Footer

SARITA:Dungdungnguenkanto Unay Unay (Maikanem a paset)

Dinillaw ni Leonard ni Noli: “Diak nakita ti determinasionmo nga agtaray, p’re…”

“Kurang ti praktis…” inaminna iti race organizer.

“No addanto manen fun run, will you join again?”

“Yes… Rugiak manen ti agsanay. Uray iti bisikleta. Kas iti sigud… ”

Naikabil iti sports page dagiti lokal a pagiwarnak ti pannakisalipda nga agassawa ken iti isasalipdanto manen kadagiti sumaruno a fun run.

KADA Domingo, kalpasan ti pannakimisada sadiay Pink Sisters Church iti Brent Road, itarapnos ni Noli ni Adora iti kadakkelan a mall iti siudad. Agay-ayamda kadagiti video games. Iluganna ti asawana iti bump car. Saklotenna no aginternetda: online ken LAN games, chat, ken surfing. Agiposteda a dua kadagiti notes, dandaniw ken ladawanda nga agassawa iti blosgsiteda, ti www.kamalig.blogspot.com. Mangaldawda iti mall sadanto agawid.

Inunnat ni Noli ti wheel chair nga innalana iti likudan ti berde nga Adventure nga imparkingna iti lower ground level ti pasdek, naannad nga inubbana ti asawana sana impatugaw ken induron ti wheel chair a nangkamang iti elevator. Sumursurot iti likudanda ni Mariel a nakaubba ken ni Rochelle. Iggem met ni Trisha dagiti dadduma pay a gamigamda. Caregiver dagitoy dua a babbalasang a susuelduan ni Noli.

Naglukat ti elevator. Innuna ti sumrek, dinnuron agingga iti napekpek. Dida nakastrek. Nagrikep ti elevator, kunam la no ridaw ti gimong ti nangrikep iti biagda.

“Thoughtless people…!” tinaliaw ni Noli ti nagtanabutob a baket a nakapantalon iti gimmatas, puraw a blusa ken gimmatas a blazer. Nagduaan pay ti makaunget a baket ti nagbaniekes. Pamudawen a kas ken ni Noli ken agkataytayagda ngata iti walo a kadapan ken pito a pulgada.

“Mommy, your mouth…!” nagmulagat ti lakay iti kanawan ti baket: nakapolo iti sabongan, nangisit a pantalon ken nagsapatos iti lalat. Naipinas ti pumurawen a buokna. Nasabang ti barukongna iti edadna ngata a nasurok a sisenta. Kataytayag met laeng ti baket.

“Look, dad, nakitada la ngaruden a naka-wheel chair, unaanda pay laeng!”

“It’s okey, nana. Nairuamkamin iti kastoy,” kinuna ni Noli.

“You mean, kanayon a mapasamak daytoy?”

Immisem ni Noli. Kinaykayatna ti nagulimek. Ta pudno met a kanayon a kastoy ti eksenada iti elevator. Yalikakana ni Adora isu a dina kayat ti makiinnuna ken makisinneksek.

Idi naglukat manen ti elevator, timmulong ti lakay ken ni Noli idinto ta nagpakaasi ti baket kadagiti padada nga agur-uray nga ikkanda koma iti espasio ti naka-wheel chair.

“Thank you, sir, ma’am…” .

“”Niat’ naganmo, iha…”

“Ungg…ungghh..!” nagsenias ni Adora nga umis-isem.

“Adora, nana…” ni Noli ti simmungbat.

“Your sister?” binagi met ti lakay.

“No, sir, she’s my better-half. Agsakit iti amniotic fluid embolism kalpasan nga impasngayna ti umuna nga anakmi, ni Rochelle…” inaprosanna ti ulo ti anakda nga agsussuso iti bote ken ubba ni Mariel. Nadlaw manen ni Noli a naiturong kenkuana dagiti adu a mata. Ngem nairuamen kadagiti kakastoy nga eksena.

“AFE, the most dangerous and untreatable condition in obstetrics, right, dad?”

“Right. A rare and a very complicated maternal illness. A serious and even fatal maternal complication of delivery. While its cause is unknown, it is one of the leading causes of maternal mortality in developed countries, accounting for seven of 44 direct maternal deaths in Canada from 1997 to 2000. We need a miracle to survive…” insennaay ti lakay a nangapros iti tuktok ni Adora a naulimek a dumdumngeg, nakadumog ken nangsaklot kadagiti imana.

“Oh, there are so many miracles in every second, dad!”

“I am always praying for miracle, sir, ma’am.”

“You should do that, iho…!” nagduaan pay ti baket a pinekkel ti kanawan a takiag ni Noli sa nagtung-ed. Nabagas ti perrengna..

Third Level. Naglukat ti elevator. Timmulong ti lakay iti iruruarda. Nagyaman manen ni Noli kadagiti ganggannaet.

“It’s just a mountain, son. Awan ti bantay a di mauli…” pinekkel ti lakay ti kanawan nga abaga ni Noli.

“You know, son, nakalawlawag ti bangir ti lenned a rabii. Dika koma maawanan iti namnama,” kinuna ti baket sana binesobeso ni Adora nga umis-isem.

“Diakto maawanan iti namnama, ma’am! Thank you very much for your support.” Tinipedna ti riknana ta bimmara dagiti matana. Adda pay laeng sumagmamano a mangisakit kadagiti addaan an-annayen. Dagiti kakastoy a pammakired ti kasapulanna. Thanks, Jesus Christ, I know, addaka iti sibaymi… tinangad ni Noli ti puraw a bubongan.

(Maigibusto)