Sarsuela con comedia y politica

ni Arlane P. Manzano-Ellorin

 

AWANEN a talaga ti panagdur-as ti pagilian, kabagis. Ne! ipakamaysa metten dagiti “madaydayaw” ti agpipinnangato iti turayok. Awan ti paabak, usarenda amin nga ammoda a wagas, uray pay kaipapanan ti pannakadadael dagiti kakaduada. Baddekanda amin a masalaponda. Sin baribari. Naimbag pay ni apong ta ibagana a dimi liplipatan ti agdayodayo no makipagnakami iti babaet dagiti bunton.

Pulitika ditoy, pulitika sadiay. Makauma pay ketdin. Ala, uray sika man, kabagis, no kanayon laengen a marunggay, agsiudotka pay a sumango. Makapa-high blood!

Nakakatkatawa dagiti pasamak. Kaslada la ubbing nga agaapa wenno dagitay aso nga agaangat no madugsakmo ida iti mamindua-mamitlo ngem dagitoy “madaydayaw” (puera de los buenos!) a kunkunak, numona ta maipabuya pay met iti telebision ti sarsuelada. Mabuyam pay ida kadagiti patalastas! Aglalo no eleksion manen, kabagis! Agpipinniltakda manen kadagiti bukodda a rugit. Agpipinnuligadda manen kadagiti aramid a di masinunuo no ania ti pudno. Ulawenda dagiti tattao ta inton madanon ti panagbubutos, nalakanto laengen a mautoda. Wen a ta dayta la ngarud ti kalikagumda.

Pulitika, pulitika. Nabileg unay, kabagis, awan a pulos ti lisianna. Nam-ay ti ikarkarina dayta kunada. Agpayso met ngata a ngem amin a nalabes ket saan a nasayaat ti itdenna. Mapasaran amin a rigaten, pulitika pay laeng ti magna, Idi panagtatabako, adu ti nangikari a sumayaat ti presio, ngem ania ti napasamak? Adu a babassit a mannalon ti naglinglingaling lattan gapu iti nakaro a pannakaupayda. Apagabrot dagiti gastosda. Adu a kari ti saan a natungpal; adu a namnama ti narsaak agraman ti naannayas koma a panagadal dagiti annak. Nadanon ti panagtutudo, pagay manen ti namnamaen dagiti pada ni tatangko a mannalon. Ngem adu manen a parikut aglalo iti padanum. Aglalabbet a sakit ti pagay ti mapaspasaran dagiti mula. Awan man laeng ti saranay nga aggapu iti gobierno (no adda man, sangkatipping a kuna). Wen a ta sabali man metten ti maar-aramid. Ti ketdin isyo laeng ti maymaysa a tao ti binbinnatenda a pagpapatangan. Naminpinsan sa met laengen a tinallikudanda dagiti tattaoda. Ania ngarud ket nasayaat unay nga exposure dayta nga isyo. Pogi points kunam man! Maitibika, madika pay? Corruption, kabagis, nabayagen nga isyo dayta, agingga ita, isu pay laeng ti dulduldolenda ngem awan met ti makita a pagsayaatan dagiti debateda agraman dagiti linteg kampay idi a mangkeltay iti daytoy.

Uray ta kalpasan ti panagpapagay, panagtatabako manen. Nakakatkatawa. Sabalinto manen a sarsuela. Kakaasi la ngarud nga agpayso dagiti babassit.

Naimbag la ketdin ta adda F2, a nangandingay bassit kadagiti mamirmirauten a bulsa ni Pinoy nga uray man nangina dagiti tiket, inkarigatan dagiti kadaraan ti gimmatang tapno malipatanda ngata met dagiti makapaksuy a mapaspasamak iti pagilian. Dagiti padak a saan a nakabael, nagtatakkonandan a binuya ida iti TV. Naimbag la a pagliwliwaan. Uray no dadduma ket masimronnak metten kadagiti dadduma a maipabpabuya ta no labsen ti manarita, isu la nga isu ti maipadpadamag, dagiti agbibiag ket di pay ketdin mabaliwan. Numona ta awan met marikna a pannakairanud kadagiti pagsayaatan (no adda man)!

Itay nabiit, sinangailitayo ni Presidente Obama manipud Amerika. Adu manen a ti nakisawsawen. Dagitoy kunada a “kulang sa pansin”.  Adu manen a panaginkukuna ti naimatangan. No apay ketdi nga ugalitayon a Pinoy ti agpammarang tapno laeng agbalin a “good impression” ti maawattayo a komentario manipud kadagiti agbalin a sangailitayo.

Awan ti nasakit a papangresak kadagiti mangituray kadatayo, kabagis, ngem apounayen ta di met maaluadan ti agsennaay kadagiti mapaspasamak. Sika, masmasnaayanka kadi met?#