SARITA: Panagsareb Iti Sumipnget (Maikanem a paset)

UMUNA nga aldaw ti serrek. Nasipnget ti lubong. Panagriknak, kaslaak la sangarakem nga asin iti kalintudoan a katkatawaan ti kimat ken kankantiawan ti gurruod. Madama ti lubilubi iti barukongko. Nakarkaro pay a panaglubi ngem idi damok a digaan ni pers lab. Ngem diak nagpadlaw. Alas dose agingga iti alas siete ti rabii ti serrekko.

Do you belong to this class?” dagus a dinamag ti English titser apaman a nakastrek. Siak ti taltaliawenna. Awan ti kaabayko. Saanko nga ammo no apay nga awan man la a pulos ti immabay kaniak. Awan met ti anglitko ta nagaramatak iti Black Magic ken nagispreyak iti Black Suede cologne. Kaslaak napateltelan iti nangngegko. Daydiay napateltelan a naibusan iti anges a kasla nalmes. Namindua a timmilmonak iti katayko sakbay a simmungbatak: “Y-yes, ma’am…”

Really? And you are?” insuotna ti nakapuspuskol nga antiparrana apaman a nakatugaw ket simmeksek iti mugingko a kaing-ingas ken kaedadan ngata ni Miss Tapia nga artista.

Candido D. Macamucat, ma’am…”

Natilmonko ti katayko iti sumaruno a saludsod. Panagriknak, nakadagdagsen la unay daytoy a saludsod ta kaslaak ketdin ngilaw nga iniladan ti nuang. Maysa a saludsod a diak kayat a sungbatan iti kaanoman uray sadino a paset ti lubong ti yanko. Saludsod a saan a kayat a sungbatan dagiti nataenganen a kas kaniak, saan laeng a dagiti lallakay no di pay ket (nakarkaro pay ngata) dagiti babbaket. Daytoy a saludsod ti kaunaan a panaglibak dagiti babbaket ken lallakay. Ngem daydiay repran iti biag ti rason iti panaglibak: “Nuang laeng ti lumaklakay.” Isu a dakami a lallakay ken babbaket, saanmi a basol no aglibakkami, basol dayta a repran wenno daydiay nalawa ti mugingna a nagtaudan dayta a repran. Ngamin, awan ti lakay wenno baket a mayat a maikumpra iti nuang.

Daytoy ti saludsod…

How old are, Mr. Macamucat?”

Nagkidemak. Kasla bomba nuklear ti nanalbuong iti mismo a lulonak. Namanhid ti sibubukel a bagik. Kimsen ti dilak. Ngem kalpasan ti maysa a nauneg nga anges ken dua a tilmon ti katay, naaddaanak iti pigsa a sumungbat. Kas iti kapigsa ti tao a saan a pulos a maawanan iti namnama. Kas kuna ti Ginebra ti PBA: “Never say die.”

Not far from your age, madam,” nakapsut, ngem nabukel ken nalawag a mangngeg ti sibubukel a klase ti sungbatko.

Apay a damagenda pay laeng ti edad ti estudiante a kasla ketdin adda iti grade one? Imbag la ketdin a, ta dina imbaga a gaw-atek ti lapayagko.

Yo! nagbiitka met a nagoberhiten, pops! kantiaw ti bukodko a bagi. Relaks!

Walang bata o matanda sa edukasyon. Ang pag-aaral ay isang tuloy-tuloy na proseso ng buhay…” inyeksplika met ti titsermi iti Sining ng Komunikasyon.

Yahoo! Kaslaak la nangabak iti three hundred forty seven million pesos iti superlotto! Nagdakkel ket a gin-awan dayta a palawagna. Panagriknak, kaslaak ubing nga inubba ti inana gapu iti napalalo a bannogna iti nakaad-adayo a pinagnana nga agturong iti nakaad-adayo pay laeng a papananna. Kaslaak maysa a maladaga a nagimas ti turogna iti nabara a barukong ti manangipateg nga inana. Makaluluaak iti ragsakko gapu ta addan ina a mangsappuyot kaniak iti panawen ti kapsutko. Kasla kayatko ti agsangit. Agsangit nga uray la. Ngem over acting met daytan isu a pinilitko a tiniped ti luak. Narabaw ngamin dagiti matak. Siguro gapu ta maysaak a trying hard writer.

Ngem saan a makaidna dagiti dadduma a titser iti kinaadda ti maysa a lakay nga adalanda. Paisem-isemda laeng ken pataldiaptaldiap. Siguro, is-iseman ken taldiataldiapanda ti kasla bariles a butiogko? Didak pay awagan uray no maktanganakon nga agitaytayag iti imana. Kaslaak paspasurot wenno salin-pusa iti uneg ti klasrom.

(Adda tuloyna)