SARITA: Saan a maikutkot ti kinapudno (Maikadua a paset)

SIAANAT ni Rudy a nangiwalin iti buok a nagagmuy iti muging ni Liza. Makalawasen ngem di pay nagsubli ti nasimbeng a panunotna.

Nagareng-eng ni Liza. Nagmulagat.

“D-dika pay agkutkuti,” inyatipa ni Rudy.

Tinaliaw ti kabsatna ngem awan ti simngaw iti bibigna. Nagkidem. Madamdama, narnekan met laengen ti turogna.

Timmakder ni Rudy. Rimmuar iti siled ket nagpayubyob iti pasilio.

Manen, simmiplot dagiti saludsod: sino dagiti kriminal a nangpatay kadagiti dadakkelna ken nangrames ken ni Liza?

Namnamaenna a saan a panagtakaw ti gapuna. Posible a maysa kadagiti binasted ni Liza. Ngem siasino kadakuada?

Wenno panagibales ti gapuna? Idi laeng kanikalima nga aldaw, imbutaktakna ti anomalia ni Mayor Andres Molina mainaig iti nangina unay a pinanggatangda kadagiti agas para kadagiti ospital iti Santa Barbara.

Ngem no adda pannakaibiang da Mayor Molina iti pammapatay, apay a dagiti dadakkelna ken ti kabsatna ti nagdas-alan ti nangisit a panggep dagitoy a saan ketdi nga isu ti pinuntiriada? Maysa a ballaag kenkuana?  Wenno panangpasakit kenkuana?

Insunelna ti sigariliona sa simrek iti silid ti kabsatna. Nakamulagat daytoy. Mulmulenglenganna ti ruangan.

“Nasayaaten ti panagriknam?” inamadna idinto a piniselna ti dakulap ti kabsatna.

Saan a simmungbat ni Liza ngem narikna ni Rudy ti yiirut ti petpet ti kabsatna. Limmag-an ti rikna ni Rudy. Iti maysa a paset ti panunotna, ammo ni Liza a natalged iti sidongna! Kayatna a sawen a saan a napukaw a namimpinsan ti nasimbeng a panunotna. Tiempo laeng ti kasapulan tapno in-inut nga agsubli ti nasimbeng a panunotna.

Naluktan ti ridaw. Simrek ni Antina a Sianang ken Angkelna a Celin ken ni Andy. Nagbitbit dagiti tallo iti bay-on a naglaon kadagiti prutas ken pagan-anay ni Liza.

“Nakariingka gayamen,” kinuna ni Anti Sianang. “Hushusto ta napudot pay ti pammigat nga insangpetmi.”

“Kasano ti panagriknam?” inamad ni Andy ket ginandatna a pislen ti abaga ni Liza.

Naklaat laengen ni Rudy idi kellaat a nagikkis ni Liza  sa sibubuteng a nagkurunikon iti iddana.

“A-apayen?” nakigtot ni Andy.

Tinimbrean ni  Rudy ti doktor. Simbrek daytoy a kaduana ti maysa a nars. Tinudokan ti doktor ni Liza iti pagpakalma iti rikna. Madamdama, timmalna ni Liza ket nakaturogen.

“D-diak maawatan,” kinuna ni Andy. “Apay a kasla kinabutengnak?”

“Mabalin a ti pannakakitana kenka, naipalagip ti napasamakna,” kinuna ni Rudy.

“Dakkel ti pammabasolko iti bagik no apay a saan a siak ti simmukon kenkuana,” kinuna ni Andy. “No addaak, saan koma a napasamak ti…” dina naituloy ti saona ket nagdumog.

“Saantayon a maisubli ti napalabas. Ti importante, nakalasaten,” kinuna ni Anti Sianang.

Sinallabay ni Rudy ni Andy ket rimmuarda iti siled. Nagtugawda iti landok a pagtugawan iti asideg ti ruangan.

“Malaksid kadakayo ken da Papang ken Mamang, asino pay ti makaammo iti isasangpet ni Liza?” sinaludsod ni Rudy bayat ti panagpayubyobda.

“Ni met la Ambong ken Kulas,” insungbat ni Andy. “Nagpagatang ni Tata Mario iti kalding ken manok kada Ambong ken Kulas a pagsasanguantayo koma iti kasangay ni Liza.”

Kasangay ni Liza iti kabigatan ti rabii nga isasangpetna. Tinawen nga agbakasion ket pasangbayenna ti kasangayna iti purokda.

“Sino dagiti am-ammom a binasted ni Liza” inamad ni Rudy.

“Talloda, manong. Da Romy, Cris ken Dante. Ni Dante ti kangrunaan a suspetsak a nangabuso ken ni Liza. Adda idi naminsan a nagbartek daytoy ket imballaagna a no dina maala ni Liza iti nasayaat a wagas, ibanagna iti nangisit pamuspusan. Kinapudnona, daytoy ti puon ti nagringgoranmi. Ammo ti sangkapurokan ti napasamak.”

“Panagkitam, maaramid dayta ni Dante?”

“La ketdi a. Adda rekordna iti polis a nagtakaw iti manok. Sabali pay ti pananglibasna a nangbisito ken ni Milagring nga anak ni Ina Indang. Saan a dimmanon iti polis ta inareglona ida.”

NAGTUGTOG ni Rudy iti ridaw ti opisina ni Hepe Juan dela Cuadra.

“Ania ti update ti panagpalutpotyo maipapan iti pannakapapatay dagiti nagannak kaniak, Hepe?” dinamag ni Rudy.

“Adda dua a mannalon a naalaanmi iti palawag iti rabii a pannakapasamak ti krimen. Iti alas dies y media, magmagnada iti tambak nga agturong iti pangawidanda iti padanum idi makangegda iti kasla agriringgor a timek a sinaruno ti ikkis ti babai. Ngem nagbutengda nga immasideg ta dida kayat ti mairamraman.”

Inayabanmi ni Dante ket pinagsaludsodanmi mainaig iti panangipangtana ken ni Liza idi binasted daytoy. Sao la kano ti nabartek, kinunana. Ken napigsa ti alibi ni Dante. Iti dayta a oras, addada iti barkadana nga agiinom iti La Patria Videoke iti ili. Alas tres idi nagawidda. Kinapatangmi ti manedier ti paginuman ken kinatebolda ket pinaneknekanda ti alibi ni Dante.

“So back to square one, Hepe?” kinuna ni Rudy.

Nagtung-ed ni Hepe dela Cuadra. “Ngem nasarakanmi ti cellphone ni Liza a naipalladaw iti nasamek a karuotan. Interesadokami iti sumagmamano nga entry.” Binilin ni Hepe dela Cuadra ti polisna a mangiruar iti cellphone. Intedna ken ni Rudy.

Linuktan ni Rudy ti cellphone. Binasana dagiti linaonna a mensahe nga impatulod ken inawat ni Liza kasakbayan ti krimen. Maysa a mensahe ti namagkuretret iti mugingna:

Dy, dmo baga ckret. Siak2.

(Maituloyto)