Ti daklis, ti karudkod ken ti partaan ti salaksak (Maikapat a paset)

Siniparko pay naminsan dagiti kalding tapno siertuek no agturongda met laeng sadiay balay. Ad-addan ti pikarko idi makitak a turongenda ti bubon. Ab-abanda la ketdi daytay sinakdok a pagpainumko iti nuang. Sal-at. Naestilo pay met diay nuang. Saanna a kayat nga inumen ti naab-aban ti sabali.

Nadanonko ti nuangko a nakatingngaag. Masikoran met ngatan a nakawarwar. Awan pay ket ti maarabnan ditoy nakaipagudanna. Kimmidkiden ti ruot. Nangulay-ongen. Pati dingnguen, agbisinen.

“Hii!” kinunak ket insaplitko ti tali iti bakrang ti nuang. Sinarunok nga inturong iti ayan ti bubon. Nagmusiig idi maangotna ti agatkalding a danum. Tinaliawnak pay. Innalak ti sabot iti abay ti dram ket rinugiak a sinabuagan ti nuang. Sukatak ti danum iti dram. Hay, ania ketdin ti biag ti marigrigaten aya…!


“Saan koma a mabalin, Abogado,” natangken ngem naalumamay ti sao ni Tatang a nariingak. Simmiripak iti regkang ti taleb a dumna iti kusina. Situtugaw ni Abogado Valdejueza iti bangko a naipaurnos iti dulang. Agsangsangoda ken Tatang. Saggaysada iti tasa ti kape. Adda met ni Inang a mangitutuon iti dalikan ti kaldero a pinisokanna. Sitatakder ti drayber ti abogado iti dumna ti ruangan ti kusina. Nakaiggem met iti tasa ket puypuyotanna ti agas-asuk pay laeng a kape.

“Ibaratom koma kaniakon dayta sagat ken daytay dua a dadakkel nga aritongtong dita ayan ti nagdulonanta,” kinuna ti abogado ngem iti panagdengngegko ket kasla maysa a bilin. Nagsapa met dagitoy a tattaon ta pinarbangonda metten ti immallatiw, kinunak.

“Kasapulak koma dagita a matarikayo tapno malpas met laengen daytay patpatakderek a resthouse sadiay igid ti baybay. ‘Bag la a pagpalpallaingan no kasta nga aguray datao iti maala daytay karkartayo ket,” kinuna ti abogado. Nakitak pay a nagngirsi ti drayberna a nangidisso iti tasa a nagkapeanna iti dulang.

“Kabaelam met ti gumatang iti kayo, Abogado, no tarikayo laeng ti kasapulam. Ammom a nalpasen ti tungtongan dagiti nagannak kaniata maipanggep kadagita a kaykayo,” inyalumamay latta ni Tatang.

“Isu ngarud nga immayak agpakpakaasi kenka, Ka Mulong, ta kasapulak a pagdesign dayta sagat. Matablon met a kas datar dagiti aritongtong. Nalaplapad dagitoy ngem kadagiti kadawyan a magatang.”

“Ipakpakaasik met kenka, Abogado, a saanmo koma metten a gageman dagita ‘ta usarento met ti kakaisuna a barota,” insungbat ni Tatang ket indissona ti tasana a naawanganen ti kape. Gandatennan ti tumakder.

Nagngirsi ti abogado iti pannakapabainna ngata. Bigla a timmakder ket uray la naisayyo ti nagyan ti tasana a kape. Saanna a pulos tinimtiman. Nagngiit met ti drayber ket uray la napasiddukerak a nakakita iti nakasabbikel a paltog iti siketna. Nalukaisan daytoy idi ingatona ti t-shirtna a pinangpunas ti ngiwngiwna.

“Sayang. Pinarbangondaka pay met ngarud a binisita tapno presko koma ti utekmo, Ka Mulong. Laglagipem nga awan pay pinal a kasuratan ti panagtagikuam iti daytoy nagsaadan ti kalapawmo agraman iti dayta kunam a kaykayo. Agsubliakto iti mabiit. Pagpampanunotam dayta!” adda pangta iti timek ti Abogado. Sintagari, tinurongda ken ti drayberna ti ruangan ket saanda payen a sinawir a tinaliaw ni Nanang a mangguyguyod iti kayo a panangiyalay-ayna iti agrekreken nga innapuy. Kinagiddan ti panagandar ti pick-up a lugan ti abogado ti panagtapuak dagiti manokmi. Kutakda a kutak ket inapura nga apan inabog ni Nanang.

Nagpaklebak ket nasiripko iti baet ti datar a kawayan ti bareta a papaala ni Tatang idi sumipnget. Saanko a nabirokan idi kalman. Nakaparabaw daytoy kadagiti salansan ti naputedputed a kayo a pagtungo. Naurnos ti pannakasalansan dagiti kayo. Nagango a nalaing. Narissik dagitoy no maisungrod. Malagipko la ket ngarud ti garakgak ti apuy idi siak ti namisok.

Malagipko pay daytay umok ti kiaw sadiay sagat. Inulik idi tapno apanko kitaen ti tumungtungraraw nga annak ti billit. Ngannganin kumpleto dagiti dutdotda ket kabaelandan ti tumayab. Marigatanda laeng idi a rummuar sadiay abut nga umokda. Kinautko idi ti umok ket sinaggaysak ida nga inappupo ditoy dakulapko. Anian a ragsakko idi siak ti umuna a nakakita iti umuna met laeng a payakpakda ken kayabda ti law-ang.

“Pulitikiaw!” naguni pay ti ina ken amada idi agdissoda met laeng iti asideg a kayo. Pammatalged wenno yagyag ngata ti panangituloy dagiti kaibbuang ti panagtayabda.

(Adda tuloyna)