SARITA: Ti Kopunban iti Dalluyon (Maikadua a paset)

“NAKAIG-IGIDAK la ngaruden, pinaennak pay laeng met!” minisuotan ni Jerry ti drayber ti traysikel a kellaat a nagsikko iti sanguanan ti Plasa Burgos, iti sango a mismo ti munisipio ti Vigan. Kadisdissaagna la itay iti sango ti libreria ket agturong koma iti katedral. Nariknana ti irarasuk ti darana.

“Yo, ke’ no dikay me’ ita nakita…” insungbat ti drayber kalpasan a nagmisuot.

“Agtangatangaka ngamin!” nangmesmes ket inasitganna ti drayber. Iti pattapattana ket ub-ubing daytoy ngem isuna iti tallo a tawen iti edadna a duapulo ket innem. Nataytayag ni Jerry ken namsek dagiti maselna a pinakesset ti talon ken bangkag. Napugot ken narapis ti drayber.

Kinusilapan ti drayber.

“’Nia koma ti kusilapam?”

Ngem pinakaskasen ti drayber ti traysikel sakbay a maidisso ni Jerry ti nalukot a gemgemna.

“DARASUDOSKA a taltalaga! Ikkatem man dayta nga ugalim, kunak ngaruden. Madamdama, isu pay ti pakaisarsarakam. Apay a tinapismo ‘diay baro nga aggatang iti bote ken landok?” dismayado ni Marinelle a nangsita ken ni Jerry kadayta a malem. Addada iti kalsada probinsial iti Sitio La Loma iti wangawangan ti Purok Daya.

“Ket no saurenna met dagiti ubbing nga aglako iti bote. Imbagak laeng a dina sauren dagiti ubbing, minisuotannak ketdin sana kinuna a saanak a makibiang. Immulo ti darak, tinapiskon a, ta dinanton uliten ti agsaur,” inyellek ketdi ni Jerry.

“Wen, ngem saan a rumbeng ti inaramidmo. Kinasaritam koma iti nasayaat ‘diay tao, saanmo a dinangran lattan. Pakairubuam dayta a kinadarasudosmo.”

“Gunggonana a…!”

“No adda kapungtotmo, agpanunotka iti maminsangapulo. No nakaro ti pungtotmo, maminggasut.”

Ngem inyaleng-aleng ni Jerry dagiti ibagbaga ti kaayan-ayatna.

“Idi elementariatayo, ti kinadarasudosmo ti kanayon a pakigubgubalam. Idi haiskul, isu manen ti kanayon a pakibokboksingam. Agingga kadi ita, dimo pay naiyuttot dayta nga ugalim?”

Ngem nagkatawa laeng ni Jerry.

“ITAY pay laeng a napaliiwka a nakatakder ditoy sanguanan daytoy a department store, kasinsin. Ania ti parikutmo, aya?” Saan a nasiputan ni Jerry ti yaasideg ni Randy. “Addaka met ditoy Vigan?”

Mangop-opisina ni Randy iti treasurer’s office iti provincial capitol.  Maysa nga accountant. Kas ken ni Jerry, baro pay daytoy a kinaubinganna.

Agkabsat ti inada. Nasapsapa a nagasawa ti ina ni Jerry. Mangisursuron ti ina ni Randy idi nagasawa daytoy iti inhiniero, isu a nasalsaliwanwan ti panagbiagda.

“Sika gayam, kasinsin. Kasangay ni Marinelle no umay a bulan isu a kumitaak man iti isagutko kenkuana.”

“Adda nakitamon?”

“Dayta man ne, kuwentas nga adda bitinna a sinanpuso. Kuna ti tindera a locker kano dayta.

“Ne, ket napintas nga agpayso, kasinsin!”

“Ti rigatna ket agkurang ti kuartak. Nangina met gayam, yos!”

Minira ni Randy ti kuwentas. “18k gayam dayta!”

Nagsakuntip ni Jerry a nagngilangil. “Yurnongak man dayta, kasinsin.”

“Wen, napintas a sagut dayta…”

“Nalpas ti trabahomon, kasinsin?”

“Agawidak pay ketdin a. Makikalugankan kaniak.” Agabay ti balayda iti Sitio La Loma, Brgy. San Antonio, Narvacan.

“Ala  man ngarud, kasinsin, isu pay ti plete,” nagkatawa ni Jerry.

Dua a babbai ti kabsat ni Randy ken agpadada a nurse idiay London.  Manangisagut ni Randy ken ni Jerry sipud pay idi ubbingda. Kasinsinmo met dayta, isu a bingayam no ania ti adda kenka, kuna ngamin ni Mamang ni Randy.

Pitoda nga agkakabsat da Jerry. Isu laengen ti di pay naasawaan. Isu ti katulongan ni Tata Ikko iti talon. Baldado ni Nana Tasiang kalpasan ti pannakaatakena iti hayblad. Bakka ti awagda iti inana ta sobra ti kinalukmegna nga isu met ti rason ti nakaatakeanna.

“Dadakkelen dagiti mulam a lasona, kasinsin?”

“Babassitda pay, kasinsin. Kapalpalayasko laeng idi kalman.”

“Abonuamon tapno maikagud iti presio ket magatangmo ‘diay kuwentas.”

“Dayta ngarud ti parikutko, insin, awan maigatang iti abono…” nalab-ay ti katawa ni Randy.

“Mano ti bayad ti sangakaban aya? “Dumagastan idiay ili.”

Tinaliaw ni Jerry ti kasinsinna. “Pabulodannak, kasinsin?”

“Wen, bareng magatangmon daydiay kuwentas!” Nagkatawa  pay ni Randy sana kinuldit ti kasla kadakkel ti mais a lumabaga a sallapiding iti mugingna.

(Adda tuloyna)