SARITA: Nadaraan a linnaaw (Maikasiam a paset)

ADDA met laengen iti kabesera, inkeddeng ni Padre Cristobal a dumagas iti provincial capitol tapno idanonna ti problema dagiti taga-Begnas mainaig iti mairugrugi a pannakapenned ti Karayan Ambatan.

Mamati ti padi nga awan pay ti naidandanon iti gobernador mainaig iti daytoy a proyekto ni Mayor Aguimbag. Wenno saan a kumpleto dagiti impormasion a naited kenkuana. Patien ni Padre Cristobal a nailimed iti gobernador ti pannakapenned ti karayan Ambatan. Agpayso, iti naminsan, imparipirip idi ti mayor kadagiti maseknan a dadaulo ti taga-Begnas ken Bugnay mainaig iti proyekto ngem idi imbatad dagitoy ti saanda nga ikanunong agsipud ta maapektaranda unay, saanen a sinurnadan ti mayor. Ngem agparparang itan nga impagna ti mayor ti proyekto iti laksid ti pannakaammo dagiti lumugar. Ita, rugiandan ti penned iti baet nga awan ti konsultasion kadagiti agindeg.

Saan kadi a nalawag a panangliput kadagiti agindeg dayta?

Saan unay a nasinged ni Padre Cristobal iti gobernador. Manmano ti okasion a nakadakulapna ti gobernador. Ngem iti panagsalsaludsodna, naammuanna a nalinteg ti gobernador. Dina itulok a mailupitlupit dagiti umili iti masakupanna, nangruna dagiti agindeg iti sulsulinek a lugar. Dayta ti pangraraeman dagiti umili kenkuana.

Ngem ammo met ni Padre Cristobal a pagbaliwen ti bileg ken pirak ti kinatao ti maysa nga agtuturay. Adun nga agtuturay ti nakalipat iti nagtaudanda kalpasan a nakawesanda iti turay ken nasisirapda iti sileng ti pirak.

Adun ti naipalpalapayag kenkuana a madi a damag maipapan ken ni Mayor Aguimbag. Kasungani ti apeliedona ti kinataona. Maysa a turayen a di agpangadua a mangkugtar iti asinoman a balangan iti dalanna. Taga-patad ngamin daytoy, dina ammo a raemen ti nakaugalian ken kultura iti kabambantayan.

Babaen ti kinasikapna, in-inut-inot a natagikuana dagiti nalawa a kataltalonan iti Begnas ken Bugnay. Nangato ti tubo dagiti ipautangna kadagiti mannalon a ganagan, pestisidio ken dadduma pay a kasapulan iti talon. Adda daydi panawen a nagsasaruno a nabagyo dagiti apit dagiti mannalon ket saanda a nakabayad iti utangda ken ni Mayor Aguimbag. Limmubo ti anak ti utang dagiti mannalon agingga iti inilit ti mayor ti talonda. Ita, dagiti dati nga agtagikua dagiti talon, nagbalindan a makitaltalon.

Nataba ti kataltalonan kadagitoy a lugar. Dakkel ti maap-apit nupay agdepdependeda laeng iti tudo. Iti kanito a mapenned ti Karayan Ambatan, agbalin dagitoy a kataltalonan a kangrunaan a pagtaudan dagiti taraon, nangruna iti bagas ken nateng. Kadakkelan a mabenepisiaran ni Mayor Aguimbag.

Kapkapnekan ni Padre Cristobal a daytoy ti kangrunaan a nangiduron ken ni Mayor Aguimbag a sumrek iti katulagan iti maysa a pribado a kompania para iti pannakapenned ti karayan. Saan a ti pannakapataud iti koriente a mangsilaw iti Legleg ken kaparangetna a barangay ti kangrunaan a motibo ti nasao a proyekto no di ti pannakaawid ti danum a mangpalayas kadagiti kataltalonan ti mayor.

Kayarigan ti mayor ti nagpaltog iti dua a billit babaen iti maysa laeng a bala.

Immanges ni Padre Cristobal iti nauneg. Ammona a napuskol a pader ti mayor a narigat a dupiren dagiti panguluen ti Bugnay ken Begnas.

Masapul nga agkuti tapno saan nga agdur-as ti proyekto ita ta nasapa pay, nakuna ni Padre Cristobal iti nakemna.

Pinarana ti sumungad a traysikel ket nagpaitulod iti kapitolio. Asideg laeng ti kapitolio ngem nakaro ti trapiko ket adda dagiti dalan a one-way laeng isu nga imbes a manglinteg ti traysikel, aglikaw pay.

Dimsaag ni Padre Cristobal sa nagplete. Nagtakder iti igid ti kalsada sana tinangad ti natayag a pasdek. Kasla higante ti kapitolio a nangdeppa kenkuana. Dina maawatan no apay nga immirteng ti riknana.

Ngem awan a nairana ti gobernador. Adda kano nasken a tinamingna iti siudad. Leppay ti abaga ni Padre Cristobal a nagpakada.

Dimmagas iti opisina ti bise gobernador. Adu ti agur-uray a tattao iti ruar ti opisinana. Ngem awan pay ti bise gobernador. Segun iti sekretariona, adda programa a dinar-ayanna.

Iti pagopisinaan dagiti bobokal, nasaripatpatanna ni Bokal Orlino Manero a makipatpatang iti babai nga empleada. Ngem idi makita ti bokal, dagus a simrek iti opisinana. Saanen a rimmuar pay. Saan metten a nagtuloy ni Padre Cristobal. Nadlawna a kaykayakayan ni Bokal Manero. Napudot kadi unay nga asitgan dagiti agtuturay ti probinsia?

Inkeddeng ni Padre Cristobal nga aggawid laengen. Nangpara iti traysikel a mapan iti terminal ti kakaisuna a lugan nga agbiahe iti Legleg. Alas dose ti rubbuat ti bus iti bassit a terminal daytoy iti amianan ti tiendaan publiko.

Agan-andaren ti lugan idi dumteng iti terminal.

Lumugan koman ni Padre Cristobal idi mataldiapanna ti nabaneg a lalaki a nakatakder iti asideg ti bassit a tienda iti sanguanan ti terminal.

Nagkuretret ti mugingna. Nakakitaanna iti lalaki?

Malagipnan, idi naggapu iti taeng ti Arsobispo, nakitana ti lalaki a nakatugaw iti sirok ti mangga iti sikigan ti konbento nga agbasbasa iti pagiwarnak.

Kasta man met laengen idi rummuar iti kapitolio, nakatakder ti lalaki iti parkingan dagiti traysikelan.

Immagibas iti panunotna ti impalgak ti Arsobispo a panagsuksukimat ti maysa nga opisial mainaig kadagiti aktibidadna.

Sursuroten la ketdi ti lalaki! Maysa daytoy a militar?

(Adda tuloyna)