Security guard, nasarakan a bangkay

NARVACAN, Ilocos Sur – Napapatay babaen ti pammagsol ti maysa a security guard ti maysa a pagtagilakuan ditoy nga ili idi parbangon ti Nobiembre 14.

Nasarakan ti maysa met laeng a security guard ti mall nga awanen ti biag ni Rowel Calpito y Cabbab, 23, baro, security guard ti JTC Department Store ken residente iti Barangay Mapisi, Nagbukel, Ilocos Sur iti nagbaetan ti bisinidad ti Narvacan Mall ken ti Narvacan North Central School.

Nagsagrap ni Calpito kadagiti sugat iti nadumaduma a paset ti bagina a gapuanan ti natadem a banag nga isu ti impatayna.

Naduktalan ni Rogelio Mendoza y Jacob, 46, security guard ti Narvacan Mall, ken residente iti Barangay Longog, ditoy nga ili, bayat ti panagrekoridana, ti bangkay ti biktima  a mapattapatta a nabagsol idi agarup 12:45 ti parbangon.

Nakarekobre dagiti polis iti maysa a kapsula ti cal. 9 mm ken paris a sinelas iti nakapasamakan ti krimen.

Mapukpukaw ti service firearm ti biktima a mapapati nga intaray dagiti di pay nabigbig a suspek.#