SARITA: Nadaraan a Linnaaw (Maika-13 a paset)

MINULENGLENGAN ni Padre Cristobal ti nagmanto a langit. Nakatangtangken ti sipnget a nangsallukob kadagiti kabalbalayan.

Naapirasna ti krusipiho iti barukongna. Siak ti Silaw! Siak ti dalan! Ngem apay nga adu ti bulsek iti Lawag? Apay a di mabilang ti naiwawa iti nalinteg a Dalan?

Bisperas ti pannakaidulin ti bangkay ni Ama Dalmeg ket arig pagpiestaan ti panglawaen a pannakaparaangan ti purok. Nagsangpeten dagiti kakabagian ti lakay manipud iti kabangibang a purok ti Begnas ken uray iti Montaniosa ken Abra.

Nakalawlawag ti sentro ti paraangan a silsilnagan ti temtem. Nakamasngaad iti aglawlaw ti temtem dagiti lumugar ken kakabagian ti natay. Aggiinom dagiti panglakayen iti tapey bayat ti panagurayda iti batangda nga agbaya-o.

Manipud iti kalapaw a yanna, nalawag a mangeg ni Padre Cristobal ti panagbaya-o dagiti kapatadan ni Ama Dalmeg. Uray no saanna unay a maawatan ti baya-o dagiti lallakay, maitarusanna ti bagasda: panagdayaw ken panagraem iti kinatao ti natay. Maysa a mapagtalkan a gayyem ken matalek a panglakayen ti purok.

Kasla napaksuyan ni Padre Cristobal a nangipusot ti bagina iti tugaw. Nagkidem. Ngem kasla naipinta iti panunotna ti nakas-ang a pannakapapatay ni Ama Dalmeg. Saan a makalibak dagiti sugat ni Ama Dalmeg, pinarigat dagiti kriminal sakbayda nga inwalang.

Rimmuar ni Padre Cristobal iti kalapaw. Napan nakitungtong iti ummong dagiti lallakay.

“Adda kadin tiniliw dagiti polis, Padle?” sinaludsod ti maysa a panglakayen.

“Awan pay suspetsa, Ama,” insungbat ni Padre Cristobal.

Kinapudnona, kapaminduanan ti napan iti police station iti Bugnay tapno ammuenna no ania ti resulta ti panagimbestiga dagiti polis. Ngem negatibo ti inbestigasion. Malaksid ken ni Balaweg a nakasaksi iti pannakatiliw ni Ama Dalmeg, awanen ti sabali a tumakder a mangted iti impormasion no asino dagiti kriminal.

Sino dagiti pimmatay ken ni Ama Dalmeg? immapay manen iti panunot ni Padre Cristobal. Suspetsana nga adda pakainaigan iti maipatpatakder a penned ti pannakapapatay ni Ama Dalmeg. Saan a mapnek iti agdama a panagimbestiga dagiti polis. Panagkitana, maipadanto laeng ti kaso ni Ama Dalmeg kadagiti dadduma a krimen a saan a naikkan iti hustisia.

Nagpadispensar ni Padre Cristobal sa simrek iti kalapaw. Madama ti panagbaya-o ni Ama Macliing a taga-Legleg. Nakapaspasnek dagiti adda iti uneg ti kalapaw nga agdengdengngeg iti arig indaniw a panagbaya-ona.

Sinapul ti matana ni Palwew ngem awan a nakitana.

Rimmuar iti kalapaw. Binirokna ni Palwew. Masapul a kapatangna ni Palwew. Madi ti agparparikna kenkuana. Idi sumangpet iti purok kalpasan ti panaggapuna iti Bugnay, dina nagustuan ti buya a naimatanganna. As-asaen dagiti mannakigubat a lallaki dagiti igamda!

Nakitana ni Balaweg iti ummong dagiti padana nga agtutubo.

“Dimo la ammo no sadino ti yan ni Palwew, Balaweg?” inamad ni Padre Cristobal.

“Nakitak a bimmaba manipud iti pulok, Padle. Kakuyogna dagiti sumagmamano a kaduana.”

“Dina la naibaga kenka no papananda?”

“Saan, padle. Ngem nangegko a pagpapatanganda itay ti isasalogda iti Legleg.”

“A-apay?”

“Diak ammo, padle.”

Saanen a nagtimek ni Padre Cristobal. Nagbaw-ing ket nagsubli iti kalapaw a pagturoganna.

Ngem saan a makaidna  uray idi umad-adalemen ti rabii ket saan pay a nagsubli da Palwew.

Impusot ni Padre Cristobal ti bagina iti ababa a tugaw a kawayan a naipasanggir iti suli. Saanna a magustuan dagiti mapaspasamak. Adda la ketdi pangpanggepen da Palwew nga aramiden.

Kellaat, simmiplot iti panunotna dagiti balikas ni Palwew iti pannakapapatay ti amana.

“Ni la ketdi Mayol Aguimbag ti akin-utek ti pannakapapatay ni Ama!” Inalamidda dayta tapno agbutengkami a sumupling iti pannakapenned ti Kalayan Ambatan. Ngem kimat laeng ti di mabales! Addanto aldaw nga agpullo!”

Kellaat a napatakder ni Padre Cristobal. Rauten da Palwew ni Mayor Aguimbag!

(Adda tuloyna)