Security measures ti Balikatan Exercises, maisagsagana

VIGAN CITY – Isagsaganan ti kapolisan ditoy probinsia dagiti security measures para kadagiti Amerikano a soldado a makipartisipar iti Balikatan Exercises, daytoy ti pakaammo manipud iti provincial director itay nabiit.

Kinuna ni PNP OIC provincial director Police Senior Supt. Eduardo Dupale nga isagsaganan ti provincial command nga idauluanna dagiti gannuat para iti seguridad dagiti partisipante iti masungad a Balikatan Exercises.

Segun ken ni Dupale, dua a team nga idauluan ti maysa nga officer ti maideploy kas seguridad dagiti partisipante bayat ti pannakaangay ti Balikatan Exercises iti Cabugao ken Salcedo iti daytoy a tawen.

Maangay ti Balikatan Exercises iti Sinait, Ilocos Sur inton Pebrero ken iti Salcedo inton Marso daytoy a tawen.

Kinuna ni Dupale nga imbilinnan iti hepe ti polis ti dua nga ili ti panangbuangayda iti idauluanda a saggaysa a team a buklen ti sangapulo a kameng.

Naammuan a maysa pay a police personnel manipud iti police station ti Vigan City, Candon City, Caoayan, San Vicente, San Ildefonso, Sta. Catalina, Magsingal, Bantay, Sto. Domingo, Cabugao, Santa, Narvacan, Sta. Maria ken Tagudin ti maibaon iti Provincial Mobile Group kas augmentation force.

Iti immun-una nga interbiona iti media, impatalged ni Deputy National Security Adviser Luis “Chavit” Singson a matuloy ti Balikatan Exercises iti daytoy a tawen.

Kinuna pay ni Singson nga adu a pagimbagan ti ipaay ti pannakaisayangkat ti Balikatan Exercises iti probinsia agsipud ta “adu ti makipartisipar… adu dagiti turista nga umay iti probinsia, ket ti domino effectna, batirenna ti ekonomia.”#