Footer

SARITA: Nadaraan a linnaaw (Maikanem a paset)

Nagpelles ni Padre Cristobal. Inkeddengna a kapatangna ni Mayor Aguimbag mainaig iti parikut dagiti taga-Begnas. Saanen a mabalin a yaleng-aleng ti parikutda. No saan a maikkan iti solusion a pakapnekan dagiti pumurok, amkenna ti mabalin a mapasamak.

Saan a ti munisipio ti tinurongna no di ti balay da Mayor Aguimbag. Nasigsigurado a makapatangna ti mayor iti balayna. Ad-adda nga iti balayna ti pagopisinaan ti mayor. Sa la mapan iti munisipio no mangmiting wenno agpirma kadagiti papeles.

Awan pay alas otso ngem nasuroken a sangapulo dagiti tattao a nadanonna iti pagurayan ti sangaili. Nagtugaw iti abay ti maysa a panglakayen kalpasan ti panangsungbatna dagiti kablaaw dagiti dadduma.

Di pay pimmudot ti tugawna idi adda intsik a simmangpet. Timmakder ti sekretario ket sinabatna ti sangsangpet. Nailasin ni Padre Cristobal ni Kao Tsing, negosiante nga intsik. Agkonkontrata ni Kao Tsing iti kalsada.

Inserrek a dagus ti sekretario ti intsik iti opisina ti mayor.

Isu kadi ti mangkontrata iti maaramid a kalsada a dumanon iti penned? simmiplot iti panunot ni Padre Cristobal.

Pinidutna ti daan a pagiwarnak iti nagtimbukel a lamisaan ket pinalabsanna dagiti damag. Ngem dinan intuloy ti nagbasa ta dandani pasig a pammapatay, hold-ap, ken anomalia iti gobierno ti linaon ti parupa a panid ti pagiwarnak.

Nayangadna ti rupana idi agranitrit ti ruangan ti opisina ti mayor. Nayula ti umis-isem a butiog nga intsik a salsallabayen ti mayor.

“Dimo liplipatan ti karim, Kao Tsing,” nangegna a kinuna ti mayor.

“Basta siak kali, sigulado, mayol,” insungbat ti intsik.

Naitangep ti ridaw. Pimmanaw ti sangaili.

“Mabalinmon ti sumrek, Father,” insenias ni Arnold, ti sekretario ni Mayor Aguimbag.

Nagyaman ni Padre Cristobal. Inlukatna ti ridaw. Inaprosan ti nalamiis nga angin ti rupana idi makadap-aw iti uneg. Nupay awan pay koriente iti ilida, aircon ti opisina ti mayor a papatauden ti dakkel a generator.

“Naimbag a bigatmo, mayor,” inkablaaw ni Padre Cristobal. “Immaykami idi kalman ngem nabannogka kano a nagbiahe.”

“Naimbag ta immayka, Father,” kinuna ni Mayor Aguimbag. “Kinapudnona, kayatka a kapatang ta adda report a dimmanon kaniak a sulsulbogam dagiti taga-Begnas tapno supiatenda ti pannakapenned ti Karayan Ambatan!

“Saan a pudno dayta, mayor,” kinuna ni Padre Cristobal. “Immasideg dagiti pumurok kaniak. Masakupan ti parokiak ti Begnas ket pagrebbengak a tulongan ida.”

“Ala, dita pagsupiatan dayta,” kinuna ti mayor. “Ngem kayatko a maammuam a nabayagen a proyektok ti pannakapenned ti Karayan Ambatan. No malpas ti penned, rinibu nga ektaria a kataltalonan ti mapasayakan. Saan la a dayta, addanton pangawidan iti koriente a pangsilaw iti ilitayo ken kaparangetna. Umadu ti apit ken pamastrekan.  Sumrek ti dadakkel a negosio. Rabakem dagita a pagimbagan!”

“Ngem malayus met dagiti pagtaengan ken talon dagiti taga-Begnas nga adda iti babaen ti maipatakder a penned, mayor.”

“Adda nailatang a disso nga akaranda. Maikkan pay tunggal pamilia iti nuang, arado ken tallo kaban nga irik. Ania pay ti sapulenda?”

“Ngem nakasulsulinek ti disso nga akaranda, mayor,” kinuna ni Padre Cristobal. “Kabakiran pay. Masapul nga  umaenda sakbay a makamulada. Ken maysa, dida kayat a mayakar ti kamposantoda. Tagidaksenda a masinga ti panaginana dagiti minatayda.

“Pammatida laeng dayta.”

“Agpayso, mayor. Ngem raementayo koma ti pammatida a kas  met ti panagraemda iti pammatitayo.”

“Kas ama ti ili, pagrebbengak nga ipaayan dagiti kailiak iti nadur-as a panagbiag, Padre Cristobal.”

“Uray mailidding dagiti babassit?”

“Kasingin ti panagdur-as ti panagsakripisio!”

“Ket dagiti taga-Begnas ti maidaton iti altar ti panagdur-as, kasta kadi, mayor?”

“Silsilmutam ti riribuk, Padre Cristobal!” timmangken ti timek ti mayor.

“Dakayo ti mangsilsilmut, mayor,” insungbat ni Padre Cristobal. “Kinibormo ti naulimek a panagbiag dagiti taga-Begnas gapu iti panangpennedmo iti Karayan Ambatan.”

“Dida koma agriri no dimo sinulbogan ida!”

“Itaktakderak laeng ti kalinteganda!”

“Paset kadi ti paglintegan ti simbaan ti panangsulisogmo a sumupringda iti pagayatan ti turay?” ngimmato ti timek ti mayor. “Kinaradikal daytan, Padre Cristobal!”

“Kinaradikal kadi ti mangirupir iti kalintegan dagiti babassit?” imbales ni Padre Cristobal.

“Dimo koma ibbusen ti pasensiak, Padre Cristobal. Ballaaganka. Dimon ituloy a sulbogan dagiti taga-Begnas. Madaksanka!”

“Ammok, nabilegka, mayor,” pinerreng ni Padre Cristobal ti mayor. “Asidegka iti dalikan dagiti didiosen ti probinsia. Maysa laeng a pitikmo, mabalinnak a pabalud. Ngem laglagipem a ti agus uray pennedem, aglippiasto ket surotenna ti dalanna!”

Saanen a nagbayag ni Padre Cristobal.

Sumungsungad pay laeng iti simbaan, addaytan ni Ama Crispin a simmabat.

“Adda nangbirbirok kenka, Padre,” kinunana. “Nakaluganda iti dyip.”

“Sinoda?” inamad ni Padre Cristobal.

“Dida met kayat nga ibaga ti  naganda. Idi maammuanda nga awanka, pimmanawda met la a dagus.”

“Siguraduek a saan a dagiti pasurot ni Mayor Aguimbag. Kagapgapuk iti balayda,” kinuna ni Padre Cristobal.

“Am-ammok dagiti badigard ni Mayor Aguimbag, Padre. Kabarbaro ti rupa dagiti nangbirbirok kenka. Panagkitak ket militarda.”

Nagkuretret ti muging ni Padre Cristobal. Ania a gapu a sapsapulen ti militar?

(Adda tuloyna)