Security guard, pinaltoganna ti ulona

SANTIAGO, Ilocos Sur – Problema iti ayat ti kitkitaen dagiti polis a gapu iti panangpaltog ti maysa a security guard iti ulona idi rabii ti Agosto 27.

Pimmusay iti Candon General Hospital, Candon City ni John Rey Lucero y Sumakbay, 20, baro, miembro ti Bacmor Security Agency a nakadestino a guardia iti Santiago National High School ken residente iti Barangay Sibsibbu, San Emilio, Ilocos Sur.

Naammuan iti report a sakbay ti panagpakamatay ti guardia, nagpaputok iti namitlo a beses iti ere.

Mapapati a kinasarita ken pinagtalna dagiti nagresponde a polis ti guardia ngem kellaat nga impaturong daytoy ti paltogna iti makannawan a pispisna sana kinalbit ti gatilio.

Armscor Model 201 cal. 38 revolver a nagkarga iti dua a bala ken kapsula a naiyisio kenkuana ti inaramat ni Lucero a pinangpaltog iti ulona.

Maysa a suicide note a naisurat iti record book ken retrato ti girlfriend ni Lucero ti nasarakan dagiti inbestigador iti asideg ti biktima.#