SARITA: REBOLUSION (Maudi a paset)

Pinagkalma ni Sip-i ti riknana. Adda punto ti imbalikas ti kasingin ni Otab. Ngem pinadasna idin ti nakipatang iti nakaitalkan daytoy a lugar. Pagdaksanna, saan a nangipangpangag daytoy!

Sukir! Wen, dayta ti maitutop a balikas iti nakaitalkan daytoy a disso. No mangipangag la koma, adayo nga adda kastoy a parikut a sangsanguenda. Di ngata ammo dayta a napagtalkan a no isuda ti maawan ket dakkel a sungsungbatanna?

Pinagulimekna ti umanaab a tallaong. Maitugotan ti buteng ken danag iti rupa ti tunggal maysa.

“Ania ngarud ita ti rumbeng nga aramidentayo?” inamad ni Alid.

“Kakabsat, agkaykaysatayo a mangidanon iti napagtalkan ti isusupiattayo iti ar-aramidenna. Ipariknatayo ti kinakawaw nga adda kadatayo!” kinuna ni Sip-i. Idi pay rabii a pinampanunotna daytoy maudi a pamuspusan sakbay a maladaw ti amin.

“Nabayagen a naaramidmi dayta!” kinuna ni Arab. “Ngem awan mamaayna! Timmangken ti rikna ti amotayo!”

“Agpayso dayta!” maysamaysa ti nagkuna. “Namin-ano, aya, nga imparipiripmi kenkuana ti kasasaadtayo ngem di mangipangpangag!”

“No kasta ngarud, adda kenkuanan a mangituloy a mangpastrek kadagitoy a ganggannaet; adda kenkuanan a makidangadang iti ibunga dagitoy; adda kenkuanan no awanen ti namnamaenna a maitulongtayo — ta adda panagpatingga ti mabalintayo nga isaranay kenkuana! Wen, adda kenkuanan, Kakabsat, nga agsungbat iti nagtalek kenkuana a taripatuenna a naimbag daytoy a disso!”

Bimmangon ti apuy iti barukongna kalpasan a nayablatna dagita. Akuenna, mariknana metten ti isasalog ti pigsana. Nganngani payen dina maangay daytoy a taripnong gapu ta madmadi a kanayon ti riknana ngem inkarkarigatanna laeng tapno masolbar ti sangsanguenda a parikut.

“Nakas-ang a panunoten,” kinuna ni Osup, “ta imbes nga ilallaynatayo dayta a napagtalkan, kasla ketdin idurduronnatayo iti lubnak. Mamin-ano la koma, aya, nga idagidaginak iti saklotna tapno mariing dagiti ur-uratko ket maannongko dagiti pagrebbengak. Ngem anian ta agsiksikkawil met lattan iti agmalmalem!”

“Pudnoka dita!” insarurong ni Arab. “Naglawaan ti baybay a pangipasiaranna koma kadatayo; wenno iti bantay; wenno kadagiti tanap a mangipaay iti talinaay ken bang-ar ngem anian ta kaykayatna met ti mapan iti nakiro a disso: iti umok dagiti asuk ken tapok!”

“No usaren la koma dayta a napagtalkan,” inruar metten ni Sigab ti sakit ti nakemna, “ti kinabaknangna a mangsaluad kadaytoy a disso; a mangpastrek kadagiti katulongantayo a mangipapaay iti pigsa ken sidap ti panunot, adayo koma a sagabaentayo ti kastoy. Dina la ammo nga isunto met laeng ti pagdas-alan ti amin.”

“Kakabsat,” kinuna ni Sip-i, “gapu ta dinatay’ met ipangpangag ti pannakaamotayo, irubuattayo ngarud ita ti isusuko! Isusuko a mangaringgen iti kinataona. Ngem sakbay dayta, kiddawek nga ikkantay’ pay iti maudi a gundaway – a no palusposanna pay, pakaitibkolanna daytan a narigaten a pakabangonanna.”

“Umanamongkami kadayta!” kinuna ti tallaong.

Naragsakan ni Sip-i.

“Yantangay adda met pay laeng nabatbati a pigsami, ituloymi latta a parmeken dagiti umad-adu a kabusor. Ituloymi latta a yikkis ti bannawag! Ngem no awan latta ti mauraymi nga ayuda iti amotayo, ta narisgo unayen dagitoy a kalaban, panawenen nga ibbatanmi dagiti igammi ket bay-anmin dagiti kabusor nga agari!”

Napaulimek ni Sip-i. Sabagay, uray isu, kasta met ti adda iti panunotna. Ta ania ti mamaay ti ilalaban no awan suporta ti maseknan unay?

Kiniddawnan ti panagulimek manen ti tallaong. Indauluanna ti kararag – a balonen ti tunggal maysa iti panagturongda kadagiti puestoda; a mangted pigsa kadakuada tapno ituloyda ti rebolusion; a namnamaenna a mangriing iti maseknan ta daytoy a disso a naikumit kenkuana, ipategna koma metten. Ta ammoda amin: mapukawda no makapungtot ti Nangitalek. Binulbulodda laeng daytoy a disso!

(Gibusna)