SARITA: Pusta ni Ayat (Tuloyna)

“Nakalallalaki a kitaen ti panagsikkawilna o!” inyisem ni Ishty.

“Hay apo, di kaya dayta hipnotismom a patinnagen ni Manong Dan. Siak ti patiem. Bayat ti kaawanmo, awan pay nadamagko a babai ditoy a nakainnasideg ti riknana nupay adda met makitkitak nga iyaw-awidna no kua.”

“Kayatko nga agbalin a boypren. Kursonadak ti langana. Siak ti mangpaamo kenkuana,” addayta manen ti pilia nga isem ni Ishty.

“Saannaka a tipo dayta. A very serious guy will not make patol sa sosyalerang tuladmo, Ishty. Asa ka pa.”

“Sige ipakitak a kabaelak. Mabalinko ti makipinnusta,” inkarit ni Ishty.

“Ok, no mapatinnagmo, siak ti makaammo iti loadmo iti tallo a bulan. Trenta pesos tunggal aldaw. Ngem no dimo maala ti riknana, siak ti adda libre a loadna ken kukuak tay kursonadak a shortsmo. Deal?” inyawat ni Carmela ti imana.

“Deal!” napnuan kasiguraduan nga inalamano ni Ishty ti gayyemna.

“Ngem kasanon ti boyprenmo a nabati iti Manila, fren?” dinamag ni Carmela idi agangay.

“Dandaniakon mauma kenkuana, fren. Diak magustuan ti kinaselosona. Bianganna pati accountsko iti Friendster ken Facebook.”

“Ket ania ti planom ken ni Manong Dan?”

“No mapatinnagko, di isun ti nobiok, fren.”

Nasipngeten idi makasangpet ni Dan iti balayda iti sumuno nga aldaw. Inleppasna ngamin nga in-dub tay script ti programana iti telebision tapno marugianen a simpaen ti editor. Idalanda pay ngamin iti computer tapno masimpa dagiti mayannatup a videos para iti estoria.

Dagus a tinurongna ti lamiseta iti siledna a nakaidissuan tay nabatina a selponna. Addan iti uneg ti bus nga agpakabisera idi malagipna ti selponna nga agtsa-charge. Pinidutna tapno kitaenna dagiti mensahe. Adda text dagiti barkadana a da Ronald ken Randy. Agaw-awisda nga aginum. Sangsangpetda a naggapu iti Manila. Adda met text tay sekretaria ti gobernador a mangipakpakaammo iti kaadda ti press conference a maangay iti kabigatanna sadiay kapitolio. Ken adda baro a numero a nangipatulod iti quotes.

Care is d sweetest form of LOVE.

Wen sum1 says TAKE CARE,

it really means dat u will stay

in their heart till its last beat.

So, TAKE CARE always!

“Asino ngata daytoy?” nakuna ni Dan iti bagina. Saan a mahilig nga agtetext ken saanna nga ugali nga iwaras ti numerona. Nupay kasta, sinungbatanna ti text.

Nice quotes. Asinoda kadi Apo?

Apagisu a nakasukat idi aguni ti selponna. Kinitana. Daytay nagipatulod iti quote.

Ishty, kuya

Ishty? Maymaysa laeng ti ammona nga agnagan iti kasta. Daytay taga-amianan. Ngem nabayagen a saanna daytoy a nakita. Ti ammona, agnaed daytoy iti Manila. Rinugian manen ni Dan ti nagpindot iti keypad ti selponna.

Ishty? The new registered nurse of Nagbayruangan?

Awan pay maysa a minuto, naguni manen ti selpon ni Dan.

Yup. Are you surprised? I got your number kay kuya Kolo

“Ne napasnek sa ketdi daytoy a. Innalana pay gayam ti numero iti kaeskuelaak idi iti elementaria a ni Kolo,” nakudkod ni Dan ti teltelna. Kasinsin ni Ishty ni Kolo.

Awan met ngata ti dakesna a katextna daytoy yantangay nakaunlimited text met ken agpadada iti network. Awan la ngata ti maubra daytoy nga Ishty isu a nagdudukotanna a katext. Sigurado, inton bigat saanton nga agtext daytoy, isu a pagustuannan ita a rabii.

Kuya congrats ha. Naglaingka a sumarita idi kalman. Dinengngegko amin dagiti imbagbagam.

Napangilangil ni Dan. Saan a naruam a daydayawen ti maysa a balasang. Nangruna la unay iti kas ken ni Ishty. Nupay nabayagen a dina nakita daytoy, ammona a sosialera daytoy. Tay tipo a saan nga agkainteres iti kas kenkuana a nupay adda met kupkupikopanna a taer, saan unay a mahilig iti gimikan. Makaanayen nga adda iti uneg ti balay no kasta nga awan trabahona. Kasla awan appealna iti babbai.

Adu pay ti napagpatanganda iti dayta a panagtinnextda. Nalagipda nga apagisu a Grade I ni Ishty idi Grade VI da Dan. Dinamag ni Dan no adda boypren ni Ishty a nagkunaan met ti balasang nga awan. Inyangaw ni Ishty nga agkitada iti kantina iti sango ti balayda tapno aginumda ngem kinatawaan laeng ni Dan. Nupay sumimsim met no kua iti serbesa, saan a sanay a sumangsango iti pagiinuman. Kinantiawan la ket ngarud ti balasang a kasla saan a journalist.

Agala-unan iti parbangon idi agpinnakadada iti text.

Nasapa manen ni Dan a rimmuar iti balayda iti kabigatanna. Saanen a kimmammet yantangay addanto met la maipasango a merienda iti maangay a presscon ti gobernador. Sakbay a nagpakalsada, kinautna ti bolsana tapno penkenna no naitugotna met laeng ti selponna. Iti trabahona, kasapulan la unay ti selpon.

Agalas dies idi malpas ti presscon. Magmagnan nga agturong da Dan ken ti cameraman iti opisinada nga adda iti likudan ti kapitolio idi agkuregreg ti selpon iti bolsana. Dagus a kinitana no asino ti nagtext. Numero ni Ishty.

(Adda tuloyna)