School canteen, natakawan.

SINAIT, Ilocos Sur – Karigat ti panagbiag ket uray sensilio a naglakuan ti canteen ti pagadalan, saanen a pinakawan dagiti mannibrong.

Idi agsapa ti Hulio 26, inreport ni Remajyae Guzman y Ceasar, 31, naasawaan, mangisursuro iti Sinait West Central School a masarakan iti Barangay Macabiag ditoy nga ili, a natakawan ti canteen ti pagadalanda a mapapati a naiwayat idi rabii ti Hulio 25.

Kinuna ni Guzman a malaksid a natakaw ti naglakuan ti canteen a sensilio ken dadduma pay a tagilako nga agdagup iti P3,500, dinadael pay dagiti mannanakaw ti dua nga electric fan, flower vases ken pinag-otda dagiti masetas ken mula a nateng iti school campus.

Nakastrek dagiti mannanakaw iti uneg ti canteen babaen ti panangdadaelda iti steel grill ti balkonahe iti likud ken iti lauden a paset ti paglakuan.

Iti pannakaisurat daytoy, di pay nabigbig dagiti suspek a nangiwayat iti panagtakaw.#