Footer

SARITA: SUBANG (Tuloyna)

ALDAW iti Sabado. Inleppasmi kada Domeng ti ubong ti baboy da Magsing a kaarrubami.  Iti nagmalem, nagplastaren ti ubong.  Umudong kano inton bigat ni Soling a baket ni Magsing tapno gumatang iti burias.

Ikamkamadami pay laeng dagiti hollow blocks, nakatakderen ti energy drinkmi… ti sammigel.   Imbullaawmi ti inommi idi naileppas ti trabaho.

Kas kunada, dinto pulos kabaelan ti mammartek a tuangen ti botelia ti sammigel.  Alas otso iti rabii, baribaren ti panunotmi.  Naggawid ni Domeng ket nagkibor idiay balayda idinto nga adda metten ni Magsing iti kalsada a karitenna amin a makitana  agraman ti nuang ni Tilyong.

Naggawidak metten, inyiladko lattan iti kawayan a datarmi.  Aglalatoy ti lasagko.  Nakakidem ti matak ngem diak makaturog.  Ket ne, immagibas manen iti panunotko ni Dennis.

“Ammom, baket,  mangurattanton nga agtrabtrabaho, ngem daytoy inunaam ket makilamlamut lattan kadata,”  impasagidko.  Ammok a mangmanganda ken ni Sally idiay kusina.

Awan nangegko a sungbat ti imbagak manipud ken ni Dennis.  Ammok a nangegna ti kinunak, ngem nagintutuleng laeng.  Wenno agtepteppel.  Ngem agsipud ta sabali manen ti espirituk, dinudogko dagiti damo nga imbalikasko.

“Sadut ngamin, mangnamnama lattan kadata.  Di la agbain,”  kinunak manen.  Nakapsut ti panangdengngegko iti bosesko ngem ammok nga umal-allangogan daytoy ta kasta ngarud ti boses ti nabartek.

Adda nanalbaag a kaldero idiay kusina.  Inggagara nga intinnag ni Dennis.  Mangrugin nga agsiudot.  Dita metten a simmungbat ni Jelly.

“Mangrugika manen, Pedro,”  kinunana sana pinasarunnuan iti nalag-an a sipat.  “Agbirbirok met iti trabaho ‘ta putotmo.”

“Kaaanonto, baket… mausteltanton.  Agyaman ketdi ta adda pagsanggiranna.  Imbes koma a sita ti taraknenna, isu ketdin ti patartaraken.  Aggasawa a dina kabaelan, di la mabain,”  nagislang ti panagibalikasko.

Nangegko ti danapeg ni Dennis a nagturong iti ‘yanko.

“Apay a kanayon met laengen a maikaskaser kaniak dagita?”  nangato ti bosesna.  Nupay nakakidemak, kasla maan-anninawak ti agsabet a kidayna.

“Aggasawaka, dakami met ti mangbiag kadakayo.”

“Pedro, uston!”  inyatipa ni Jelly.

“Wen, bayadakto amin dagita nga ikaskasermo,”  kinuna ni Dennis.

“Ahooo, nagpangaskan… awan pay pagbiagmo.”

“Dika madanagan, ultimo sentimo a nagastom,  isublikto amin kenka,”  inngarriet ni Dennis.  “Imbes koma a sika ti mangtulong kaniak ngem sika met ti mangidagel.”

“Sika met ti anak nga awan riknana… awan bainna!”

Awan nangegko a sungbatna.  Inkarigatak nga imulagat ti matak.  Nakatakder pay laeng iti sanguanak.  Kitkitaennak.  Nakair-irut ti gemgemna.  Nagkidemak met laeng.

“Agimpakekan, Sally.  Umallatiwtayon idiay San Esteban,”  immandar Dennis iti asawana.

“Uray ket itan.  Dimo la ket itugtugot ni Angelo,” impakamakamko.

“Shhhh!”  inyanawa ni baket.

Namin-anon a nangegko daytoy a blackmailna kaniak tunggal agsubangkami.  Ti ammok, dina kabaelan nga aramiden.

Kabigatanna, idi mapanak agtrabaho, addada iti kuartoda nga aggasawa. Kas iti napalabas, ninamnamak a maipaknin ti napasamak kadakami ken ni Dennis.  Iti malem,  naragsakak a naggawid ta kaaw-awatko ti sueldok agraman ti porsientok iti in-overhaulko a diesel truck.  Adda awitko a siopaw.

Ngem awan ti mangpasungad kaniak nga Angelo.  Naulimek ti balay idi simrekak iti balay.  Nupay kasta, impagarupko a nakikaarruba ni Sally ket intugotna dagiti dua nga ubing.

Kalpasan a nakadigosak, nangisaangak iti pangrabiimi.  Sigurado nga inton madamdama ket pukkawandak dagiti padak a lallakay iti minalem a sesionmi.

Ngem nakalutoakon ket awan pay laeng da Sally, sa ket nalam-ek pay met ti tiempo.  Numona ta nalaka nga agangkit ni Angelo.  Simmangpet ni Jelly.

“Apay da Angelo?  Agkarayamen ti sipnget,” nakunak ken ni baket.

“Nee, kunak man no ammomon.  Nagpa-San Estebandan.”

Naimayengak iti nangegko.

“Impaypayso ni Dennis ti kinunana?”

“Mauma ngata metten iti talabutab ti bibigmo, a!”

“Wen, a, ngem sao la ti nabartek daydiay.”

“Ket rinabiika met a mabartek.”

Diak nagtagtagarin.  No sumungbat ni Jelly, kasla dina maawatan ti riknak.  Apay, dina ngata kailiw ni Angelo ita?  Agsangsangit pay ket ngatan ti apok kadagitoy a gundaway nga awankami iti dennana.

Agsipud ta diak metten mauray ti pukkaw da Domeng, siakon ti nangsarak kadakuada.

“Papanam?”  impakamakam ni Jelly.

“Agkasangay kano ni Domeng,”  inyulbodko.

Saan nga agkasangay ni Domeng, ngem kayatko laeng ti agbartek ita.  Sigurado ngamin nga inton madamdama ket umagibas iti lagipko ni Angelo.  Nangruna inton maturogak.  Maikawaak la ketdi nga awan isuna iti sibayko.

(Adda tuloyna)