SEAIR, mamindua iti makalawas nga agbiahe iti Vigan City

VIGAN CITY – Sangapulo nga aldaw manipud naangay ti Consultation Dialogue with Ilocos Sur Tourism Stakeholders and LGUs idi Pebrero 15, pormalen a nairugi ti rota a Manila-Vigan-Manila ti Southeast Asian Airlines (SEAIR) idi Pebrero 25.

Iti alas-dos ti malem ti daytoy nga aldaw, simmanglad ti 32-seater nga eroplano iti Vigan Airport iti Barangay Mindoro itoy a siudad a nagbalin a simbolo ti kaaddan ti biahe ti eroplano ditoy.

Karaman kadagiti nangsaksi itoy a pagteng da Gov. Luis “Chavit” Singson, Vice Gov. Deogracias Victor Savellano, SEAIR Vice President for Flight Operations Adelberto Yap ken dagiti dadduma pay a sangaili a naggapu iti nadumaduma a sektor.

Iti panglukat a programa, dinawat ti gobernador kadagiti umili a suportaranda daytoy kaaddan ti biahe ti eroplano iti probinsia ta daytoyen ti mangiyasideg iti Ilocos Sur iti Metro Metro.

“Babaen itoy, umadu dagiti turista a pumasiar iti probinsia ket kagiddan daytoy ti panaggaraw met ti ekonomia ditoy. Maysa ngarud daytoy a dakkel nga addang para iti panagdur-as,” kinuna ni Singson.

Kinuna met ni Savellano a daytoyen ti gundaway a maipakita ti Ilocos Sur dagiti ipampannakkelna a lugar,  makan ken produkto, kasta metten ti nabaknang a kultura dagiti umili.

“Ituloytayo a pasayaaten dagiti festivalstayo tapno adda umay arugen dagiti turista ken masapul a pasayaatentayo ti serbisio nga agpaay kadagiti sangaili tapno maguyugoyda nga agsublisubli ditoy,” innayon ni Savellano.

Iti press conference a naangay kalpasan ti programa, impalgak ni Yap a mamindua iti tunggal lawas ti biahe ti eroplano. Tunggal Biernes, sumanglad iti Vigan Airport iti alas-2 ti malem ken agsubli iti 3:30 PM, idinto a tunggal Domingo, 3:30 ti malem  ti isasangpetna ken agsubli iti 4:30 PM.

“Makatulong ti SEAIR iti pannakaitandudo ti turismo ditoy Ilocos Sur ta agallukoykami kadagiti turista nga umay aglugan iti eroplano. Maallukoymi ida babaen ti panangipadamagmi ti kaadda dagiti napipintas a luglugar a masarakan ditoy a mabalinda a pasiaren,” kinuna ni Yap.

Innayon pay ni Yap a naannayas ti panagsanglad ti eroplano iti eropuerto gapu ta eksakto ti kalawa daytoy a 1,200 a metro para iti 32-seater nga eroplanoda. Nupay kasta, adda limitasion ti oras a mabalinda a panagbiahe gapu ta awan ti silaw ti runway.

“Masapul a maaddaan iti silaw ti runway tapno mabalin ti eroplano ti tumayab ken sumanglad iti rabii. Ita, kasapulan a makatayab wenno makasanglad sakbay ti sumipnget. Tapno makadisso met a nasayaat dagiti daddadakkel nga eroplano, masapul a manayonan iti uray 500 a metro ti kaatiddog ti runway,” kinuna pay ni Yap.#