Footer

SARITA: NGEM AYAT TI KANGRUNAAN ITI AMIN (Maikatlo a paset)

 

Kasla bimmassit ti panagkita ni Marco iti bagina, ket kinunana a sipapakumbaba: “BWD, apo. meter reader….”

“Nagraira ti akyat-bahay ken salisi gang. Adun ti nabiktima ditoy purokmi. Nagsasaruno a rabii nga adda nauli. Iti aldaw met, adu dagiti sumsumrek lattan. Kunwari agilako wenno agindadamag ngem no awan ti tao, agtakawda. Isu nga agibuloskami iti asomi, a! Awan ti makaiparit kadakami, uray no dinnanogan nga agmalmalem no isu ti kayatda!”

“Sapay no di nagdadakkelda….”

“No masikbabnaka ti uray asino kadagita, tallo kilo a lasag ti malaplap kenka! Isu a dika aglokoloko no dimo kayat a kilawenda dayta rakrakipa ken dalemmo!”

Napatilmon iti angin ni Marco. No ti pingping ti ubetna ti masikbab, di pay ketdi awanen ti itugawna? Yad-adayom, Apo! naitanamitimna.

“Agunika ngamin a! Ken dika agiggem iti malo ta kangrunaan a kagura dagiti aso!”

“Pangdepensak lang met a iti bagik.”

“Pangdepensa? Iti kaanoman, saan a depensa iti aso ti malo. Kadagiti aso no adda iggemmo a malo, ipagarupda lattan nga isuda ti maluem, isu nga ad-adda a darupendaka. Unaandakan a saktan sakbay a saktam ida. Ikanawada met ti bagida ta adda riknada a masaktan.  Ibilang ti aso a kabusor ti tao a nakaiggem iti malo wenno bato.”

“Ala , ngarud, bossing, kuyogennakon iti metroyo ta basaekon. Ayna, apoya, ania la ketdin ti kastoy a trabaho, aya?”

“ANIA dayta papel nga iggemmo, Pari Lito? Memo?”

“Saan, Pari Marco. Resignation paper!”

“Nagikkatkan?”

“Wen. Saankon a maanusan ti trabahota a meter reader. Namitloakon a nakagat iti aso. Iti naudi, nadudog ti patongko iti kaiindieksion. Isu a sakbay a matayak iti rabies,  umikkatakon. Amangan no saan laeng a dagiti gurongko ti masikbab no di pay ti sapsapinak. Yad-adayom, Apo !”

Nanglangit ni Marco. “Nauyong met gayam dagiti aso iti aream.”

“Kasta ngarud, p’re. Agkaiwara pay dagiti bassit a bantay ngem makapilay,” nagkatawa ti parina. Naglinongda iti pataguab ti opisina ta kumanagkag ti agalas-onse nga init. Agalingasaw ti pudot ti sementado a Utility Road a kumamang iti DPS Compound. “Naumaakon.”

Immisem met ni Marco ta uray iti areana, agkaiwara dagiti rugit ti aso kadagiti alley, eskinita ken kalsada.

“Ipaypaysom a talagan?”

“Saanak nga agang-angaw, pari. Daytoy man ne, pinirmaanen ni bisor! ”

“Nakabirokka kadin iti sabali a sumrekam?”

“Drayber ti Victory Liner,” intudo ni parina a Lito dagiti bus iti garahe iti amianen-a-laud a likod ti BWD.

“Ne, naimbag man ta nakastrekka?”

“Agabaytayo met isu a naangotak ti bakante. Ammodak metten nga agmanmaneho iti delivery truck, isu nga inawatdak.”

“Awan la ngata ti bakante a konduktor, pari?

“Apay, umikkatka  metten?”

“Dayta ti panggepko, sakbay a matayak iti rabies.

“Damagekto. Para kenka.”

“ Ala , man, Pari. Iteksmonto man. Naumaak metten a makagkagat iti aso!”

NAGMULAGAT pay ken natnag ti toothpick nga ammal ti bisorda idi nabasana ti resignation paper nga effective to the end of this month. Nagliad daytoy ket kas iti nakaisigudanna, inaprosanna ti immaratiddog nga ubananen nga imingna.

“Nagistayanak manen nakagat idi kalman, sir…”

“Maawatak ti sentimientom.”

“Agyamanak unay iti kinaimbagyo kaniak, sir.”

“Ammom, kadakayo amin a meter reader, sika ti maysa kadagiti tallo a pagpilpiliak nga irekomendak a sumukat kaniak inton agretiroak. Awan ti rekordmo a madi ti kaaddam iti maintenance. Addaanka iti dedikasion iti trabahom. Iti credential, adayo ti nangitarayam kadagiti dua. Agpadada a 1st year college isu a nakurang ti ammoda iti office work. Marigatanda la ketdi nga agaramid iti report. Saan a kas kenka a graduadoka iti komersio. Nangato ti gradom iti civil service eligibility. Adda pay eksperiensam a nagiggem iti adu a tao iti panagtrabahom iti engineering and construction firm. (Time keeper ken agisagana iti payroll ti trabahona idi iti Rising Sun Engineering and Construction Services iti tallo a tawen sakbay a nakastrek iti BWD.) Pattapattak a kabaelam met ngata a superbisaranto ti duapulo ket innem a tao. No awan ti makibiangot a politiko, dakkel ti tiansam…” 

Nanglangit ni Marco.  Saanna a ninamnama daytoy nga impudno ti bisor.

“Tallo laengen a tawen, Marco, barok. Dimo kadi maanusan?”

Saan a nakatimek. Pinalabsanna ti tallo a kopia a resignation paper nga inyenkodna idi kalman iti billing section.

“Narigat ti sumrek iti trabaho. Adda kadi insigida a sumrekam?”

“Dita Victory Liner, sir. Konduktor.”

Nanglangit ti bisor a nagliad iti executive chair.

“Ni Lito ti nangsugsog kenka, ania?”

“Kinayatko, sir. Iti uneg ti bus, awanen ti aso a kumagat.”

       (Adda tuloyna)