Security guard, nahold-ap

SAN VICENTE, Ilocos Sur – Saan pay nga ammo ti kinasiasino dagiti nanghold-ap iti maysa a guardia sadiay Barangay Bayubay Sur, ditoy nga ili idi malem ti Pebrero 23.

Iti report a naggapu iti kapolisan ditoy, nahold-ap ti P30,000.00 nga inruar ni Jay Agcarao y Antiporda, 31, naasawaan, security guard ken residente iti Barangay Cabalangegan, Vigan City, iti maysa a bangko iti met laeng nasao a siudad.

Kas maibatay iti panagimbestiga dagiti polis, nangiruar ni Agcarao iti P30,000.00 iti Land Bank, Vigan City Branch ket inkabilna ti kuarta iti sling bagna sa naglugan iti Honda Wave a motorsiklona.

Bayat ti panagdaliasat ti motorsiklo iti Rabacal Street, Barangay Bayubay Sur, inobertekan dagiti suspek a nagaruat iti nangisit a diaket, bull caps ken nakamaskara a naglugan iti skeleton motorcycle sada binangenan ti dalan ti motorsiklo ti biktima.

Mapapati a dimsaag ti nagtagiarmas a back rider manipud iti motorsiklo sana pinaturongan ni Agcarao ken ginammatan ti sling bag a nagkarga iti kuarta.

Naglibas dagiti suspek iti saan nga ammo a direksion.

Nangipatulod dagiti nagresponde a polis iti flash alarm a nangipakaammuanda kadagiti kabangibangna a police stations ti deskripsion ti motorsiklo a nagluganan dagiti suspek ngem negatibo ti resultana.#