Security guard, nagpaturong iti paltog, inaresto dagiti polis

STA. CRUZ, Ilocos Sur – Tiniliw dagiti polis ti maysa a security guard gapu iti panangpaturongna iti paltog ti maysa nga estudiante idi bigat ti Oktubre 23.

Nagreport iti polis ni Marvin Sibolboro y Calannu, 15, fourth year high school ken residente iti Barangay Gabur Norte, Sta. Cruz, Ilocos Sur a pinaturongan ni Jaime Julio y Dao-ayan, 30, baro, security guard iti Aloha Hotel a masarakan iti Candon City ken residente iti Barangay Calaoaan, Sta. Cruz, Ilocos Sur.

Segun ken ni Sibolboro, agdaldaliasat iti national highway a sakup ti Barangay Saoat ditoy nga ili a nakalugan iti motorsiklona idi dinungpar ti motorsiklo a minaneho ni Felipe Julio y Dao-ayan, a nakiluganan ti suspek.

Mapapati a pinaturongan ni Julio iti paltog sana kinuna: “Gagoka, kayatmo ta patayenka?”

Kinuyog dagiti polis nga indauluan ni PInsp. Mendoza ti biktima a nangsawar kadagiti dua ket nakitada dagiti suspek iti maysa nga inuman iti Barangay Calaoaan.

Idi immasideg dagiti polis, pinadas nga inlemmeng ti security guard ti paltogna ngem nasiputan dagiti pannakabagi ti linteg ket dinis-armada.

Idi awan ti maipakita ti suspek a dokumento nga agtagikua iti nasao a paltog a cal. 38 a marka Armscor 202 ken addaan Serial No. 1150855 a nagkarga iti uppat a bala, kinumpiskada daytoy sada inkuyog dagiti dua iti police station para iti pannakapalutpotda.#