Sarita: Basolko kadi? (Umuna a paset) | Tawid News Magazine - Weekly Ilocos News 📰

Basolko kadi? (Umuna a paset)

TINUKTOK ni Manang Mariel ti ridaw ti balaymi. Kagapgapumi sadiay pagadalan ket umnos ti bannogmi ta bulan manen iti Marso ket nganganin ti aldaw ti panagtuturpos. Sakbay nga agkulpi ti bulong ti kalendario daytoy a bulan, addanton nurse a kabsatko.

Pinusiposna ti seradura ket tallo a nasisinged nga agsasarita a lallaki ti inlua ti ridaw. Nakadekuatro ni Tatang iti sopami. Awan pay kanito a di agkumpas dagiti imana iti kaadu la unayen ti isalsalaysayna. Idinto a dagiti dua a kaduana, di pay agkirem dagiti matada a mangbuybuya iti panaggaraw ti bibig ken ima ni Tatang. Aysus, aminsa a balikas ni Tatang tungtung-edanda.

“Aniaman ngatan ti ipaspasaw ni Tatang?” kinunak kabayatan ti panangpalpaliiwko kadagiti garaw ti amak.

“Sis, sumrektan! Adda gayam bisitatayo,” kinuna ni Manang sa timmallikud ket nagna nga agturong iti direksionda da Tatang.

Agpangato-agpababa ti matak a mangkitkita ken ni Manang. Adda manen nagun-odna a pakaitan-okan isu nga adda man bisitamin. Kasta  ti kadawyan a mapaspasamak iti biagmi nga agkabsat.

Maysa a bigat, inasitgannak ni Bessy, kaadalak.

“Sis, sumalikanto a, naipailistaka ken ni Ma’am itayen,” kinunana. Ni laeng Bessy  ti makaawat iti kaririknak.

“Ti ania?” dinamagko.

“Salip iti panagdaniw inton bigat. Laingem ta maysa laeng ti mangabak.”

“Panagdaniw? Maysa? Uray siasino, mabalin a sumalip?”

“Wen, amin nga agngayangay, sis.” Innalana ti imak ket impapetpetna ti maysa a papel. “Ammok a kabaelam, isu nga impalistaka. Kayam dayta, sis. Ad-adda a tumadtadem ti buneng no as-asaen.” Pinag-thumbs-upna pay dagiti tanganna. Awan maaramidakon isu a binasakon ti linaon ti papel.

“’Ania’t Nakabasolak?’ Daytoy ti daniwenmi no bigat?”

Nagtung-ed ni Bessy.

Apaman a nakasangpetak iti balay, nagderetsoak iti banio. Kinautko iti bulsa ti paldak tay papel nga impapetpet ni Bessy kaniak itay diay pagadalan. Intugawko iti inidoro ket rinugiak ti nagpraktis. Nailansa dagiti mulagatko iti maudi a liniana… Ayat a tartarigagayak, magun-odko kadi? Inarikapko ti barukongko. Nagdagsen. No adda la pannakabalinna, no adda laeng.

Nagkiriring ti alarm clock, 4:30 ti agsapa. Bimmangonak iti katrek sako pinidut tay kopia ti daniw iti rabaw ti lamisaanko.

Mapanak ‘diay salas, maymayat sadiay a pagpraktisan, nakunak iti nakemko.

Adda tao ti salas ta nakagangat ti silaw. Inin-inayadko a sinirip no siasino. Nakitak ni Manang a nakatugaw. Agbasbasa.

“Adda siguro eksamenda madamdama isu nga agrebrebio?

Inin-inutko met laeng nga inrikep ti ridaw ket nagsubliak iti siledko.

“Di bale, napraktisko met idi rabii,” kinunak sakbay a sumagid ti bukotko iti katrek.

Simmardeng met laeng ti panagpigerger ti tumengko apaman a nangngegak ti palakpak dagiti padak nga agad-adal. Dagus a sinabatnak ni Bessy idi makababaak iti entablado.

“Kitaem!  Dakkel  ti tiansam a mangabak,” kinunana.

Sakbay a makapanak iti lugar dagiti gagayyemko, inyawag ti mangiparparang ti sumaruno nga agdaniw.

“Ladies and gentlemen, from the Bachelor of Science in Nursing, let’s witness Miss Mariel Gloria.”

Napataliawak. Nagsidda-awak. Sumalip met ni Manang?

Uray la nagginggined ti entero a pagadalan iti kapigsa ti palakpak dagiti agbuybuya.

“Miss, no mangabakka uray adipenennakto agingga’t kaykayatmo,” impukkaw ti maysa  a lalaki nga agbuybuya. Inwarasko ti matak no sadino ti naggapuan ti pukkaw. Diak nagbiddut. Ni Robert a talaga! Ni Robert nga agdatdaton kaniak. Pati ni riro ken ni ayat, bumingay pay laeng?

Nakasamsam-it nga isem ti insubalit ni Manang kadagiti agbuybuya. Pinintasna ti takderna ket inna rinugian ti nagdaniw. Nahipnotismoda amin iti boses ni Manangko. Nagsabat dagiti kidayko iti maimatmatangak. No makaiwa laeng ti kita, itay pay la a nadangran.

Uray idi addaakon iti balay, kasla naperdi a plaka ti panagsublisubli iti lagipko ti imbaga ni Bessy: “No awan laeng ni Manangmo, naganmo koma ti naiplastar idiay dakkel a bulletin board ita”. 

Anian a kinaulpit ti biagko. Uray ti kabassitan koma a pakaragsakan, mapanto pay la kenkuana. Kasta kadi ti galad ti in-inauna, dina ammo ti mangparabur?

        (Adda tuloyna)