Saturation drive dagiti pagtagilakuan, insayangkat ti DTI

VIGAN CITY – Nangisayangkat ti Department of Trade and Industry iti saturation drive kadagiti sumagmamano a tiendaan publiko ditoy probinsia a naginspeksionanda iti pagkiluanĀ  ken presio dagiti tagilako.

Naammuan ti Tawid News Magasin a nagbisita ti DTI iti San Juan, Tagudin, ken Magsingal idi Agosto 20, 22, ken 28 ket naginspeksionda ti presio dagiti tagilako iti tiendaan publiko dagitoy nga ili.

Kangrunaan a kinita ti DTI no husto met laeng ti pagtimbangan dagiti aglaklako iti tiendaan tapno saan a magundawayan dagiti aggatgatang.

Ininspeksion pay ti DTI dagiti presio dagiti tagilako no saanda met la a ngimmina unay iti sanguanan ti kalamidad a sinagrap dagiti nadumaduma nga ili iti probinsia.

Naidagadag kadagiti aglaklako ti panangikabilda iti price tag kadagiti lakoda a pakairamanan ti natnateng, bagas, ikan, karne ken groseria tapno mapagkumparar dagiti aggatgatang dagiti presio dagiti tagilako kadagiti nadumaduma a pagtagilakuan.#