Sea green turtle, nadaklisan iti baybay

CABUGAO, Ilocos Sur – Maysa a pawikan ti nadaklisan dagiti mangngalap iti kabaybayan a sakup ti Barangay Namruangan ditoy nga ili idi Agosto 24, 2016.

Segun ken ni Milagros R. Paz, AT-DA ti lokal a gobierno ditoy ken maysa a lisensiado a fish examiner, agarup alas 2:00 iti malem ti nadakamat a petsa idi nadaklisan ti pawikan iti kabaybayan a sakup ti Barangay Namruangan  nga indauluan ni Barangay Captain Robertson R. Gorospe.

Maawagan iti sea green turtle, agatiddog ti pawikan iti 41 sentimetro ken agakaba iti 35 sentimetro.

Imbulos met laeng dagiti mangngalap ti pawikan iti baybay idi agarup 3:00 iti dayta met laeng a malem.

Dinayaw ni Paz dagiti lumugar ta saanda a dinangran ti pawikan a karaman kadagiti endangered species.

Kas sagudayen ti RA 9147, masalakniban dagiti nabiag (iti baybay) a karaman kadagiti endangered species ket mamulta dagiti mangdangran wenno mangdunor kadagitoy iti minimum nga 4 a tawen ken maysa nga aldaw agingga iti 6 a tawen ken/wenno P50,000.00 agingga iti P500,000.00.

Iti kallabes, addan dagiti pawikan a natiliw dagiti mangngalap ditoy nga ili ngem imbulosda met laeng iti kabaybayan.#