti nagpapirma iti petision a mangkonkondena iti panaglukat ti beerhouse iti barangayda.Agkukuyogda kada Manang Lucing a mangidatag iti petision iti opisina ni Mayor Aguimbag.

Namnamaenna a maysa manen daytoy a siit a mangipalay iti saan a nasayaat a langenlangenda ken ni Mayor Aguimbag. Ngem saanna met a maitulok nga agtuloy ti beerhouse nga ammona a puon ti pakarakrakan dagiti pagtaengan ken pakairareban dagiti agnaed iti immoralidad.

“Awan kadi ti nadnadlawmo idi rabii, Tata Tomas?” inamad ni Padre Cristobal.

“Adda immas-assibay a tattao idi rabii, Padre,” kinuna ni Tata Tomas. “Inur-urayko ida nga agtimek ngem immar-arubayanda laeng.”

“Saan ngata a dagiti kakadua?” Kakadua ti awagda kadagiti kabusor ti turay.

“Sabsabalida, Padre. No dagiti kakadua, nagpakaammoda koma. Panagkunak, agsisiimda. No asino, dayta ti diak ammo.”

Saanen a nagtimek ni Padre Cristobal. Nabayag a nagtayyek iti utekna ti imbalikas ni Tata Tomas. No adda sisiimen dagiti immar-arubayan idi rabii, awan duadua nga isu ti puntiriada. Ngem ti dakkel a saludsod, asino dagitoy? Militar wenno kabusor ti turay?

Nagrubbuat ni Padre Cristobal kalpasan ti pammigat. Binilinna ni Tata Tomas a saan a pumampanaw iti kapilia amangan no adda maidaw-as a mangbirbirok kenkuana.

Iti tapaw ti umuna a turod, pinagsardeng ni Padre Cristobal ti kabaliona. Inwarasna ti panagkitana iti aglawlaw. Anian a nagdaeg ti nakaparsuaan iti panangdayas ti timmangkayagen nga init. Nakaparsuaan a masinunuona a mapugipog no saan a malapdan ti panagabuso dagiti tattao.

Nasaripatpatanna ti tallo a lallaki a nagtagigayang a sumalsalog iti nagkurusan ti dalan. Inabog ni Padre Cristobal ti kabaliona ket sinabatna dagiti lallaki. Nailasinna ni Palwew iti sanguanan.

“Papananyo, Palwew?” sinaludsod ni Padre Cristobal.

“Iti Bugnay, Padle,” insungbat ni Palwew. “Kuna ni Balaweg a tiniliw dagiti polis ni Ama idi labii.”

Tinaliaw ni Padre Cristobal ni Balaweg. Kadua ni Ama Dalmeg ni Balaweg a nagpa-Legleg idi kalman.

Iti panangisalaysay ni Balaweg, nasalamaanda ti grupo dagiti polis ti Bugnay nga agpatpatrolia iti asideg ti beerhouse idi rabii. Sinita ida dagiti polis no apay nga addada nga agwalangwalang iti dalan ket dandanin alas nuebe iti rabii.

Impalawag kano ni Ama Dalmeg a narabianda iti dalan iti panaggapuda iti Legleg.

Ngem imparupa kano ti pannakapangulo ti patrolia nga espiada dagiti kabusor ti turay. Ginammatanda ni Ama Dalmeg. Nagtaray ni Balaweg a simpok iti karunoan. Pinakamatan dagiti polis iti bala.

Gumaniteb ti pispis ni Palwew. “Agpalpalikna kaniak nga adda dakes a napasamak ni Ama, Padle!” nakunana.

(Maituloyto)