Security guard, pinapatay riding in tandem

SINAIT, Ilocos Sur – Sabali pay a pammaltog ti insayangkat dagiti armado a tattao a nagkalubbon iti motorsiklo a nakagudasan ti maysa a security officer iti maysa a kompania ti telekomunikasion sadiay Barangay Tapao, ditoy nga ili idi sardam ti Abril 29.

Awanen ti biag ni Edgar Pecho, 49, baro, security officer iti Globe Telecom, ken agdama nga agnaed iti Barangay Gabut Norte, Badoc, Ilocos Norte, idi naidanon iti Corpuz Clinic and Hospital gapu iti sugatna iti makannigid nga abagana a mapapati a gapuanan ti cal. 45 kas maibasar iti dua a kapsula a narekobre dagiti inbestigador iti crime scene.

Linussok ti lima a bala ti makinsango a kannigid a paset ti kotse.

Nagsagrap laeng iti minor injuries ti kalib-in ti biktima a nainaganan Jiniluz Duques Bensolado, 38.

Iti inisial nga inbestigasion, idi agarup 7:10 ti sardam ti Abril 29, agdaldaliasat nga agpaabagatan ti Toyota Altis a minaneho ni Pecho, kaduana ni Duques, ket idi makadanon ti lugan iti bisinidad ti Barangay Tapao, mapapati a kinamat ida dagiti suspek a naglugan iti di ammo ti klasena a motorsiklo, sa pinaltopaltogan ti maysa ni Pecho.

Gapu iti sugatna iti abagana, napukaw ni Pecho ti kontrolna iti manibela ket natnag ti kotse iti katabakuan iti laud nga abaga ti kalsada.

Nangipakat dagiti polis iti panangidaulo ni Chief Inspector Greg Guerrero iti dragnet operation kadagiti kabangibang a police stations ngem negatibo ti resultana.

Saan pay nga ammo ti motibo ti pammapatay.#