SARITA: Panagsareb Iti Sumipnget (Maudi a paset)

I am quitting, sir. Talaga a diak makita ti biddutko.”

With All Flags Plying, pari. Plying should be in letter “F” tapno tumayaben! Aniakan sa, pari ko, uppat pay dagita matam…!”

Nasipatko pay ti mugingko iti kinatuggarengko. Aggargarakgak ti instruktor a rimmuar iti Room 203.

Ngem linuktan daytoy a pasamak ti ridaw a nabayagen a sapsapulek. Datdatlag a talaga ti biag, no sapulem, saanmo a masarakan ngem no isardengmon ti agsapul, agdisnudo met nga umasideg. Naluktan ti maysa a ridaw ti sinninged kadagiti kaklase, maysa a ridaw ti panagbalbaliw…

Pops, isuronak man nga agikabil iti margin…”

Dad, ania ti pinduten no agikabil iti page number…?”

Uncle, kasano ti agikabil iti graphic a behind the text?”

Tito, ania ti pinduten iti two columns?”

Kuya, ania a font ti corsive? Awan met ti makitak a nakasurat a kasta ditoy box! Awan sa met ti font a corsive?”’

Manong, dinnod’toy ti pakakitaan iti tab ti margin?”

Ngem adda maysa a nagkamali. Wenno inggagarana ngata? Kaabayko pay nga itay pay laeng a kasla kannaway ti tengngedna. Isu ti kaubingan, karapisan ken kabassitan iti hayt. Timmakder ket pabugkaw a nagkuna: “Puro dakayo! Kayo, kayo! Kayo laeng! Lolo, siak met a …!” ket napno iti katkatawa iti Room 203.

ITI UNEG ti pagtaengak, nagbalbaliw ti amin. Daydiay ‘hip-hop’, masapan nga agawid ket agbabad iti kompiuter tapno agreserts. Insardengnan ti makibarkada. Dagiti metten libro ken notbok ti atupagen ti buridek no sumangpet iti eskuelaan, ngem saan a nakalibas kadagiti matak dagiti libro ni Bob Ong iti uneg ti bagna. Maasianak met unay iti inaunaan ta agingga iti parbangon nga agreprepaso. No makariingak iti alas tres iti parbangon a papanko panaggatang iti tagilakomi a nateng ken prutas, madama pay laeng ti panagbasana. Isu nga itemplaak iti gatas ket bagaak a maturogen. No dadduma, maturoganna ti basbasaenna ket ulsak laengen tapno di lamminen.

END OF first semester.

O, kitaenyo ti gradok!” timpuar met ti kinalastogko. Uppat a 1.50, dua a 1.75, maysa 2.25 ken maysa a 2.50. “Suma total, 1.78. Maikkanak iti 25% discount on tuition fees next semester. Kastoy a ti tuladenyo a grado wenno oberanyo pay ketdi…”

Ulimek. Awan ti mayat nga agtimek. Nakapigket dagiti matada iti final gradesko.

Closing ti school year. Nakaluaak pay iti ragsakko ta nagngangato ti grado dagiti annakko. Nagpunsionak pay ket inimbitaranmi amin a kaarruba, gagayyem, klasmetko ken uray dagiti di unay am-ammo idi nairuar ti inaunaan ti Nursing Licensure Exam. Adda metten trabaho ti inaunaan, ken limmasinda iti taeng. Impatigmaanko nga isamirana ti mangala uray bassit laeng a unit. In-inutenna ti agiskuela agingga iti makagraduar. Kinugtarannan ti barkada ken panagbartek…

NAGRIGAT nga ikkaten ti lansa a naipanget, ngem lansa met la gayam ti makaikkat! Adda katukad a deppa ti amin a banag ditoy lubong, a kas iti lansa iti lansa, laud iti daya, abagatan iti amianan, ngato iti baba, langit iti impierno, siudad iti away…

Daytoy nga estoria iti siudad, ket adda katukadna a gagangay nga aramid idiay away. Sadiay kasulineksulinekan a suli ti away, agsareb dagiti agindeg iti inumenda iti ubbog iti kakaykaywan a paset ti bantay. Ita, uray no nalabbagan ti langit iti dandanin panagpakada ti init, adda maysa nga ama nga umis-isem a magmagna iti akikid a tambak dagiti talon a sumagpat iti akikid met laeng a desdes, bitbit ti kannawanna ti daan a timba tapno mapan sumareb iti inumen iti ubbog. Apay nga ita laeng a sumareb? Ngamin iti agsapa, iti tengnga ti aldaw ken uray iti ubing a malem ket impakona ti bagina iti trabaho tapno laeng mabiagna ti pamiliana ken maisaganaanna iti naraniag a masakbayan dagiti uppat nga annakna. Daytoy ti panawen – sumipnget – nga inna panagsareb. Ngem saan a pulos nga agamak daytoy nga ama iti panagsaknapen ti sipnget, saan a pulos a mabuteng iti aniaman a peggad a sumangbay ta ammona nga adda di makita nga Ima a mangidaldalan kenkuana iti nabannayat a pannagnana iti umno a dana.#