Scholarship program ti gobierno probinsial iti UNP, agtuloy

VIGAN CITY – Makaanges iti nalukay dagiti provincial scholars ta nagkinnaawatan met laeng ti opisina ti gobernador ken ti University of Northern Philippines ket agtultuloy latta ti scholarship program ti gobierno probinsial iti nasao a pagadalan.

“Napagpapatangan nga awan daydiay problema a rumrummuar a cancelled wenno suspended ti scholarship program…ket agtultuloy latta ti scholarship programtayo in partnership with UNP,” waragawag ni dati a Bokal Annaliza Europa-Morales a naipatangatang iti DWRS itay nabiit.

Kinuna ni Morales nga idi Mayo 9, nagpapatangda kada Dr. Lauro Tacbas, presidente ti UNP, Dr. Gilbert Arce, dean ti student affairs, ken Mariano Avila, incharge iti scholarship program “tapno malawlawagan, maurnos ti problematayo iti scholarship program.”

Imbagian ni Morales ti opisina ti gobernador.

Rimmuar ti nasao nga isyo idi nagparang ni Arce iti sangguniang panlalawigan ket impalgakna a maysa a resolusion ti inaprobaran ti scholarship committee ti UNP a mangsuspenso iti scholarship program ti gobierno probinsial mangrugi iti school year 2008-2009 agingga a saan a mabayadan ti utangna iti panagbasa dagiti iskolar daytoy iti nasao a pagadalan.

Ngem kinuna ni Morales a nagbiddut ni Arce iti imbagana a saan a nakabayad ti provincial government para iti 1st semester ti 2007 ta idi Abril daytoy a tawen, binayadanda ti P563,040.00 para iti nadakamat a semestre idinto a magmagnan ti voucher para iti second semester.

“Kas kunak idi, saan met a taltallikudan ti provincial government ti arrearstayo iti UNP,” kinuna ni Morales, idinto nga inyunay-unayna nga “on time” ti panagbaybayad ti gobierno probinsial mainaig iti tuition fee dagiti scholars iti nasao a pagadalan.

Segun ken ni Morales, mangaramid ni Dr. Tacbas iti executive order a mangwaswas iti resolusion a temporario a mangsuspenso iti scholarship program ti gobierno probinsial kas inrekomenda ti scholarship committee ti UNP.

Kinuna ni Morales a bayadan ti gobierno probinsial dagiti arrearsna iti UNP ngem “saan a magulpe diay P5 milion no di babaen ti staggered basis.”

Kabayatanna, kinuna ni Morales a kiniddawna iti UNP a mangisagana iti memorandum of agreement para iti scholarship program iti College of Law ken College of Medicine.

Kinuna ni Morales a minimal pay la dagiti aplikante ket kiniddawna a mangi-draft ti UNP no ania dagiti kualipikasion wenno criteria para iti scholarship kadagiti nasao a kurso.#