Ti daklis, ti karudkod ken ti partaan ti salaksak (Maikadua a paset)

Kinusilapak manen ti init. Nangato pay laeng. Ginuttak ti tali ket nagreklamo ti baket iti malikudak iti bigla a panaglukay ti irteng ti tali ket nagistayan napatugaw. Nalagipko la ket ngarud daydi kaduami a lakay a nagtutulaganmi a sutilen. Naggigiddankami a nangpaluspos iti tali ket uray la naisayyo iti pagburakan ti dalluyon. Adda daldalegna idi ket uray la naludon iti nagbettak a dalluyon. Napaisemak iti daytoy a lagip.

“Tanangem met a balong,” kinuna ti baket. “Uray agkalatukot ti tumengen ikarigatan pay laeng ti agguyod ‘ta ‘wan met maisakmulen dagiti addim,” innayonna pay.

“’Bag pay kenka, nana, ‘ta ad-adu latta ti bingaymo,” kunak koma ngem ba’am man la’ngen. Uray no napigpigsaak ngem isuna, ad-adu latta ti mairupis kenkuana ta natataengan ngarud. Ngem, iti tawenko nga onse, nataytayagak ngem kadagiti kapatadak iti 5’2 a takderko. Mangrugin nga agpiskel dagiti laslasagko gapu ti ritur ti trabaho. Natiltilak iti nadadagsen nga obra kunak koma ngem nabun-asak met a naitao. Nalaklakay ketdi ti rupak a gapuanan ti kissiit ti init. Ngem no apay a basbassit latta ti mabingaymi nga ubbing ngem kadagiti nataengan. Hay, ad-adunto manen ‘tay bingay ti akinkukua iti daklis nga agur-uray sadiay linong. Saan sa a patas, kunak koma, ngem awan ti mabalinko ta makiguyguyodak laeng.

Impapasko lattan ti nagguyod idi mariknak manen a gumayebgeb ti pudot a parnuayen ti bara nga agtaud iti lansad ti bagik. Simron, pannakaupay, ladingit, gura ken aglalaok a rikna ti kas kaniak nga adipen ti rigat.

Asidegen ti pakawan. Addan iti pagtaptapliakan ti dalluyon. Inapura a ginammatan ti maysa a natataeng a kaduami ket imbukotnan a ginuyod. Inapurak met nga inakup ti masanguananna nga iket.

“Sadiayka ruar a balong ta di madubsak dagiti lames,” inlaawna kaniak. Usukek koman ti tali idi malagipko a madi. “Saanyo nga usok-usoken ta tali,” kunada met idi naminsan. “Isu met laeng a, nga awan ti maal-alatayo,” inayonda pay. Nagadu ket nga at-attengen aya kunak koma ngem rikusek man laengen.

“Hu, awan sa manen muestranan, sika!” indayamudom ti maysa.

“Makapaawan ganaska met. Addada sadiay bubo a,” insumra met ti maikadua. Tinaliawko ti umas-asidegen a bubo. Kasla awan manen nga agpayso. Awan pay agrisak uray naiyaw-awan laeng koma a tariptip. Limmag-an pay ti panagguttak ta kasla nariknak a nagpasugnod ti pigsak.


“’Da kawadwadanna kadi, nakkong?” inulit ti lakay idi saanko a naimdengan ti saona.

“’Wan latta, lelong,” nakunak. Intanggayak ti linaon ti kallugongko. Awan manen a talaga. Nakurang pay a sukat koma ti sabon a pagdigos no ar-arigen ti pakailakuanna. Umanay met ngatan a maisagpaw iti napas-eng a marunggay. Napia laeng ngem ‘tay tangad ken taliaw manen a maipangan. No maibus ket umanay met laengen a ‘tay target. Hehe. Targettargeten ti tammudo ti asin a nakirog sa masilamutan ti tammudo a bulon ti innapuy. Kunak idi no nagan ti de-lata a kornbip ti Target ngem kastoy met gayam ti kayatna sawen.

“Su pay la’ng ‘tay kunak,” intuloy ti lakay. “Sipud pay naiyuso dayta karudkod ken daytay tri play a pagkalap, ‘wanen ti ikan.”

Wen aya. No awan ti naalami a nagdaklis, awan met ngarud ti naala dagiti nangsalloy ti daklismi nga agsadsadeng. Uray dagiti agsadeng ket nakirang met ti maaladan. Nagpukawen ti lames. Mabutengdan. Agarikenken met ti buteng uray dagiti ikan. An-anusandan ti makisinniblok kadagiti daddadakkel a puli ngem ti damsak dagiti tao. Awanen ti makalapan. Sapay no ti baybay laeng ti makuna nga awan ti akinkukua. No daga, adda titulona. No baybay, a, ket, nungka. Dagiti adu ti dagana, sakupenda payen ti baybay. Ipuonanda pay dagitoy buklis a pagkalap. Saan sa a patas ngem kaano pay nga adda naparsua a patas? Nasungrodan la ket ngarud ti gumaygayebgeb a riknak itay. Mariknakon ti bara ti bagik.

Ti karudkod ket nadawdawel manen ngem ti daklis. Makarudkod amin a madalapusna iti baybay. Uray selopin, ruting, darat. Amin. Assideg dagiti minata ti iket a nausar. Manmano pay ti mausar a tattaon. Guyoden metten daytoy ti dua a bilog a demotor. Bukodanen ti akinkukua ken dagiti pasurotna a kasla gamaw wenno buli a kanayon a sikakapet iti amongda. Adda met dagiti kasla kummo a manglibas ti naisab-iten nga ikan. Ti dakesna ket maraat pay ti iket a kapetanda. No marusngi a mapilit a maikkat, mabati met ti ipitna. Adu. Wen adu latta dagiti tao a kastoy. Natangken ti kinudilda ket narigatda a makipagrikna.

(Adda tuloyna)