Security, traffic measures naiplastaren tapno natalged Miss Universe candidates bayat kaaddada iti Vigan City

VIGAN CITY – Naiplastaren dagiti security measures ken iskema ti trapiko tapno natalged dagiti kandidata para Miss Universe bayat ti kaaddada iti Vigan City.

Kinuna ni Vigan City Mayor Juan Carlo Medina a nakikoordinaren ti siudad iti Philippine National Police, Office of Civil Defense, Philippine Red Cross, City Disaster Risk Reduction and Management Council, City Health Office, Bureau of Fire Protection, ken ti Barangay Peace Actions Teams manipud kadagiti 39 a barangay tapno masigurado ti urnos ken talna kasta met iti pannakaimaton ti nasayud a trapiko kabayatan daytoy internasional a pagteng a pakipartisiparan dagiti Miss Universe candidates.

Iti press conference nga inangayna idi Enero 10, kinuna ni Medina a tapno naballigi daytoy internasional a pagteng, maserraan amin dagiti kalsada nga agturong iti Vigan Heritage Village manipud iti alas 7:00 ti malem ti Enero 15 ket santo laeng aglukat iti alas 2:00 ti malem ti sumaruno nga aldaw kalpasan a nakapanaw dagiti Miss Universe candidates.

Bayat ti pannakaisurat daytoy, duapulo a kandidata para Miss Universe ti sumangpet iti Vigan City iti alas dose ti aldaw ti Enero 15 ket manipud iti Vigan airport, agderetsoda iti Baluarte a pakaangayan ti pangaldaw ken presscon kadagiti kameng ti media. Kalpasanna, agtsek-inda iti Hotel Luna a pagsaganaanda iti pannakipartisiparda iti fashion show no sadino nga aruatda dagiti Abel-Iloco a dinisenio dagiti nasional ken lokal nga fashion designers ditoy probinsia.

Iti panagturongda iti Plaza Burgos, panurnoren dagiti kandidata ti Heritage Village agingga iti entablado a pakaangayan ti fashion show.

Nakaiskediul a pumanaw ti grupo iti alas dies ti kabigatanna.

Sakbayna, kas paset ti panagsagana ti siudad iti panangsangailina kadagiti kandidata para Miss Universe, naiwayat ti serye ti dry run a nakaserraan dagiti kalsada manipud iti Quezon Avenue a pakairamanan dagiti kalsada iti sango ti Archbishop’s Palace ken Saint Paul Cathedral, Burgos Street, ken Florentino Street.

Karaman pay a napaserraan dagiti kalsada manipud iti nagsulian ti A. Reyes Street ken Bonifacio Street a pakaira-manan ti General Luna Street, Salcedo Street, Mabini Street, Plaridel Street, Crisologo Street ken De los Reyes Streets.

Nupay kasta, nakalukat dagiti kalsada ti Quirino Boulevard, Quezon Avenue, Liberation Boulevard, ken sumagmamano a parte ti Bonifacio, General Luna, Salcedo, and Mabini streets.

Kanaig daytoy, kiniddaw ni Medina ti “kooperasion ti publiko iti panagtungpalda iti maipakat nga iskema ti trapiko iti maysa laeng nga aldaw gapu ta dakkel unay ti kaipapananda iti siudad ken iti probinsia agsipud ta internasional a pagteng daytoy”.

Kiniddaw pay ni Medina iti media a tumulongda para iti pannakaipakaammo daytoy nga impormasion tapno masaluadan ti seguridad dagiti kandidata ken iti publiko.

Kabayatanna, inaprobaran ti Department of Education ti panagbalin dagiti campus dagiti pagadalan iti siudad a pagparkingan dagiti lugan bayat ti kaadda dagiti kandidata iti Vigan.

Naituding pay ti Saint Paul Cathedral ken Divine Word College of Vigan a kas emergency centers no adda mapasamak a saan a nasayaat nga insidente idinto a nakikoordinar ti lokal a gobierno ditoy iti Ilocos Sur Medical Society ti panangitedna kadagiti kanayonan a doktor nga agpaay kadagiti naipasdek a first aid stations iti daytoy nga aldaw.

Kinuna ni Medina a nasayaat nga umili ken managtungpal iti linteg dagiti residente ditoy siudad ngem kasapulan a sumurotda kadagiti naipakat a paglintegan tapno masigurado ti natalna a pannakaiwayat daytoy a pagteng a pakipartisiparan dagiti kandidata para Miss Universe. (Tawid News Team)