SARITA: Saan a maikutkot ti kinapudno (Maikatlo a paset)

KINITA ni Rudy ti petsa ken oras a panangipatulod ni Liza iti mensahena – 08-July-2001 21:30.

Alas dies ti isasangpet ni Liza. Impatulodna ngarud ti mensahe iti amana treinta minutos sakbay ti isasangpetna. Iti dayta a kanito, addan dagiti dadakkelna iti dalan. Ngem nabtak ti goma ti lugan, segun ken ni Andy, ket kapilitan a nagsubli iti purokda tapno mangala iti arimienta a pangsukatna iti pilid.

Nagluganan dagiti dadakkelna? Mabalin a nangarkilada iti traysikel. Adda met kabagianda a mabalinda a kararagan iti asideg ti nakabtakan ti luganda.

Kinita ni Rudy no adda pay sabali a mensahe nga impatulod ni Liza ngem awanen.

Ania ti sekreto a di kayat ni Liza nga ipalgak ti amana?

Pagammuan, pinagkatekna ti ramayna. Ti selpon! No pinatulodan ni Liza iti mensahe ti amana, adda ngarud iggem ti amana a selpon!

“Awan ti nasarakanyo a sabali a selpon, Hepe?” inamad ni Rudy. Impabasana ti mensahe ken ti oras a pannakaipatulodna.

Natimpag ni Hepe dela Cuadra ti lamisaan. “You’re right, Rudy!” Bay-am ta pasukisokko ti kasamekan iti aglawlaw ti nakapasamakan ti krimen.”

DIMSAAG ni Rudy iti dyip sana tinangad ti init. Mabaddekannan ti anniniwanna. Nagmattider iti kawayan nga alad ti pagtaengan ni Kapitlona a Siano idinto a naggapo. Dimmuklos ti labang nga aso.

Timmammidaw ni Florence, ti asawa ni Siano.

“Ne, sika gayam, Manong. Umunegka,” inyawis ni Florence.

“Awan ni kapit?” kinuna ni Rudy.

“Napan nagkames, Manong. Isagsaganak ngarud ti pangngaldawna. Apay kadi?”

“Di la naidaw-as ditoy da Papang ken Mamang idi rabii ti Hulio 8?” sinaludsod ni Rudy. “Iti daydi a rabii, sabatenda koma ni Liza iti estasion ti Pantran ngem nadadaelan ti luganda ket mabalin nga immayda ken ni Siano agpaitulod nga agpaili.”

“Dida dimmagas, ditoy, Manong. Awan met ti banurbor ti traysikel a limmabas iti daydi a rabii. Dyip ketdi a. Di ngata nagnagnada a nagpaili?”

“Mabalin a kasta,” kinuna ni Rudy nupay agpangadua nga aramiden dayta dagiti dadakkelna. Nakurang a maysa a kilometro ti kaadayo ti pagnaenda.

“Sino pay ti adda traysikelna ditoy asideg a mabalin a kararagan da Papang a pagluganan?” sinaludsod ni Rudy.

“Ni laengen Andre, Manong. Adda pay maysa nga adda traysikelna ngem nabayagen a di naipasada ta dakkel ti dadaelna manipud idi naidungpar ni Mang Nato nga akinkukua.

“Kuyogennak man ngarud ken ni Andres ta damagek koma no isu ti nangitulod ken ni Papang iti daydi a rabii?”

“Agkuyogta ngaruden uray ket malabsak ti balayda a mapan mamalon.”

Asideg laeng iti pagpikuran ti balay ni Andres. Nagyaman ni Rudy ken ni Florence ket imbagana nga idanonna ti pakumustana ken ni Siano.

Awan ni Andres ta napan nagpasada. Aldawton no aggawid, kinuna ni Iniang nga asawana.

“Di la ni Andres ti nagpaitulodan da Papang a mapan iti ili idi rabii ti Hulio 8?” sinaludsod ni Rudy.

“Saan, Ading,” kinuna ni Iniang. “No adda man nangitulod kadaydi Papangmo nga agpaili, saan a ni Andres ta napan nagitulod iti negosiante a napan nagangkat iti ikan iti Sinait.”

Nagyaman ni Rudy. Nagsubli iti dyip. Nagliad iti tugaw. Namulenglenganna ti manibela.

Adda naggilap iti panunotna. Tinawaganna babaen ti selpon ni Hepe dela Cuadra.

“Adda nasarakanyo a selpon, Hepe?” sinaludsodna.

“Negative,” insungbat ti hepe. “Pinaulitko pay a pinagbirok dagiti polisko.”

“Pakasarak kadagiti nakapatangyo a dua a mannalon, Hepe?

“Taga-Brgy. Capangdananda. Apay kadi?”

“Kayatko a kapatang ida bareng maibagada ti eksakto nga oras a pannakangegda kadagiti agriringgor a timek-lalaki ken ikkis ti babai.”

“Saanda a sierto ti oras ngem iti pattapattada, agarup alas nuebe y media ti rabii.”

“Awanen ti sabali pay a mainayonda a makatulong iti pannakarisut ti kaso?”

“Dayta laeng. Ngem nadakamatda nga adda lugan a limmabas iti batogda tallo agingga iti lima a minuto kalpasan ti panagikkis ti babai.

(Maigibusto)