School supplies, naiwaras kadagiti pagadalan

CANDON CITY – Nagiwaras ti gobierno probinsial babaen ti panangidaulo ni Gov. Ryan Singson kadagiti school supplies kadagiti agbasbasa iti elementaria iti Divison of Candon City ditoy itay nabiit.

Agdagup iti 3,634 nga agbasbasa manipud iti 32 a pagadalan iti siudad ti nawarasan iti school supplies a pakairamanan dagiti notebook, lapis, ballpen ken dadduma pay a kasapulanda nga agbasa.

Tallo nga aldaw a nagiwaras ti grupo a pakaibilangan da Bokal Jaime Singson a nangibagi iti gobierno probinsial, Candon City Councilor Kristell Singson-Martinez, ken babaen ti pannakikammayet ti Division of Candon City nga idadauluan ni City Division Supt. Gemma Tacuycuy.

Naiwaras dagiti school supplies kas paset ti programa ti gobierno probinsial a makatulong iti panagbasa dagiti agad-adal iti pampubliko a pagadalan iti probinsia. (Danny Antalan)