SARITA: Ti Kopunban iti Dalluyon (Maudi a paset)

“GANADOKA, ita, Jerry…” napaliiw ni Mon.

“Paragsakentayo ketdi ti bertdey ni Ittor…” kinuna ketdi ni Jerry. Nangdutdot iti sangaribu iti petakana ket inyawatna ken ni Richard. “Inka pay mangala iti sangakahon…” Ngem ti kinapudnona, kayatna laeng a lemmesen iti serbesa ti sakit ti nakemna iti inaramid ti kasinsinna. Dina mailiwliwag iti panunotna a maysa a panangliput kenkuana ti pananggatang ti kasinsinna iti yur-urnonganna a kuentas.

Wen, adda karbengan ti asino man a gumatang iti kayatna lalo no adda pagbayadna, kuna ti mugingna. Ngem insulto daytoy kenkuana ta naibaganan iti kasinsinna a yurnonganna ti kuentas. Saan koma a nasakit ti nakemna no impakaammo koma nga immuna ti kasinsinna a gatangennan ti kuentas ta isagutna iti nobiana ta dina pay laeng met magatang daytoy.

Nagdalapdapen ti sipnget. Sumiloden ti nasurok  sangapulo a botelia a serbesa a nainum ni Jerry. Agkiamkiamen ti panagkitana. Saan metten a nalimbong ti umap-apon iti mugingna. Kasla kinirogen a pasayan ti rupana ngem sige pay laeng ti inna panagitangad.

Nainayad a limmabas iti bit-ang ti nalabaga a CRV a nakaisurotan dagiti mata dagiti agiinum. Tallo a balay pay ngata, nagsardeng ti kotse.

Iti law-ang, bimmatogen ti nangisit nga ulep a nangules ti tangatang. Ngem saan a daytoy ti ulep a mangyeg iti tudo itoy a kanito no di nangisit nga ulep a nagintaer iti muging kalpasan ti saan a napagsusurot a tignay. No maminsan ngamin, saan a mapagsusurot dagiti tignay lalo no saan a pagturayen ti komunikasion tapno maamad koma ti ‘apay’ a mangibuksil iti kinapudno.

Napartak ti panagtignay ni Jerry.  Kasla bulkan ti barukongna a pagay-ayusan ti umap-apuy a bato ken darat. Iti lulonanna, aggargarakgak ti saraan gapu iti mulmulmolan ti mugingna. Napartak dagiti askawna.

Iti laud, mangngeg ti napigsa a danarudor dagiti dalluyon iti nadawel a baybay. Adu manen ti lukotlukotenna a riper nga itakdang ken mamulagatan iti kabigatanna.

Nariper la unay iti biag. Lalo iti darasudos a saanna nga ammo a sagadan dagiti umapon a rugit iti panunot wenno  dina ammo nga amirisen ti umno ken saan.

Iti kalsada, agaayam dagiti sumagmamano nga agtutubo ken ub-ubbing. Naglukat ti nalabaga a CRV ket bimmaba ni Randy. Dina nadlaw ti napartak a yaasideg ti nakullaapan ti panunotna.

Nagiikkis dagiti agtutubo ken dagiti ubbing nga agaayam iti bit-ang.

TENGNGA ti aldawen idi sumangpet ni ina. Simrek daytoy iti siled ni Jerry. Riniing ti ina ni Jerry babaen ti panangguyodna ti ules a pinagkumotna.

“Ania ket a panangibabainen ti inaramidmo, anakko?” agsangsangit ti inana.

Nagkiremkirem laeng ni Jerry. Inilutna ti dua a pispisna ta agbitekbitekda iti sakitna. Mariknana a nasakit ti ulona. Hang-over.

“Apay a dinangram ti kasinsinmo? Daytanto met ti kunak. Saanmo a labsen ti aginum ta dimo ammo ti ar-aramidem. No uminumka ipanmo iti buksit a saan ket nga iti ulom!”

Di makatimek. Il-ilutenna ti teltelna.

“Apay a minalom iti botelia ti ulo ti kasinsinmo? Dandanin natay…!”

Pinerrengna ti inana. Di latta makatimek.

“Adda pay laeng idiay ospital. Kagapgapuk la unay a nangbisita kenkuana. Adtoy, adda intedna a para kenka.”

Iti tangatang, awan a pulos ti milatna nga ulep. Nabara ti panawen a kasla adda inna ipalpalagip. Ngem saan a maawatan ti tao nga addaan nangednged nga utek.

Maysa a bassit a kahita ken maysa a surat.  Indisso ni inangna iti katrena ket rimmuaren nga agsasaibbek.

Bimmangon. Nagtugaw iti iking ti katre. Nabayag a minatmatanna dagiti indisso ti inana. Pinidutna ti kahita ket linuktanna. Napamulagat pay idi makitana a ti kuwentas ti linaon ti kahita! Adda payen  naikitikit a naganda ken ni Marinelle iti rabaw ti sinanpuso a bitin ti kuentas ken iti uneg daytoy iti babaen ti ladawanda ken ni Marinelle.

Agtigtigerger dagiti imana a nangbasa ti surat: “Kasinsin, siakon ti gimmatang para kenka. Pinakitikitak ti naganyo a dua ken ni Marinelle iti alahera a kumarik a taga-Boquig, Bantay. Inikkakon iti ladawanyo a kinopiak iti kompiuter. Diak laeng maawatan no ania ti nagbasolak kenka, kasinsin…”

Saan a nakatimek ni Jerry. Dina ammo ti aramidenna. Kasla nalukotlukot a kopunban iti dalluyon.

Marinelle… naiyesngaw ti baro.#