SARITA: Saan a maikutkot ti kinapudno (Umuna a paset)

AGTIGTIGERGER ti ima ni Rudy a nangibaba iti auditibo ti telepono. Kuna ni Ikitna a Sianang nga agawid a dagus iti balayda. Emerhensia kano. Ngem dina met kayat nga ibaga no ania.

“Kanselem dagiti appointmentko. Agawidak iti balaymi. Amangan no agbayagak. Sikan ti makaammo ditoy opisina,” imbilin ni Rudy iti sekretariana.

“Wen, sir,” insungbat ni Wilma.

Simmiplot iti isipna ti tagtagainepna idi rabii. Agpapaarayat ni Lisa a kabsatna. Ania ti ipasimudaag ti tagainepna?

Ni Rudy ti editor ti Samiweng, nalatak nga aglinawas a pagiwarnak iti Siudad ti Sta. Barbara.

Nabaked a lalaki iti tayagna a lima a kadapan ken innem a pulgada.  Baro pay idinto nga agtawenen iti duapulo ket lima.

Lima laeng nga ili ti baet ti purokda a Limmansangan iti siudad a pagtrabahuanna ngem sa laeng aggawid iti balayda iti Sabado. Adalemen ti rabii no malpasda a maimprenta ti pagiwarnakda.

Bayat ti panagdaliasat ti lugan ni Rudy, saan a seknan ni ridep. Dina maawatan no apay a dakes ti agparparikna kenkuana. Dina maiwagat ti tagtagainepna. Yad-adayom, Apo! naitanamitimna.

Nasemsem ta agkarasardeng ti bus a naglugananna nga agidissaag ken agkarga iti pasahero. Panagriknana, nabuntog unay ti panagtaray ti darikmat. No mabalin, kayatna a tumayab ti luganda tapno makadanon daras iti pagtaenganda.

Dimsaag iti ili. Nangarkila iti traysikel. Sa la nabang-aran idi masungadna ti sementado a rangtay iti sungaban ti Limmansangan. Iti labesna ti yan ti pagtaenganda. Ngem nagbalaw ta naipasabat kenkuana dagiti adu a lugan ken dagiti naraniag a silaw iti paraangan ti bungalow a balayda.  Apay nga adu ti tao iti balayda?

Pinasardengna ti traysikel sa dimsaag. Bitbitna ti bagna, simrek iti inaladanda. Naiturong dagiti mata kenkuana.

Manipud iti salas ti bungalow, agsangsangit ni ikitna a Sianang a simmabat kenkuana. Pinikpik ni Ulitegna a Celin ti bukotna.

“’N-nia ti napasamak, Ikit, Uliteg?” nagdamag.

“D-da Papang ken Mamangmo, awandan!” nagsaibbek ti ikitna.

Iti apagdarikmat, inaskawna ti paraangan. Naituken iti ridaw. Ti amana ken ti inana ti nakamassayag iti salas! Naglulok dagiti tumengna.

Inwaras ni Rudy ti panagkitana iti uneg. Adda birbiroken dagiti matana. Adda saludsod nga agpilit a rummuar iti bibigna. Ngem awan ti nakaitured kadagiti adda iti uneg a nakipinnerreng kenkuana.

Nagsaltek ti panagkitana ken ni Andy, ti kaayan-ayat ti kabsatna a babai.

“Ni Liza?” sinaludsodna.

“A-adda iti ospital,” insungbat ni Andy.

“Ania ti napasamak?” dinamagna kalpasan a maallangonna ti riknana.

Napagsisilpo ni Rudy dagiti pasamak. Nagbakasion ni Liza. Nagpakuyog dagiti dadakkelna ken ni Andy a mangsabat ken ni Liza. Ngem iti dalan, nabtak ti pilid ti lugan dagiti dadakkelna. Nagsubli ni Andy iti purokda tapno alaenna dagiti arimienta a pangsukatna iti pilid. Da Papang ken Mamangna ti nagtuloy iti ili. Alas dies ti rabii ti intext ni Liza nga isasangpetna.

Iti dalanda nga aggawid iti purokda, sinaneb ida ti dua a lalaki. Inulodda ni Liza. Nakiranget ti amana ket binagsol ti maysa kadagiti nagsaneb. Insarunoda ti inana. Rinamesda ni Liza sada binagbagsol kalpasanna.

“Naisalakanen ni Liza,” kinuna ni Andy, “ngem nagblangko ti panunotna iti nadagem a napasamakna.”

Kellaat, immulo ti dara iti ulona. “Sino dagiti nagaramid? dina napupuotan a yinugyog ti abaga ti gayyemna.

“A-awan nakasaksi iti napasamak.”

Kasla napaksuyan ni Rudy a nagtugaw iti sopa. Sino dagiti kriminal ken nangrames iti kabsatna?

Kapkapnekanna a saan a kuarta ti gagara dagiti kriminal. Saan nga agikuykuyog ti amana iti dakkel a kuarta no rummuar iti balayda. Saan met a maibilang ti pamiliada a nabaknang unay nupay makuna metten a saanda a makurkurangan iti biag. Ngem masiguradona nga awan ti makaammo iti isasangpet ni Liza no di laeng dagiti dadakkelna.

Am-ammo ni Liza dagiti nangsaneb kadakuada? Maysa kadagiti binastedna iti ayat?

Asinoka man,  diakto agtalna agingga iti dika mabales! ingngariet ni Rudy.

(Maituloyto)