Footer

Seguridad ti simmuko nga amasona, impasingked ti Philippine Army

NARVACAN, Ilocos Sur – Impasigurado dagiti opisial ti Philippine Army  ti seguridad iti simmuko a kameng ti New People’s Army ken ti pamiliana.

Impasingked da Lt. Col. Raul Bautista, commanding officer ti 41st Infantry Battallion ken ni Col. Loreto Rirao ti 503rd Infantry Brigade a maikkan iti seguridad ni Marinel Aliguen Belisario aka Jenny, taga- Caganayan, Tineg, Abra idinto a kinunada a ti isusuko dagiti NPA ti kapintasan a desision nga aramidenda.

“Mangted daytoy iti baro a biag kadakuada,” kinuna ni  Rirao.

Simmuko ni  Belisario iti 41st Infantry Battallion, Philippine Army a nakabase idiay Lagangilang, Abra idi Hulio 31 daytoy a tawen.

Impalgak ni Rirao nga addan koordinasionda iti Department of Social Welfare and Development iti Bangued ken ti lokal a gobierno iti Tineg tapno maikkan iti livelihood assistance ni Belisario ken ti pamiliana.

Kabayatanna, kinuna ti simmuko nga amasona a dakkel ti panagyamanna ta tinulongan ti Philippine Army a bumangon kalpasan a simmuko iti turay.

“Agyamanak iti Army gapu iti panangtulongda kaniak ken panangipagnada iti papeles a kasapulak tapno mapagadalak met laeng,” kinuna ni Belisario.

Sakbay ti isusukona, ni Belisario ti nakatoka idi a supply officer ti grupo ti New People’s Army nga agdakdakiwas iti  kabambantayan ti Tineg ken kaarrubana a munisipalidad.

 Kinuna ti dati nga amasona nga adda idi iti maikadua a tukad ti sekundaria idi  narekrut akameng ti NPA.

“Naallukoyak a tumipon kadakuada gapu kadagiti agkakasam-it a kari a maaddaankami iti narang-ay a panagbiag no agballigi ti rebolusion nga isaysayangkatmi,” kinunana.

Innayonna a simmuko  agsipud ta nabannogen iti biagna kas maysa nga NPA.

Kinunana a masansanda a  magmagna iti uneg iti maysa nga aldaw, ken makurkuranganda iti turog ken taraon.#