SARITA: Panagsareb Iti Sumipnget (Maikapito a paset)

Ania ti yawagko kadakayo: Dad, Daddy?” saludsod ti titsermi iti Computer 111. “Alangan met saan? Ibagadanto pay ket a sugar daddy…”

Just follow the code of behaviour in teacher-student relationship, madam…” imbagak nga insegida, ta insaganakon ti sungbatko iti daytoy a situasion. Immisem. Ngem din sa napnek.

May kompyuter kayo sa bahay… s-sir?” alanganin daydiay panangibalikasna iti sir ta tartaraudi. Alanganin, kunak ta baliktad metten ti lubong, ti titser ti mangawag iti sir iti estudiante.

Meron po, ma’am…”

Please bring a floppy disk or compact disk next meeting. Ikopya natin ang “TypingDr” for you to practice. Kasi ‘yung mga naging klase ko, mga matatanda ang mahirap turuan ng typing. Mga baluktot na ang mga daliri. It is better na magpraktis na kayo, ano po?”

Kaslaak la nasingkilan iti tallo ribu ket tallo nga apro. Ammok dayta ibagbagana a “TypingDr”, maysa a software para iti panagsursuro nga agitugkel iti keyboard. Ngem, diak imbaga a señor citizen daytan iti kompiuterko. Ket lalo a diak kayat nga ibaga a pagpipiestaanen ti lati ti nagretiron a makiniliak. Diak kayat nga ibaga a nasuroken a duapulo a tawen a mannuratak a pulpol ken piton a tawen nga agar-aramatak iti kompiuter iti innak panagsurat. Dinarasko a linuktan ti clutch bagko ket nakaisemak a nangiyawat ti USB flash drive. Ngimmato pay dagiti kidayna ket kinunana: “Whey! It seems that I got no problem on you, sir!”

Ti titser ti Office Automation ti kaunaan a nangted iti kwiz. Laboratory daytoy. Puro hands on ti laboratory. Computer based. Kwiz iti Microsoft Word (MS). Kuna ti instruktor: “Buksan ang local disk C at hanapin doon ang file na ‘quiz 6:00 P.M.-7:00 P.M..’ Follow the instructions. Do it in forty five minutes or less, go!” Nabukel ken agallangogan ti timekna, ta iti tayagko a bumbay, tannawaganna ti alipusposko.

Kabayatan ti panagbasa ken panangaalisarko kadagiti saludsod, pinatademko dagiti lapayagko: innarasaas no kasano ti aramidenda. No ania ti pinduten no luktan ti kompiuter. Saan met la a kumagat ti mouse? Ania ti kayat a sawen ti local disk? Daydiay file, isu met laeng kadi daydiay paglimlimpia iti pinuted a kuko?

Iti analisarko, dagitoy a saludsod ket karuprupa ti linaon dagiti uppat a librok a Microsoft Word ken dua a Microsoft Office a masansan a basbasaek iti piton a tawen. Kastoy man ti pannakaisurat ti kwiz.

Open a Microsoft Word Processing Blank Document.

Save the document in My Document folder. Name your folder by your name.

Your header should read “MS WORD Quiz.”

Your name, date and subject must appear in the upper rigid hand corner of the document in 10 point font size and be justified to the right.

Number your page at the bottom of the page, alignment is center and do not show number on first page.

Cut and paste the following text, editing is necessary using the Spelling and Grammar Tool.

Indent the paragraphs, the tab stops should be set at 1.0.

Use the Georgia font face for this document.

The title, “What Message Are You Conveying”, should be centered, bolded and in 36 point font size of any corsive font.

The body of the text must be in font size 12.

Set the top and bottom margin of your document at .75 inch and the left and right margin at 1 inch each.

Double space the text of the document.

o Set it up in two columns.

o Justify left and mid right.

o Subtitle it “With All Flags, Plying”

* Paste a graphic at this point of your document. Set it behind the text.

Enjoy your quiz, good luck! Lalaingenyo, wen?

Makaisemak ta saan sa met a kwiz ti Computer 112 daytoyen no di ket NCO trade test ti TESDA. Siguro a narigrigat manen dagiti sumarsaruno a kwiz kadagiti dadduma pay nga MS applications. No MS okey laeng dayta kaniak. Napadasak metten ti nagaramat iti Linux ngem saan pay iti Mac, Solaris ken dadduma pay nga operating system. Iti uneg ti duapulo ket lima minutos, nalpaskon. Pinatsekko ket adda maysa a biddutna.

Dimo nakita, pari?” nagtangken ti panangibalikasna iti “pari.”

No, sir…”

Aniakan, pari! No uleg dayta ket kinagatnakan!” nagpaggaak pay ti titsermi, ket naiturong amin a mata kadakami a dua.

(Adda tuloyna)