SARITA: Nadaraan a Linnaaw (Maika-12 a paset)

“Nailasinyo dagiti polis?” dinamag ni Padre Cristobal.

“Saan, Padle. Ngem nakaunipolmeda iti polis.”

Gumaniteb ti pispis ni Padre Cristobal bayat it panangpanurnorda iti panglintegan a desdes. Dakes ti agparparikna kenkuana.

No pudno nga adda mangsipsiput iti garawna, posible met a karaman ni Ama Dalmeg, nangruna ket saanen a palimed ti isusupiatda iti pannakapenned ti Karayan Ambatan.

Makasiniten ti darang ti init idi makagtengda iti Bugnay. Nadaripespesdan iti ling-et. Nagtarusda iti munisipio.

“Mabalin a kasarita ni Ama Dalmeg, hepe?” kinuna ni Padre Cristobal. “Ditoy kano ti nakaipupokanna.”

“Awan ti Ama Dalmeg a nakabalud ditoy, Padre,” insungbat ni Hepe Banag.

“Tiniliw kano dagiti polismo idi rabii.”

“Awan ti binaonko a mangtiliw ken ni Ama Dalmeg, Padre. No adda nangtiliw kenkuana, saanko a polis. Nanglimlimoda la ketdi.”

Nagkinnita da Padre Cristobal ken ni Palwew.

“Di la mabalin a kitaenmi ti pagbaludan?” kinuna ni Padre Cristobal.

Kawaw ti pagbaludan nga impatuldo ni Hepe Banag.

“Mamatikan, Padre?” ingngirsi ti hepe.

“Nangilemmenganyo ken ni Ama?” gimluong ti timek ni Palwew.

“Agtalnaka, Palwew!” inlapped ni Padre Cristobal. Ginuyodna ti agtutubo nga inruar iti munisipio.

“Saan ngata a dagiti bumusbusor iti turay ti nangtiliw ken ni amam?” nakuna ni Padre Cristobal.

“Saan, Padle. Am-ammok ida. Nabayagen nga uy-uyotandakami a tumipon kadakuada.”

“Awan ti nadnadlawyo nga umas-assibay iti purokyo lalo iti kaltaang ti rabii?

“Adda nadakamat iti naminsan ni Ama a kasla nangsulsulot kenkuana idi napan nagkammel iti kalayan. Imbagak a saanen a lumlummual ta mabalin a delikado ti biagna gapu iti isusupiatmi iti pannakapenned ti Kalayan Ambatan ngem dina kayat a kasla billit a maitangkal iti bukodna a lugal. Isu a no lummual ni Ama nga adda papananna nga adayo, pakuyogak latta iti kapulokanmi a kaduana. Ngem awan met ti naalamidanda… dida naikaluya ni Ama!” nagbanarbar ti timek ni Palwew.

“Agkararagta iti Dios nga awan ti dakes a napagteng iti amam,” pinisel ni Padre Cristobal ti abaga ni Palwew.

“No adda dakes a napasamak ken ni Ama, madalaan ti kabambantayan, Padle!” minesmesan ni Palwew ti pikana.

“Saan, dimo panunoten dayta!” nakuna ni Padre Cristobal.

Awan arimekmekda bayat ti pannagnada. Saanen a ti kalsada ti sinurotda no di ti desdes nga agpadaya. Nasang-at daytoy ngem daytoy ti panglintegan a kumamang iti Begnas.

Agsasallupang dagiti saludsod iti muging ni Padre Cristobal. Sino ti nangtiliw ken ni Ama Dalmeg? Adda ngata pakainaigan ti maar-aramid a penned?

Agligsayen ti init idi matuparda ti purok ti Begnas. Agsaraawen ti tian ni Padre Cristobal.

Nagsarimadengda sada nagkikinnita idi makadap-awda iti purok ket nasaripatpatanda dagiti lallaki a nagaarimutong iti sanguanan ti kalapaw da Palwew.

“Ni Ama!” naiyebkas ni Palwew ket nagtaray a nanglasat iti panglawaen a paraangan.

Nangwaknit dagiti pumurok. Nairteng ti rupada a naiturong kada Padre Cristobal.

Sinabat ida dagiti dung-aw idi makatadogda iti kalapaw. Ar-aribungbongan dagiti babbai ti maysa a bangkay. Ammo lattan ni Padre Cristobal a ni Ama Dalmeg ti sangsangitan dagiti babbai.

Nagparintuod ni Padre Cristobal iti sakaanan ti bangkay a naipaidda iti inakilis a papag. Agkukurus dagiti sugat iti dagadaga a rupa ni Ama Dalmeg. Nagbalay ti dara iti kannigid a paset ti barukongna a sinalput ti bala.

“Nakasarakanyo?” inamadna.

“Iti asideg ti maal-alamid a penned, Padle,” insungbat ti napagsaludsodan.

“Itagbatko iti bato, ibaleska, Ama!” nagtupa ti sangi ni Palwew.

Nakitem ti bibig ni Padre Cristobal idi ibakalna ti panagkitana iti labes dagiti bantay iti daya. Agaarimutong dagiti nangisit nga ulep iti tangatang.

Napagtengen ti kinabutbutengna a mapasamak. Iti pannakapapatay ni Ama Dameg, saanen a maigawid a madaraan manen dagiti linnaaw!

(Adda tuloyna)