Footer

SARITA:Dungdungnguenkanto Unay Unay (Maikadua a paset)

Inkallaysa ni Noli ni Adora a di immatendar dagiti dadakkelna. Ni laeng manangna a Minda ti nangbayabay kenkuana idi nagkallaysada ken Adora sadiay St. Joseph Church. Nadekket ken nasaranay ni Minda nga inaunaanda. Ni Manangna ti mangpatpataray kadagiti negosio ni papana a maysa a three-star hotel ken uppat a lodging house. Ti maysa pay a manangna ti mangpatpataray kadagiti beach resortda iti La Union ken Pangasinan. Ti manongenna a lalaki ti kadua ni papana a manarawidwid kadagiti negosioda iti Metro Manila, Clark ken iti Cavite.

Nangipatakder ni Noli iti bukodna a negosio, ti Amazing Grace Travel and Tours. Immutang iti ninongna iti buniag iti pinangnayonna iti inutangna iti bangko a nagpuonan. Naragsak da Noli ken Adora. Ngem kalpasan nga impasngay ni Adora ti umuna nga anakda, nagsakit ti ina iti amniotic fluid embolism. Kasla agedaden iti limapulo iti edadna a tallopulo. Pinalaylay ti karkarna a sakit dagiti babbai. Balud iti wheelchair ni Adora: saan a makasao no di ket agareng-eng sana isenias dagiti agkakawweng a ramramayna; saan a makapangan no di subuan; saan a makarugit no di tulongan; nasken a digosen ken pellesan.Ti nalangto ken ni Adora ket ti isemna ken dagiti naraniag a matana; ti pingetna a makidangadang iti sakitna; ti reggetna nga agbiag. Saan a manhid ni Noli tapno dina marikna ti sagsagabaen ti asawana. Ngem apay a kayat dagiti dadakkelna a pagsinaen ida? Saan kadi nga umanay ti pannakailunodna a kas sukir nga inanak, no maawagan a kinasukir ti inaramidna?

“AMMOK a nalidayka, Noli. Adtoyak. I love you…” nalanay dagiti mata ni Renely, ket kasla inrantana nga inikkat ti dua a butones ti nalabaga a blusana tapno ipakitana ti puon ti nabaknang a barukongna.

Daytoy ti dina pagayatan iti balasang, nadursok. Agkataytayagda iti lima a kadapan ken pito a pulgada. Pamudawen ti balasang ken addaan iti makaay-ayo a rupa ken immal-o a pammagi. Agkasosio ti ama ti balasang ken ni papana iti maysa a negosio. Tapno maadaywanna idi ti balasang, nagkolehio ken nagnaeden ni Noli iti Baguio . Ngem sinurot ti balasang ket nangipatakder met iti travel agency iti Siudad Dagiti Saleng.

Saan a nakatimek ni Noli. Saan a kinabaelan ti aircon ti opisinana ti bara a marikriknana. Masansan nga itugotna iti opisinana ni Adora. Adda pay laeng tugaw ken lamisaan daytoy. Ngem itay agsapa, nariinganna nga aguy-uyek ti asawana isu a dina insurot. Inliadna iti executive chair.

“Don’t tell me a colorful ti sex life-mo iti asawam a kasla nalaneten a petsay,” nasarangsang ti manutsutil a katawa ti sangaili.

“Do you think it is healthy to have sex with a physically handicapped wife?” mabusor ni Noli.

“Of course not! Isu nga ammok, you’re a hungry horse, boy! Adtoyak. Nawayata nga aramiden no kayatmo…”

“I love my wife…”

Naggarakgak ni Renely. Timmakder. Nagpalikud sa immarakup daytoy. Nabara ti marikrikna ni Noli. Inwadagna ti balasang. Minisuotanna.

Duuut!!! Duuutttt! Duuuuutttttt!!!

“Shit dayta nga isturbo!” nagtabbaaw ni Renely idi ginaw-at ni Noli ti intercom.

“Okey, please come in, Rizza…” insungbat ni Noli.

“Excuse me, Miss Buencaflor. Kasapulan a kasaritak ni sir, mabalin?” pinerreng ni Rizza ti sangaili. Pormal ‘toy assistant ken talken ni Noli. Best friend ni Adora.

“Renely, please, mabalin kadi?”

“Okey! Innak iti parking. Nabatik ti cigarette case.” Kunam la no pato ti iniin ti patongna a rimmuar.

“Ania nga importante dayta, Rizza?”

“Sir, narigat ti makibiang, ngem apektadokami met. Imbilangmi a kabsat ni Adora. Nasao idi ni Adora ti kinaasino daydiay a babai. Umaynaka la ketdi gargarien…”

“No! Nagbiddutka…”

“Amman , sir! She’s trying to seduce you so that our agency and her would merge together!”

Napaliad ni Noli iti tugawna. Nagsakuntip idi malagipna ti nabayagen a business proposal ni Renely. Nakaangot iti nalaes nga ikan.

“What’s wrong if the two agencies merge, Riz?”

“Of course, it’s not favorable to us, sir! Ngilngilawen ti agencyda. Nakaad-adu ti klientetayo. No agtiponda, isu ti mangrienda iti agency ta ad-adda met nga addaka iti sibay ni Adora. Mapadakkeltayo met a bukod ti agency, sir. Intedkon kenka ti feasibility study ti expansion program. If you believe…. and trust…”

Saan a nakasungbat ni Noli. Awan ti raniag dagiti mata ni Rizza a nagpakada. Nailukat ti ridaw. Simrek ni Renely. “How about dinner, honey?”

“Sorry, my wife and my child are waiting for me. Dinak koma metten singaen. I need some space, please…” ket nagdardarasen ni Noli a rimmuar. (Adda tuloyna)