SARITA: Ti Panagsareb Iti Sumipnget (Umuna a paset)

Good morning, sir… agpirmakay’ pay iti guestbook sakbay a sumrekkayo,” nadayaw ti student assistant (SA) a nangitanggaya iti bolpen. Kasla kayatko a patien a saan nga estudiante no di ket nadayaw a diplomatiko. Naalumamay ngamin ti panangibalikasna, nalamuyot a sumrek kadagiti lapayag. Makaguyugoy a denggen. Naipigket dagiti paningsingkiten a matak iti nakadeppa a record book a kunam la no agaw-awis a taliawek met ti biutina. Nagsenias ti maysa pay nga SA itay tapno agsardengak a sumrek iti kasla nganga ti kueba nga alley nga aglawa iti sangaagpa. Iti laingna nga agikumpas iti imana, kasla daydiay “dancing barangay tanod” a katulong dagiti polis iti pannakaurnos ti nakair-irut a trapiko iti siudad. Agpada a lalaki dagitoy nga SA.

Oh, ‘sensiana, awan gagarak a manglabsing ti school’s discipline and conduct,” inisemak ida, pudno nga isem – saan nga isem ti aso no di isem ti tao. Ania ngata ti agapon iti panunot ken rikna dagitoy kasla bouncer ti club no maammuanda ti kinapudno? Tinapayak ti nangisit a clutch bag iti sangoda ket inggagarak nga inin-inayad a linuktan. Naobserbarak a nakapigket dagiti matada iti ar-aramidek. Inruarko ti school IDk, inin-inayadko nga impangato ket naisurot met a nagpangato dagiti uloda. Kasla singin a kabus dagiti matada a mangmulmulagat iti lubong. Naidumduma ti bileg ti school ID, kasla daydiay pendulum a maar-aramat iti hipnotismo a mangbalbaliw iti panunot. Nabalbaliwan ngatan ti linaon ti isipda ta nakangangada nga agpadpada iti pannakaikulengda. Naimbag ta kasla gemgem ti kadakkel ti utek ti ngilaw a madama a mangiwaywayat iti reconnaisance iti lugar ket saanna a sinerrek dagiti kueba ti ivory ta no nagbiddut matalimudaw la ketdi gapu iti makasamal nga alingasaw ti sumagmamano nga ebony.

Bye, guys!” Inayad laeng ti pannagnak ta adda nutnutnotan ti mugingko nga aramiden dagitoy dua a nakimat. Siguradok nga agpabettak la ketdi iti bomba nuklear dagitoy a mokong. Maysa nga eksklusibo a bomba nuklear a siak laeng ti matamaan.

Estudiante gayam daydiay a lakay,” napigsa ken nadagsen ti pannakaibalikasna.

Wen ngarud! Ti ammok ket ahente ti puneraria!” inlaaw met ti maysa. Makatitileng ti ellekda, kunam la no adda barrairong a mangkikkiki-mangkurkurikor iti purriitda. Nalaokan iti uyaw ti kantiawda. Kasla kayatko a patien a musika manipud iti nagduduma a tambor ti panagdengngegko iti panangbanugbogda ti rabaw ti lamisaan.

Kolka lang, pops, imbalakadko iti bagik. Nariknak ngamin a kasla puypuyotan ti electric fan dagiti rumrumsik a beggang ti lulonak. Adda aya maitedna a nasayaat ti bumegbeggang a lulonan? Awan, saan kadi? Masinitka laeng no adawem nga ipuni. Saan laeng a madadael ti katay iti pannakiapa no di pay mangipaay iti miserable a biag.

Adda dagiti gundaway a nasken a waywayan ti tao ti kurdon ti sapatosna uray no daytoy ket makatkatawaan wenno maidadanes. Naim-imbag met iti lapayag daydiay agkatkatawa ngem dagidiay agrapido a ngiwat a dagiti inigges ken agnannana ken agruprupsa a balikas dagiti maipugso a bala. Naim-imbag iti rikna a denggen ti katawa ngem kadagiti pinnaltogan ken binnombaan kadagiti gubatan, saan kadi? Iti panagkunak, kaykayat ngata met ti kaaduan a denggen dagiti garakgak uray no natibnokan iti arbis ngem kadagiti patutsada dagiti tattao nga agaapa gapu laeng iti porsientoda wenno kikbak. Naim-imbag nga adayo ti pannakaawat ngem ti addang a di maikanatad iti sibilidad. Diak kayat a madadael ti aldawko ita, isu a ti kasayaatan nga aramidek ket, abante ako!

Sir, dakayo kadi ti instraktormi?” timek ti babai iti kannigidko. No diak nagbiddut, daytoy ‘tay napaliiwko itay a katimtimtimek ken kaporporma ti artista a ni Valerie Concepcion. Diak nga inkaskaso ta madamaak nga agtetext. Adda ngamin naawatko a text manipud iti maysa a gayyem. Naulit ti saludsod. Inwarasko ti panagkitak. Siak iti kaasitgan ken ni Valerie, ket napanunotko a nalabit a siak ti kasasaona ta nakapigket met kaniak dagiti narangrang a matana.

Saan. Estudianteak met.” Pinatademko dagiti lapayagko. Arasaas. Dagiti bumegbeggang nga arasaas. Dagiti makasinit nga arasaas.

Laklakayanen, agis-iskuela pay laeng?”

Lolo daytan, ket!”

Mangegnakayo. Madamdama, saan nga agpasakar dayta, datayo met laeng ti maabakan…”

No adda pay linaon ti utekna, a!”

Bawal ang beans…!” kuros.

Bawal ang pork…!” immadu ti bilangda a kuros. Ket napno ti Room 204 kadagiti garikgik ken paggaak ken dagiti kalampag dagiti tugaw. Adda pay sumagmamano a tinniplak dagiti dakulap a nangngegko iti likudak. Dandanik naibbatan ti de-scotch tape nga N73.

(Adda tuloyna)