SANTIAGO, Ilocos Sur – Ti naragsak a panangselebrar ti maysa a pamilia iti Black Saturday ket nagtungpal iti naladingit a trahedia.
Nalmes ni Benjamin Undria y Palma, 66, naasawaaan, natibo iti San Fabian, Pangasinan ken agdama a residente iti Barangay Poblacion Sur, Sta. Cruz, bayat ti panaglangoyna iti kabaybayan ti Barangay Sabangan ditoy nga ili idi agarup 4:30 ti malem ti Abril 19, Black Saturday.
Segun iti report, bayat ti panagpipiknikda, naggiinom ti biktima ken dagiti kakaduana sakbay a napan daytoy naglangoy iti baybay.
Nakitada laengen ti biktima a tumtumpaw iti danum.
Inalaw dagiti bumarangay ti biktima sada intaray iti Candon General Hospital ngem indeklara ti doktor a nangtaming kenkuana a dead on arrival.#