Savellano, linagidawna pannakadadael dagiti landmark ti probinsia

CABUGAO, Ilocos Sur – Ilunglungalong ni Vice Gov. Deogracias Victor Savellano ti pannakabuangay ti maysa nga opisina a mangbantay kadagiti daan a landmarks a pakakitaan iti historia ti probinsiatapno saanda a magaraw wenno madadael.

Kinuna ni Savellano a maalarma iti pannakadadael dagiti landmarks iti probinsia, kas iti “pannakabarengbareng” ti rangtay sadiay Bantay gapu iti road widening nga iwaywayat ti Department of Public Works and Highways.

“Dayta ti gapuna nga ilunglungalongko ti pannakapaadda ti maysa nga opisina iti probinsia a mangkita iti pannakasaluad dagiti daan a landmark tapno saanda a mapukaw a “pakakitaan iti historia ti probinsia,” kinuna ni Savellano bayat ti interbio kenkuana ni Jun Ramos, anchorman ti Barangay Commando Brigada a naipatangatang iti DWRS.

Kinuna ni Savellano a kasapulan a saluadan dagiti daan nga istruktura iti probinsia agsipud ta maysa a heritage city ti Vigan ken maysa met a heritage province ti Ilocos Sur.

Kinuna ti bise gobernador a mabuangay koma kadagiti nadumaduma nga ili ti maysa nga opisina a mangkita iti preserbasion ken pannakasaluad dagiti daan a landmarks iti lugarda, kas iti Vigan City nga adda binuangay ti gobierno ti siudad a heritage preservation and conservation council.

Kinuna ti bise gobernador nga adda resolusionna a bayat ti pannakabangon ti museo iti likudan ti provincial capitol, adda madutokan nga inhiniero ken arkitekto ti probinsia a mangadal no kasano ti preserbasion tapno maprobetiar ti kaadda dagitoy nga eksperto iti konserbasion dagiti daan nga istruktura.

Kinuna ni Savellano a simple laeng dagitoy a banag ngem dakkel ti kaipapananna para iti sumarsaruno a henerasion.

“… no mapukaw amin dagitoy, saandanton nga ammo ti naggapuanda,” kinuna ti bise gobernador.#