Satellite TV, naiwaras kadagiti upland barangays

VIGAN CITY – Regularen a mabuya dagiti agindeg iti ginget ti bambantay dagiti programa ken aktibidad ti gobierno iti sangkapagilian kalpasan a winarasan ti gobernador ti probinsia iti linia ti satellite TV dagiti amin a barangay iti sangapulo ket uppat nga upland municipalities iti Ilocos Sur.

Naan-anay a naikabit dagiti satellite disk iti barangay hall kada barangay idi panagtapos ti Pebrero ket madaman a pagnanaaran dagiti agindeg kadagiti nadumaduma a barangay dagiti upland municipalities.

Kinuna ni San Emilio ABC President Alberto Balbin a manipud naikabit ti linia ti satellite TV iti lugarda, adun kadagiti kabarangayanna iti Sibsibu ti aguummong nga agbuya iti lugar a nakaipuestuan ti satellite disk iti barangayda tapno buyaenda dagiti mapaspasamak iti sangkapagilian.

“Nangaramidkami iti iskediul iti panagbuya dagiti kabarangayanmi tapno naan-annayas met laeng. Napagpapatanganmin iti kakaduak iti konseho nga inton umay a tawen,   pagbibingayanminto ti pagbayad iti pannakaitultuloy daytoy tapno saan a maksayan ti pondo ti barangay,” kinuna ni Balbin.

Kinuna met ni Barangay Kagawad Resurreccion Hinajon ti Casilagan Norte, Banayoyo a dakkel a banag ti kaadda ti nadakamat a proyekto iti barangayda ta regularen a makitkitada dagiti kaudian nga aktibidad ti gobierno a naipaidam kadakuada iti napalabas gapu iti kaawan ti linia ti cable television a dumanon iti ilida.

“Libre met ti cardna iti makatawen isu a silulukat ti barangay hall para iti amin a bumarangay. Iti sumaruno a tawen, mangilatangto ti barangay council iti pondo para iti pannakaitultuloy daytoy,” kinuna ni Hinajon.

Kabayatanna, maysa a multicab ti impaay ni Gov. Luis “Chavit” Singson iti ili a San Emilio bayat ti panagpiesta ti ili idi Marso 9. Naipaay ti nadakamat a lugan tapno maaramat nga usaren ti barangay nangruna iti emerhensia a kasapulan. Namarkaan daytoy iti Community Health Access Vehicle Intended for Barangay Transportation.

“Maysa manen daytoy a proyekto ti gobierno probinsial a naipaay iti ili a San Emilio. Mangipakita daytoy a saannatayo a baybay-an ti gobernadortayo nupay addayotayo iti sentro,” kinuna ni Mayor Ferdinand Banua.#